ASSAM TIMES POST
বিশেষ প্ৰতিবেদক
নাগৰিকত্ব আইন (সংশোধনী) চমুকৈ ‘কা’ বাতিলৰ দাবীত সোমবাৰে প্রতিবাদত বহে মহানগৰীৰ নাগৰিক সমাজ। উল্লেখ্য যে সোমবাৰে সদৌ অসম ছাত্ৰ সন্থা আৰু ৩০টাকৈ জনগোষ্ঠীয় সংগঠনৰ উদ্যোগত সমগ্ৰ ৰাজ্যজুৰি নাগৰিক সমাজৰ অৱস্থান ধৰ্মঘট কাৰ্যসূচীৰ আহ্বান জনাইছিল৷ ইয়াৰে অংশ হিচাপে গুৱাহাটীৰ ঐতিহাসিক লতাশিল খেলপথাৰত ৰূপায়ণ কৰা হয় এই ধৰ্মঘট কাৰ্যসূচী।পুৱা ১১বজাৰ পৰা গ্ৰহণ কৰা নাগৰিকৰ অৱস্থান ধৰ্মঘট কাৰ্যসূচীত উপস্থিত থাকে মহানগৰীৰ নাগৰিক সমাজ। মহানগৰখনৰ প্ৰায় পাঁচ শতাধিক নাগৰিকে অংশগ্ৰহণ কৰা কাৰ্যসূচীত উপস্থিত থাকি শিক্ষাবিদ তথা সক্ৰিয় ৰাজহুৱা কৰ্মী দেবেন দত্তই কয়, “প্ৰতাৰক আৰু মিছলীয়া ৰাজনীতিকৰ পৰিচয় আজি স্পষ্ট হৈছে। দেশদ্রোহী ৰাজনৈতিক নেতাসকলে দেশৰ প্ৰজাসকলক গচকি-খচকি মাৰিবৰ কাৰণে লগতে নিজৰ ব্যক্তিগত স্বাৰ্থ পূৰণ কৰিবৰ কাৰণে ‘কা’ৰ দৰে আইনক সমৰ্থন কৰিছে। তেওঁলোকে নিজৰ মানুহখিনিৰ আস্থা হেৰুওৱাৰ উপক্ৰম ঘটাত বেলেগ দেশৰ মানুহ আনি তেওঁলোকৰ ভোটৰ জৰিয়তে দেশ শাসন কৰিব বিচাৰিছে৷”
আনহাতে, সৰ্বানন্দ সোণোৱাল চৰকাৰৰ শেহতীয়া কেবিনেটে দিয়া বিভিন্ন প্ৰতিশ্ৰুতি সম্পৰ্কত দত্তই কয়, “৫৯ বছৰৰ পূৰ্বে অসমৰ চৰকাৰী ভাষা অসমীয়া বুলি স্বীকৃতি দি থোৱা আছে। পুনৰ তেওঁলোকে নতুনকৈ স্বীকৃতি দিব বিচৰাটো কেনে এক অদ্ভূত কথা৷” অসমীয়া মানুহক চৰকাৰে বুৰ্বক বুলি ভাবিছে নেকি বুলি উল্লেখ কৰি তেওঁ কয় যে স্বয়ং চৰকাৰেই অসমীয়া ভাষাক ৰাজ্য ভাষা হিচাপে ব্যৱহাৰ কৰা নাই।
আছুৰ মুখ্য উপদেষ্টা ডঃ সমুজ্জ্বল কুমাৰ ভট্টাচাৰ্যই ধৰ্মঘটস্থলীত উপস্থিত থাকি কয়, “অসম আন্দোলনৰ সময়ত চৰকাৰে গ্ৰহণ কৰা বিজ্ঞাপন-সংস্কৃতি এতিয়া লৈছে বিজেপি চৰকাৰে। ইয়াৰ অংশ হিচাপে কেইদিনমান পূৰ্বে ২০গৰাকী উপাচাৰ্য আৰু আজি ১৬গৰাকী বিভিন্ন ক্ষেত্ৰৰ বিশিষ্ট ব্যক্তিয়ে চৰকাৰৰ হৈ নিজৰ স্বাক্ষৰ প্ৰকাশ কৰি দীঘলীয়া আন্দোলনত ৰহস্য থকা বুলি কৈছে। কিন্তু সেই ব্যক্তিসকলৰ উদ্দেশ্য আৰু মনোভাবতহে ৰহস্য লুকাই আছে। সেইসকলক বাদ দি নাগৰিকসকল হ’ব আমাৰ অভিভাৱক৷”
ধৰ্মঘটত অংশগ্ৰহণকাৰী নাগৰিকসকলক উদ্দেশ্যি সদৌ অসম ছাত্ৰ সন্থাৰ সভাপতি দীপাংকৰ নাথে কয়, “সংগ্ৰাম দীঘলীয়া হ’ব। তাৰবাবে নাগৰিক সমাজে আমাৰ অভিভাৱকৰ দায়িত্ব পালন কৰিব লাগিব। কিন্তু এচাম ৰং সলোৱা অৰ্থাৎ বঁটা-বাহনৰ আশাত চৰকাৰী ৰং লগোৱা মানুহে বাতৰিকাকতত বিজ্ঞাপন প্ৰকাশ কৰি সংগ্রাম সমাপ্ত কৰিবলৈ কৈছে। সময়ে সময়ে ৰং সলাই থকা তেনে লোকসকলৰ কথা শুনাত নাই৷ এই সংগ্রাম চলি থাকিব লাগিব আৰু চৰকাৰক ঐক্যবদ্ধ হৈ ওফৰাব লাগিব। এয়াই আমাৰ প্ৰধান লক্ষ্য৷”
