২০২৪ চনৰ সাধাৰণ নিৰ্বাচন ঘোষণা হোৱাৰ পূৰ্বে নাগৰিকত্ব সংশোধনী আইনৰ (CAA) নিয়মসমূহ অধিসূচিত কৰাৰ সম্ভাৱনা আছে বুলি মঙলবাৰে এগৰাকী চৰকাৰী জ্যেষ্ঠ বিষয়াই প্ৰকাশ কৰে। যিসকল পাকিস্তানী হিন্দু সম্প্ৰদায়ৰ সদস্যই আইনগতভাৱে ভাৰতত প্ৰৱেশ কৰিছিল আৰু নাগৰিকত্বৰ অপেক্ষাত তেওঁলোকৰ নথি-পত্ৰৰ ম্যাদ উকলি গৈছিল, তেওঁলোকেও কাৰ অধীনত অনলাইন আবেদন কৰাৰ যোগ্যতা অৰ্জন কৰিব বুলি বিষয়াগৰাকীয়ে লগতে কয়।
উল্লেখযোগ্য যে ২০১৯ চনৰ ডিচেম্বৰ মাহত সংসদত গৃহীত হোৱা কা এতিয়াও কাৰ্যকৰী হোৱা নাই। নিয়মাৱলী প্ৰস্তুতৰ পিছতহে এই আইনখন বলৱৎ হ’ব। এই আইনখনে পাকিস্তান, বাংলাদেশ আৰু আফগানিস্তানৰ ছটা অনা মুছলমান সম্প্ৰদায়ৰ ভিছা আৰু পাছপ’ৰ্ট অবিহনে অবৈধভাৱে প্ৰৱেশ কৰা নথি-পত্ৰবিহীন লোকসকলক নাগৰিকত্বৰ সুবিধা প্ৰদান কৰে।
কাৰ জৰিয়তে ২০১৪ চনৰ ৩১ ডিচেম্বৰত বা তাৰ পূৰ্বে ভাৰতত প্ৰৱেশ কৰা চুবুৰীয়া তিনিখন দেশৰ হিন্দু, শিখ, বৌদ্ধ, পাৰ্চী, খ্ৰীষ্টান আৰু জৈন সম্প্ৰদায়ৰ লোকৰ নাগৰিকত্ব দ্ৰুতগতিত প্ৰদান কৰে। এই আইনে নাগৰিকত্ব বিচৰা ছয়টা সম্প্ৰদায়ৰ আবেদনকাৰীৰ বাবে ভাৰতত থকাৰ প্ৰয়োজনীয়তা ১১ বছৰৰ পৰা ছয় বছৰলৈ হ্ৰাস কৰে।
