ৰাহুল গান্ধীয়ে (Rahul Gandhi) দাবী কৰিছে যে আৰএছএছে ইচ্ছা কৰিলে নৰেন্দ্ৰ মোডীক (Narendra Modi) পাঁচ মিনিটতে অপসাৰণ কৰিব পাৰে। ইউৰোপ ভ্ৰমণৰ সময়ত পেৰিছৰ বিজ্ঞান পিঅʼ বিশ্ববিদ্যালয়ৰ ছাত্ৰ-ছাত্ৰীৰ সৈতে হোৱা বাৰ্তালাপত তেওঁ কয়, “বিজেপিয়ে ভোটৰ মেৰুকৰণ কৰে। ঘৃণা বিয়পায়। বিভাজনৰ সৃষ্টি কৰে। ধনী লোভী উদ্যোগপতিসকলে বিজেপিক আৰ্থিকভাৱে সহায় আগবঢ়ায়।
এই আন্তঃগাঁথনিয়ে বিজেপিৰ আঁৰত কাম কৰে।” ৰাহুলে আৰু কয়, “নৰেন্দ্ৰ মোডীয়ে এই গোটেই গাঁথনিটো চলাই আছে বুলি কোৱাটো অতি সৰলীকৰণ। আচলতে নৰেন্দ্ৰ মোডী এই সমগ্ৰ গাঁথনিৰ এক আহিলা। মই নিশ্চিত যে সংঘ পৰিয়ালে নৰেন্দ্ৰ মোডীক ইচ্ছা কৰিলে পাঁচ মিনিটত অপসাৰণ কৰিব পাৰিব।”
নিজৰ ইউৰোপ ভ্ৰমণত প্ৰথমে বেলজিয়াম, তাৰ পিছত ফ্ৰান্স হৈ নেদাৰলেণ্ডত উপস্থিত হয় ৰাহুল গান্ধী। দিল্লীত জি-২০ সন্মিলনৰ সময়ত সমগ্ৰ প্ৰচাৰ যেতিয়া মোডীৰ ওপৰত চলি আছে, তেতিয়া পেৰিছৰ পৰা তেওঁ পুনৰ প্ৰশ্ন উত্থাপন কৰিছে উদ্যোগপতি গৌতম আদানীৰ সৈতে মোডীৰ সম্পৰ্কক লৈ। ৰাহুলৰ মতে, আদানীৰ সৈতে প্ৰধানমন্ত্ৰী মোডীৰ গভীৰ সম্পৰ্ক এতিয়া সুপ্ৰতিষ্ঠিত। আদানী গ্ৰুপে ভাৰতৰ বাহিৰত ধন সৰবৰাহ কৰি আছে।
নিজৰ কোম্পানীৰ শ্বেয়াৰৰ মূল্য হেৰফেৰ কৰি ধনৱান হৈছে। সেই ধনেৰে ভাৰতৰ সকলো সম্পত্তি জব্দ কৰিছে। সতৰ্কতাৰ সুৰত ৰাহুলে কয়, “আদানীয়ে ৰেহাই নাপাব। তেওঁলোকক জবাবদিহি কৰিব লাগিব।” একে সময়তে ভাৰতৰ গণতান্ত্ৰিক প্ৰতিষ্ঠানৰ নিৰপেক্ষতা পৰিত্যাগ কৰা, সংখ্যালঘু, দলিতক আক্ৰমণ কৰাসকলৰ বিষয়ে ৰাহুলে কয়, “যিসকলে ভাৰতৰ আত্মাক আক্ৰমণ কৰিছে, তেওঁলোকে তাৰ মূল্য দিব লাগিব। যাতে ভৱিষ্যতে কোনোবাই আকৌ এই কাম কৰাৰ আগতে চিন্তা কৰে।”
দলিত-সংখ্যালঘুসকলৰ ওপৰত হোৱা আক্ৰমণক ভাৰতৰ ‘বৃহত্তম সমস্যা’ বুলি অভিহিত কৰি ৰাহুলে কয় যে মোডীয়ে যিকোনো সময়তে দলিত-সংখ্যালঘু লোকক আক্ৰমণ কৰা বন্ধ কৰিব পাৰে। তেওঁ কয়, “মই গীতা পঢ়িছো। উপনিষদ পঢ়িছোঁ। মই হিন্দু শাস্ত্ৰ পঢ়িছো। বিজেপিয়ে যি কৰে তাত হিন্দু ধৰ্ম নাই। কোনো কিতাপত লিখা নাই যে আপুনি দুৰ্বলক ভয় খুৱাই আঘাত কৰক। হিন্দু জাতীয়তাবাদী বুলি কোনো কথা নাই। তেওঁলোকে আচলতে যিকোনো মূল্যৰ বিনিময়ত ক্ষমতা ধৰি ৰাখিব বিচাৰে।”
ইয়াৰ উত্তৰত বিজেপিৰ সাংসদ তেজস্বী সূৰ্যই ৰাহুলক লক্ষ্য কৰি কয় যে তেওঁৰ মতে হিন্দু ধৰ্মক কিতাপ পঢ়িয়েই চৰ্চা কৰা হয়। আমাৰ ধৰ্মৰ প্ৰতি তেওঁৰ চিন্তাধাৰা কিমান সংকীৰ্ণ তাৰ পৰাই বুজা যায়। তেজস্বীয়ে কয়, “ভাৰতে জি-২০ত আন্তঃৰাষ্ট্ৰীয় সহমত গঢ়ি তোলাৰ সময়ত ইউৰোপৰ এখন বিশ্ববিদ্যালয়ত ৰাহুল বহু দূৰৈত মুষ্টিমেয় লোকৰ সন্মুখত কান্দি আছে, ইয়াৰ পৰাই বুজা যায় যে এদশক পূৰ্বে তেওঁৰ ৰাজনীতিক কিয় মানুহে নাকচ কৰিছিল।”
কিন্তু ৰাহুলে পেৰিছত যুক্তি দিছিল যে ভাৰতৰ সংখ্যাগৰিষ্ঠ হিন্দু সকলোৱে বিজেপিক ভোট দিয়ে বুলি ধাৰণাটো ভুল। বিৰোধী মিত্ৰজোঁট ইণ্ডিয়াই লাভ কৰে ৬০ শতাংশ ভোট। ৪০ শতাংশ লোকে বিজেপিক ভোট দিলে। সংখ্যাগৰিষ্ঠতাবাদীয়ে বৃহৎসংখ্যক বিৰোধীক ভোট দিয়ে।