প্ৰায় তিনিমাহ ধৰি অশান্ত জৰ্জৰ মণিপুৰত শেহতীয়াকৈ দুইগৰাকীকৈ কুকি মহিলাক অতি অমানৱীয় আৰু পাশৱিকভাবে নগ্ন অৱস্থাত (Kuki woman naked in Manipur) সমদল কৰি লৈ যোৱা কাৰ্যকলৈ সমগ্ৰ বিশ্বজুৰি তোলপাৰ হৈ থকাৰ সময়তে আজি পুৱাৰ ভাগত ডিফুত কাৰবি আংলং জিলাৰ আঞ্চলিক ৰাজনৈতিক দল এপিএইছএলচি দলে (APHLC Implementation of dharna programme) এক বিশাল ধৰ্ণা কাৰ্যসূচী ৰূপায়ন কৰে ৷ এপিএইছএলচিৰ সভাপতি জে আই কাথাৰৰ নেতৃত্বত প্ৰায় পাঁচ শতাধিক কাৰবি আৰু কুকি সমৰ্থকে ডিফুৰ ছেমছনচিং টেৰণ মেম’ৰিয়েল পাৰ্কত তিনিঘণ্টীয়া ধৰ্ণা কাৰ্যসূচী ৰূপায়ণ কৰে ৷
প্ৰতিবাদকাৰীসকলে হাতে হাতে প্লেকাৰ্ড, বেনাৰ আদিলৈ WE WANT TO SAFE, NOT TO BE RAPED, WE CONDEMN RAPED MURDER OF KUKI WOMEN IN MONIPUR, DON’T PUT INDIA IN SHAMEFUL GLARE AMONG NATION, WHY PM MODI MARE SPECTOR FOR TWO MONTHS আদি শ্লোগানেৰে প্ৰতিবাদস্থলী উত্তাল কৰি তোলে ৷
সংবাদ মাধ্যমৰ সৈতে এপিএইছএলচি সভাপতি জে আই কাথাৰে কয় যে, মণিপুৰত শেহতীয়ীকৈ দুই কুকি মহিলাক নগ্ন কৰি এদল পাশৱিক মানসিকতাৰ লোকে সমদল কৰাই নিয়া কাৰ্যই সমগ্ৰ বিশ্বৰ ওচৰত ভাৰতক লজ্জানত কৰিছে ৷ এই কাৰ্য তীব্ৰ গৰিহণাৰ যোগ্য ৷ মণিপুৰত চলি থকা অৰাজকতাত প্ৰধান মন্ত্ৰী নৰেন্দ্ৰ মোদীয়ে নেদেখা কুলিৰ ভাও জুৰি দুমাহ ধৰি মৌন হৈ থকাটো গ্ৰহণযোগ্য নহয় ৷
ভাৰতৰ গৃহমন্ত্ৰী অমিত শ্বাহ আৰু অসমৰ মুখ্যমন্ত্ৰী তথা নেডাৰ আহ্বায়ক ডঃ হিমন্ত বিশ্ব শৰ্মা মণিপুৰক শান্ত কৰাৰ বাবে মণিপুৰলৈ গৈছিল যদিও তেওঁলোক মণিপুৰৰ পৰা ঘূৰি অহাৰ পিছত মণিপুৰত অধিক হিংসা হবলৈ ধৰিছে ৷ মণিপুৰত ইণ্ডিয়ান মংগোলীয়ান সকলৰ মাজত সংঘাত সৃষ্টি কৰি মংগোলীয়ান সকলক নিশেষ কৰাৰ বাবে কোনোবাই বা আৰ এছএছ আৰু বংগ সেনাই ষড়যন্ত্ৰ কৰিছে বুলি এপিএইছএলছি দলে ভাবে বুলি সংবাদ মাধ্যমৰ আগত প্ৰকাশ কৰে জে আই কাথাৰে৷
মণিপুৰৰ মুখ্যমন্ত্ৰী সমগ্ৰ ঘটনা দুমাহ ধৰি প্ৰত্যক্ষ কৰিও মৌন হৈ থকাটো ৰহস্যজনক বুলি কয় কাথাৰে ৷মণিপুৰত হিংসাত নিহত, আহত পৰিয়াল, সম্পত্তি নষ্ট, গীৰ্জা স্কুল আদিৰ ক্ষতিপূৰণৰ বাবে আৰু পুণৰ সংস্থাপনৰ বাবে যথেষ্ট পূঁজী আৱণ্টন দিবলৈও চৰকাক দাবী জনায় জেআই কাথাৰে৷
