Rahul Gandhi to visit violence-hit Manipur I অশান্ত মণিপুৰলৈ ৰাহুল গান্ধী

অশান্ত মণিপুৰ ভ্ৰমণলৈ ওলাইছে ৰাহুল গান্ধী (Rahul Gandhi to visit violence-hit Manipur)। ২৯ আৰু ৩০ জুনত মণিপুৰত উপস্থিত হʼব ৰাহুল গান্ধী। মঙলবাৰে কংগ্ৰেছৰ সাধাৰণ সম্পাদক কে চি বেনুগোপালে (K C Venugopal) ৰাহুলৰ ভ্ৰমণৰ কথা ঘোষণা কৰি কয়, “ৰাহুলে মণিপুৰ ভ্ৰমণৰ সময়ত হিংসাৰ ফলত আশ্ৰয় শিবিৰত থকা লোকসকলক লগ কৰিব।

মণিপুৰৰ অসামৰিক সমাজৰ প্ৰতিনিধিৰ সৈতে আলোচনা কৰিব।” উল্লেখযোগ্য যে ডেৰ মাহতকৈও অধিক সময় ধৰি চলি থকা ধাৰাবাহিক হিংসাত নিহত লোকৰ সংখ্যা ডেৰশৰ ওচৰ চাপিছে।গৃহহীন প্ৰায় ৫০ হাজাৰ লোক! গৃহমন্ত্ৰী অমিত শ্বাহে (Amit Shah) অলপতে ৰাজ্যখন ভ্ৰমণ কৰিছিল।

তেওঁৰ ভ্ৰমণৰ পিছতো পৰিস্থিতিৰ উন্নতি হোৱা নাছিল। তাত শান্তি ঘূৰাই অনাৰ চেষ্টা চলাই আছে প্ৰশাসনে। বিৰোধীৰ অহৰহ আক্ৰমণৰ সন্মুখীন হৈ অমিত শ্বাহে শনিবাৰে সৰ্বদলীয় বৈঠক আহ্বান কৰে। তেতিয়াও হিংসাৰ ঘটনা সংঘটিত হৈছিল। যোৱা ৩ মেʼৰ পৰাই অস্থিৰ হৈ পৰিছে মণিপুৰ।

মণিপুৰ উচ্চ ন্যায়ালয়ে ৰাজ্য চৰকাৰক মেইটেইসকলক অনুসূচিত জনজাতিৰ মৰ্যাদা প্ৰদানৰ কথা বিবেচনা কৰিবলৈ নিৰ্দেশ দিছিল। ইয়াৰ পিছত অলপ সময়ৰ ভিতৰতে তাৰ বিৰোধিতা কৰি জনসংগঠন ওলাই আহিল। তেতিয়াৰ পৰাই অশান্ত মণিপুৰ।