১২৮ বছৰৰ বিৰতি। এইবাৰ পুনৰ অলিম্পিকত অন্তৰ্ভুক্ত হʼল ক্ৰিকেট (Cricket included in the Olympics)। ২০২৮ চনৰ লছ এঞ্জেলছ অলিম্পিকত ক্ৰিকেটক অন্তৰ্ভুক্ত (Cricket included in the 2028 Los Angeles Olympics) কৰাৰ সিদ্ধান্তত আন্তঃৰাষ্ট্ৰীয় অলিম্পিক কমিটীয়ে এক প্ৰকাৰৰ সন্মতি দিলে। ১৯০০ চনত অন্তিমবাৰৰ বাবে পেৰিছ অলিম্পিকত ক্ৰিকেট খেলা হৈছিল।
১৪ আৰু ১৫ অক্টোবৰত মুম্বাইত আন্তঃৰাষ্ট্ৰীয় অলিম্পিক সমিতিৰ বৈঠক। সেই উপলক্ষে আইঅ’চিৰ মুৰব্বী থমাছ বাখ মুম্বাইলৈ আহিছে। মুম্বাইলৈ অহাৰ পিছত তেওঁ কয় যে ক্ৰিকেটক অলিম্পিকত অন্তৰ্ভুক্ত কৰাৰ সিদ্ধান্ত প্ৰায় নিশ্চিত হৈ পৰিছে। কিন্তু ক্ৰিকেটৰ ফৰ্মেট কি হʼব, কেনেকৈ খেলিব বা কিমান দলে অংশগ্ৰহণ কৰিব সেয়া চূড়ান্ত হোৱা নাই।
আইঅ’চিৰ সূত্ৰ অনুসৰি, আন্তঃৰাষ্ট্ৰীয় অলিম্পিক কমিটীৰ কাৰ্যনিৰ্বাহক সমিতিয়ে ক্ৰিকেটক অলিম্পিকত অন্তৰ্ভুক্ত কৰাৰ বাবে ছীল-মোহৰ মাৰিছে। কেৱল ক্ৰিকেটেই নহয়, বেছবল/চফটবল, ফ্লেগ ফুটবল, লেক্ৰছ আৰু স্কোৱাছকো আন্তঃৰাষ্ট্ৰীয় অলিম্পিক কমিটীৰ কাৰ্যবাহী সমিতিৰ দ্বাৰা লছ এঞ্জেলছ অলিম্পিকত অন্তৰ্ভুক্তিৰ বাবে ছীল কৰা হৈছে। থমাছ বাখে কয়, “আইঅ’চিয়ে কোনো দেশৰ সৈতে আলোচনা নকৰে। কিন্তু ক্ৰিকেটক কেনেকৈ অধিক জনপ্ৰিয় কৰি তুলিব পাৰি সেইটো সিদ্ধান্ত লʼবলৈ আইচিচিৰ সৈতে আলোচনা কৰা হ’ব। ক্ৰিকেটক অলিম্পিকত অন্তৰ্ভুক্ত কৰাৰ সন্দৰ্ভত এতিয়াও চৰ্চা চলি আছে। কিমান দলে অংশগ্ৰহণ কৰিব সেয়া স্পষ্ট হোৱা নাই।”
উল্লেখযোগ্য যে এইবাৰৰ এছিয়া কাপত ক্ৰিকেট আছিল টি-২০ ফৰ্মেট। লছ এঞ্জেলছ অলিম্পিকত যদি ক্ৰিকেট দেখা যায় তেন্তে সেয়াও হʼব টি-২০ ফৰ্মেটতেই। পুৰুষ আৰু মহিলা উভয় শাখাত ছটাকৈ দলে ক্ৰিকেট খেলাৰ সুযোগ পাব। ৰেংকিঙৰ ক্ষেত্ৰত ৬টা দলে অলিম্পিকত খেলিব, যদিও ফৰ্মেট চূড়ান্ত নহয়।
