১ অক্টোবৰৰ পৰৱৰ্তী শুনানিলৈকে দেশৰ কোনো ৰাজ্য বা কেন্দ্ৰীয়শাসিত প্ৰশাসনে ‘অবৈধ নিৰ্মাণ’ ভাঙি পেলোৱাৰ অজুহাতত বুলড’জাৰ চলাব নোৱাৰিব। মঙলবাৰে এই নিৰ্দেশ দিয়ে উচ্চতম ন্যায়ালয়ে (Supreme Court)।
অন্তৱৰ্তীকালীন নিৰ্দেশত উচ্চতম ন্যায়ালয়ে কয়, “এটা অবৈধ নিৰ্মাণক বুলড’জাৰেৰে ভাঙি পেলোৱা হ’লেও সেয়া আমাৰ সংবিধানৰ মনোভাবৰ বিৰুদ্ধে হ’ব।”
অৱশ্যে চৰকাৰী পথ, জলপৃষ্ঠ, ৰে’লপথ বা ফুটপাথ বেদখল কৰি অবৈধ নিৰ্মাণৰ কাম ভাঙি পেলোৱাৰ ক্ষেত্ৰত কোনো বাধা নাই বুলি বিচাৰপীঠে কয়। এই নিৰ্দেশনা কেৱল ব্যক্তিগত মাটিত নিৰ্মাণৰ ক্ষেত্ৰতহে প্ৰযোজ্য।
উল্লেখ্য যে এই অপৰাধৰ গোচৰত অভিযুক্তৰ ঘৰ বুলড’জাৰেৰে ভাঙি দিয়াৰ সিদ্ধান্তক প্ৰত্যাহ্বান জনাই উচ্চতম ন্যায়ালয়ত গোচৰ ৰুজু কৰা হয়। ২ ছেপ্টেম্বৰত ন্যায়াধীশ বি আৰ গাভাই আৰু ন্যায়াধীশ কে ভি বিশ্বনাথনৰ বিচাৰপীঠৰ সন্মুখত এই গোচৰৰ শুনানি গ্ৰহণ কৰা হৈছিল।
কেন্দ্ৰৰ হৈ আদালতত উপস্থিত আছিল ছলিচিটৰ জেনেৰেল তুষাৰ মেহতা। দুগৰাকী ন্যায়াধীশৰ বিচাৰপীঠে তেওঁক প্ৰশ্ন কৰে, “অভিযুক্ত হ’লেই এজনৰ ঘৰ কেনেকৈ ভাঙি পেলাব পাৰে? দোষী সাব্যস্ত হ’লেও ভাঙি পেলাব নোৱাৰে।”
ইয়াৰ উত্তৰত ছলিচিটৰ জেনেৰেলে কয়, “এনে ব্যৱস্থা (বুলড’জাৰৰ জৰিয়তে ঘৰ ভাঙি পেলোৱা) তেতিয়াহে লোৱা হয়, যেতিয়া কোনো ঘৰ বা আন্তঃগাঁথনি অবৈধভাৱে নিৰ্মাণ কৰা হৈছে বুলি প্ৰমাণ পোৱা যায়।” ন্যায়াধীশ গাভায়ে ইয়াৰ উত্তৰত ছলিচিটৰ জেনেৰেলক কয়, “যদি আপুনি ইয়াক গ্ৰহণ কৰে তেন্তে আমি ইয়াৰ ভিত্তিত নিয়ম সৃষ্টি কৰিম।”
আনহাতে, ন্যায়াধীশ বিশ্বনাথনে প্ৰশ্ন কৰে যে কিয় বুলড’জাৰেৰে ঘৰ ভাঙি পেলোৱাত বাধা দিয়াৰ বাবে নিৰ্দেশিকা জাৰি কৰা নহ’ব। অধিবক্তাসকলৰ এটা অংশই অনুভৱ কৰে যে উচ্চতম ন্যায়ালয়ে মঙলবাৰে বুলড’জাৰৰ ব্যৱহাৰ বন্ধ কৰি উক্ত পদক্ষেপৰ ফলপ্ৰসূ ইংগিত দিছে।
