ASSAM TIMES POST
বিশেষ প্ৰতিবেদন
বিগত এটা দশকত কিমন আয় কৰিছে বিশ্বৰ ধনকুবেৰসকলে? সকলোৱে বাৰু অধিক সমৃদ্ধশালী হ’লনে? নে কোনোবা পূৰ্বৰ স্থানৰ পৰা অৱনমিত হৈছো? জানিবলৈ হ’লে চাব লাগিব ফোর্বছৰ তালিকা। ২০১০ চনত এই মার্কিন বাৰ্তালোচনীখনে ধনকুবেৰৰ যি তালিকা প্রকাশ কৰিছিল, তাৰ তুলনা কৰিয়ে ২০১৯ চনৰ তালিকাখন চাব লাগিব। ইয়াতে দোখা যাব শিল্পপতিসকলৰ উত্থান-পতন।
২০১০ চনত বিশ্বেৰ ৪৩ নম্বৰ স্থানৰ ধনী শিল্পপতি আছিল জেফ বেজোছ। তেতিয়া তেওঁৰ সম্পত্তিৰ পৰিমাণ আছিল ১২৩০ কোটি ডলাৰ। সেই অৱস্থানৰ আমূল পৰিৱৰ্তন হৈছে বিগত এটা দশকত। ফোর্বছ আলোচনীৰ তালিকাত এমাজনৰ কর্ণধাৰ বেজোছ এতিয়া বিশ্বৰ আটাইতকৈ ধনী ব্যক্তি। বর্তমান তেওঁৰ সম্পত্তিৰ পৰিমাণ হৈছে ১১ হাজাৰ ৬০০ কোটি ডলাৰ।
ধুমকেতুৰ দৰে উত্থানৰ সাক্ষী বার্নার্ড আৰনল্ট। ফৰাচী বিলাসী পণ্য নির্মাতাগৰাকী এতিয়া বিশ্বৰ দ্বিতীয় ধনী ব্যক্তি। সম্পত্তিৰ পৰিমাণ ১১ হাজাৰ ২০০ কোটি ডলাৰ। দহ বছকৰ পূৰ্বে ইয়াৰ পৰিমাণ আছিল ২৭৫০ কোটি ডলাৰ। অনুমান কৰা হৈছে যে আৰনল্ট সংস্থা এলভিএমএইচ-এ যিটো হাৰত আগবাঢ়িছে, বেজোছক চেৰ পেলাবলৈ বেছি দিন নালাগিব।
মাইক্র’ছফ্টৰ সহ-প্রতিষ্ঠাতা বিল গেটছ দহ বছৰ পূৰ্বে আছিল বিশ্বৰ সবাতোকৈ ধনী ব্যক্তি। মুঠ সম্পত্তিৰ পৰিমাণ আছিল পাঁচ হাজাৰ তিনিশ কোটি ডলাৰ। দহ বছৰ পিছত তেওঁৰ সম্পত্তি যথেষ্ট বাঢ়িছে। ১০ হাজাৰ ৮০০ বিলিয়ন ডলাৰৰ গৰাকী গেটছ এতিয়া বিশ্বৰ তৃতীয় ধনী ব্যক্তি।
বৰ্তমান ৱাৰেন বাফেৰ সম্পত্তিৰ পৰিমাণ ৮ হাজাৰ ৯০০ কোটি ডলাৰ। ১০ বছৰ পূৰ্বে তেওঁ আছিল ৩৫৫০ কোটি ডলাৰৰ মালিক। এতিয়া তেওঁ বিশ্বৰ চতুর্থ ধনী ব্যক্তি।
মার্ক জুকাৰবার্গ ২০১০ চনত আছিল বিশ্বৰ কনিষ্ঠতম বিলিয়নাৰ। বিশ্বৰ ধনকুবেৰৰ তালিকাত তেওঁ যুটীয়াভাৱে আছিল ২১ নম্বৰ স্থানত। তেওঁৰ সম্পত্তিৰ পৰিমাণ আছিল ৪০০ কোটি ডলাৰ। বিগত দশকত তেওঁৰ সম্পত্তিৰ পৰিমাণ বাঢ়িছে কেইবা গুণো। ছ’চিয়েলল মিডিয়াৰ ব্যৱসায়িক গ্রাফ তললৈ নামিলেও ফেচবুকৰ প্রতিষ্ঠাতাগৰাকী এতিয়াও বিশ্বৰ পঞ্চম ধনী ব্যক্তি। সম্পত্তিৰ পৰিমাণ ৮ হাজাৰ কোটি ডলাৰ। কিন্তু তেওঁ এতিয়া কনিষ্ঠতম বিলিয়নাৰ হৈ থকা নাই।
এটা দশকত বিশ্বৰ ধনী ব্যক্তিসকলৰ তালিকাত তিনিটা ধাপ আগুৱাইছে এমান্সিঅ’ অৰ্টেগা। ২০১০ চনত তেওঁৰ মুঠ সম্পত্তি আছিল ২৫০০ কোটি ডলাৰ। ৭৬০০ কোটি ডলাৰৰ সম্পত্তিৰে তেওঁ এতিয়া বিশ্বৰ ষষ্ঠ ধনকুবেৰ।
অ’ৰাকলৰ সহ-প্রতিষ্ঠাতা লেৰি এলিছন ২০১০ চনত আছিল বিশ্বৰ ষষ্ঠ ধনী ব্যক্তি। সম্পত্তিৰ পৰিমাণ আছিল ২৮০০ কোটি ডলাৰ। এতিয়া তেওঁৰ সম্পত্তি ৬৭০০ কোটি ডলাৰ যদিও তেওঁ একধাপ পিছুৱাই যায় তালিকাত। তেওঁৰ বৰ্তমান স্থান সপ্তম।
বিশ্বৰ অষ্টম ধনকুবেৰ বৰ্তমান লেৰি পেজ। সম্পত্তিৰ পৰিমাণ ৬ হাজাৰ ৪৩০ কোটি ডলাৰ। ১০ বছৰ পূৰ্বে এই পৰিমাণ আছিল ১ হাজাৰ ৭৫০ কোটি ডলাৰ।
লেৰি পেজৰ সৈতে ১৯৯৮ চনত গুগল প্রতিষ্ঠা কৰিছিল ছার্গেই ব্রিনে। ৬২০০ কোটি ডলাৰৰ মালিক ব্রিন এতিয়া বিশ্বৰ দশম ধনকুবেৰ।
মুকেশ আম্বানী বৰ্তমানেও এছিয়াৰ সৰ্বাধিক ধনী ব্যক্তি। ৬০০০ কোটি ডলাৰ সম্পত্তিৰে তেওঁ এতিয়া বিশ্বৰ একাদশতম ধনী ব্যক্তি। বিগত বছৰত তেওঁ প্রথম দহটা স্থানতো প্ৰৱেশ কৰিছিল।
২০১০ চনত বিশ্বৰ ধনকুবেৰসকলৰ তালিকাৰ ক’তো স্থান নাছিল ফ্রাঁছোৱা বেট্টকুৰ মেৱাৰ্ছ। কিন্তু বৰ্তমান তেওঁ বিশ্বৰ ধনীতম মহিলা আৰু চতুর্দশতম ধনকুবেৰ শিল্পপতি। ২০১৭ চনত তেওঁ মাতৃৰ মৃ্ত্যুৰ ফলত ছবিখন সম্পূৰ্ণ সলনি হৈ যায়। ব্যৱসায়ৰ ৩৩ শতাংশ শ্বেয়াৰ লাভ কৰি ফ্রাঁছোৱা বৰ্তমান ল’ৰিয়েলৰ কর্ণধাৰ। তেওঁৰ ব্ৰেণ্ডেড প্রসাধন সামগ্রীৰ বিপুল চাহিদাৰ জৰিয়তে ফ্রাঁছোৱা বিগত বিত্তীয় বর্ষত ৪ হাজাৰ ৯৩০ কোটি ডলাৰৰ মালিকনী। ১০ বছৰ পূৰ্বে যাৰ পৰিমাণ আছিল ৪ হাজাৰ ২২০ কোটি ডলাৰ। (ছবি : ফেচবুক)
