আৰ জি কৰৰ চিকিৎসকক (RG Kar Rape Case) ধৰ্ষণ আৰু হত্যাকাণ্ডৰ লগত তেওঁৰ সহযোগীও জড়িত হ’ব পাৰে। এই কথা সন্দেহ কৰিছে ভুক্তভোগী চিকিৎসকগৰাকীৰ পিতৃ-মাতৃয়ে। লগতে চিকিৎসালয়খনৰ কেইবাগৰাকীও চিকিৎসক আৰু ইণ্টাৰ্ণৰ নামো তেওঁলোকে চিবিআইক দিয়ে। এই কথা প্ৰকাশ কৰিছে সংবাদ সংস্থা পিটিআয়ে। চিবিআইৰ এগৰাকী বিষয়াই এই কথা সংবাদ সংস্থাটোক জনোৱা বুলি উল্লেখ কৰা হৈছে।
পিটিআইৰ এক প্ৰতিবেদন অনুসৰি, আৰ জি কৰত নিহত চিকিৎসকগৰাকীৰ পিতৃ-মাতৃয়ে কেন্দ্ৰীয় তদন্ত সংস্থাটোক জনাইছে যে তেওঁলোকৰ কন্যাক ধৰ্ষণ আৰু হত্যাকাণ্ডত মাত্ৰ এজন ব্যক্তিয়ে জড়িত আছিল বুলি তেওঁলোকে বিশ্বাস নকৰে।
বৰঞ্চ তেওঁলোকৰ অনুমান এই ঘটনাৰ লগত এজনতকৈ অধিক ব্যক্তি জড়িত। এই সমগ্ৰ ঘটনাত চিকিৎসালয়খনৰ চিকিৎসক আৰু ছাত্ৰ-ছাত্ৰীৰো হাত থাকিব পাৰে। নিহত চিকিৎসকৰ সৈতে কাম কৰা একাংশ লোকৰ নাম চিবিআইক জনায়। তেওঁলোকৰ ওপৰত সন্দেহ কৰাৰ কাৰণো তেওঁ দাঙি ধৰে। চিবিআয়ে তেওঁলোকক জেৰা কৰিব পাৰে।
চিবিআইৰ সূত্ৰ অনুসৰি, মৃত চিকিৎসকৰ পিতৃ-মাতৃক সোধা-পোছাৰ ওপৰত অগ্ৰাধিকাৰ দিয়া হৈছে। ইয়াৰ উপৰি প্ৰথমে ঘটনাৰ তদন্ত আৰম্ভ কৰা কলকাতা আৰক্ষীৰ কেইবাগৰাকীও বিষয়াক জেৰা কৰা হ’ব। কেন্দ্ৰীয় সংস্থাটোৱে জানিব বিচাৰিব যে আৰক্ষীয়ে কি উৎসৰ পৰা এই তথ্য সংগ্ৰহ কৰিছে। চিবিআইৰ সূত্ৰ অনুসৰি, এই ঘটনাৰ সৈতে জড়িত কমেও ৩০ জন লোকক এই পৰ্যন্ত চিনাক্ত কৰা হৈছে। তেওঁলোকৰ জেৰা প্ৰক্ৰিয়াও আৰম্ভ হৈছে।
আনহাতে, মুখ্যমন্ত্ৰী মমতা বেনাৰ্জীয়েও মৃত চিকিৎসকগৰাকীৰ সহকৰ্মীসকলৰ ভূমিকাক লৈ প্ৰশ্ন উত্থাপন কৰিছে। তেওঁ কয়, “পুৱা ২ বজাৰ পিছত ছোৱালীজনী শুই গৈছিল। তেতিয়ালৈকে তেওঁ সহকৰ্মীসকলৰ লগত আছিল। পিছদিনা পুৱা ৯ বজাত মৃতদেহটো উদ্ধাৰ কৰে। ইমান সময়ে কোনেও কিয় তেওঁক বিচৰা নাছিল?”
আনহাতে, শুকুৰবাৰে চিবিআয়ে আৰ জি কৰৰ একাংশ চিকিৎসককো চমন কৰে। চি জি অ’ কমপ্লেক্সতো অংশগ্ৰহণ কৰে। কিছু সময়ৰ বাবে তেওঁলোকক জেৰা কৰা হৈছিল। ইয়াৰ পূৰ্বেও চিবিআয়ে কেইবাজনো চিকিৎসকক সোধা-পোছা কৰে। আৰ জি কৰৰ মৃত চিকিৎসকগৰাকীৰ বিভাগটোৰ মুৰব্বী অৰুণাভ দত্ত চৌধুৰীও শুকুৰবাৰে চি বি আইৰ কাৰ্যালয়ত হাজিৰ হয়।
উল্লেখ্য যে যোৱা ৯ আগষ্টত আৰ জি কৰৰ জৰুৰীকালীন বিভাগৰ চাৰিমহলীয়া চেমিনাৰ হলৰ পৰা এগৰাকী মহিলা চিকিৎসকৰ মৃতদেহ উদ্ধাৰ কৰা হয়। তেওঁক ধৰ্ষণ কৰি হত্যা কৰাৰ অভিযোগ। এই পৰ্যন্ত এই ঘটনাত এজন ব্যক্তিক গ্ৰেপ্তাৰ কৰা হৈছে।
কলিকতা উচ্চ ন্যায়ালয়ৰ নিৰ্দেশত চিবিআয়ে এই ঘটনাৰ তদন্ত অব্যাহত ৰাখিছে। শুকুৰবাৰে আৰ জি কৰৰ স্থানলৈ লৈ যোৱা হয় অভিযুক্তক। আৰ জি কৰৰ প্ৰাক্তন সঞ্চালক সন্দীপ ঘোষক শুকুৰবাৰে চি জি অ’ কমপ্লেক্সত দীৰ্ঘসময় ধৰি জেৰা কৰে। শনিবাৰে তেওঁক পুনৰ চমন কৰা হয়। পুৱাই তেওঁ তাত উপস্থিত হয়।
