চলিত পেৰিছ অলিম্পিকত অঘটন ঘটালে ভাৰতীয় মল্লযুঁজাৰু বিনেশ ফ’গাটে (Vinesh phogat)। তেওঁ প্ৰি-কোৱাৰ্টাৰ ফাইনেলত বিশ্বৰ এক নম্বৰ স্থানৰ তথা যোৱাবাৰৰ স্বৰ্ণ বিজয়ী ইউ ছুছাকিক পৰাস্ত কৰে। অন্তিম মুহূৰ্তত বিনেশে জয়লাভ কৰে।
মেচৰ সমগ্ৰ সময়খিনি তেওঁ পিছপৰি আছিল। বিনেশ ৩-২ পইণ্টৰ ব্যৱধানত জয়ী হয়। উল্লেখ্য যে যোৱা বছৰ ভাৰতীয় মল্লযুঁজৰ ক্ষেত্ৰখনত অস্থিৰতাই বিৰাজ কৰিছিল।
তদানীন্তন মল্লযুঁজাৰু ফেডাৰেচনৰ সভাপতি ব্ৰীজভূষণ চৰণ সিঙৰ মহিলা মল্লযুঁজাৰুৰ ওপৰত অত্যাচাৰ বিৰোধী আন্দোলনৰ অন্যতম নেতা আছিল বিনেশ। দিল্লীৰ যন্তৰ-মন্তৰত দীৰ্ঘদিন ধৰি ধৰ্ণা কাৰ্যসূচী ৰূপায়ণ কৰিছিল তেওঁলোকে। অলিম্পিকৰ ঠিক আগৰ বছৰটোত ইয়াৰ বাবেই প্ৰস্তুতিৰ বহু সময় ব্যয় হয়।
অৱশেষত ব্ৰীজভূষণে পদত্যাগ কৰাত নতুনকৈ নিৰ্বাচন অনুষ্ঠিত হয়। উক্ত নিৰ্বাচনত সভাপতি নিৰ্বাচিত হোৱা সঞ্জয় সিঙৰ ওপৰতো বিনেশ সুখী নাছিল। কিন্তু অলিম্পিকৰ প্ৰস্তুতিৰ বাবে তেওঁ প্ৰতিবাদ কৰিব বিচৰা নাছিল। বিনেশে বিদেশলৈ গৈ প্ৰস্তুতি চলায়।
অৱশ্যে ব্ৰীজভূষণৰ বিৰুদ্ধে আন্দোলনৰত বজৰং পুনিয়া আৰু সাক্ষী মালিকে অলিম্পিকৰ বাবে যোগ্যতা অৰ্জন কৰিব নোৱাৰিলে। কিন্তু বিনেশে যেন এই জয়েৰে উপযুক্ত প্ৰত্যুত্তৰ দিলে।
