এছ আই জোনমনি ৰাভাৰ দুৰ্ঘটনা (SI Jonmani Rava’s accident)ৰ নামত বোকাখাতত সাংবাদিকৰ বিৰুদ্ধে আৰক্ষী আৰু চি আই ডি-এ মানসিক নিৰ্যাতন চলোৱাৰ অভিযোগ উত্থাপন কৰিছে সাংবাদিকসকলে (Journalist complains of mental harassment)।
আৰক্ষী বিষয়া জোনমণি ৰাভাৰ দুৰ্ঘটনাৰ প্ৰত্যক্ষদৰ্শী বুলি দাবী কৰা প্ৰণৱ দাস ওৰফে নালীয়াৰ বক্তব্য সংগ্ৰহ কৰা সাংবাদিকক জিলাৰ বাহিৰৰ থানালৈ মাতি নিয়া, চি আই ডি-ৰ জেৰাৰ নামত সাংবাদিকসকলক অপৰাধীৰ দৰে বোকাখাত থানালৈ মাতি নি কেইবা ঘন্টাও ৰখাই থোৱা ,শেষ নিশা দুৰ্ধৰ্ষ অপৰাধিক দৰে জ্যেষ্ঠ সাংবাদিকৰ ঘৰ ঘেৰাও কৰি অমূলক প্ৰশ্ন কৰাকে ধৰি অসৌজন্যমূলক ব্যৱহাৰ কৰাৰ সন্দৰ্ভত আজি অসম ৰাজ্যিক সাংবাদিক সন্থা, বোকাখাত মহকুমা সাংবাদিক সংস্থা, বোকাখাত প্ৰেছ ক্লাব, ইমজা, কাজিৰঙা আঞ্চলিক সাংবাদিক সংস্থা, গোৰ্খা ছাত্ৰ সন্থা, চাহ জনজাতি ছাত্ৰ সন্থাৰ বোকাখাত মহকুমা সমিতি, বোকাখাত মহকুমা ছাত্ৰ সন্থা, বোকাখাত বাছ মালিক সন্থা, বোকাখাত মহকুমা চুতীয়া ছাত্ৰ সন্থা, অসম জাতীয়তাবাদী যুৱ ছাত্ৰ পৰিষদৰ ৰাজ্যিক সমিতি, পৰিষদৰ বোকাখাত জিলা সমিতি, জীপাল কৃষক-শ্ৰমিক সংঘ, বোকাখাত ক্ৰীড়া সন্থা, অধিবক্তা সন্থা আদি সংগঠনৰ বিষয় ববীয়াসকলে আজি দিনৰ ২ বজাৰ পৰা বোকাখাত নাট্য মন্দিৰৰ সমুখত এক অৱস্থান ধৰ্মঘট কাৰ্যসূচী গ্ৰহণ কৰি প্ৰতিবাদ সাব্যস্ত কৰে।
লগতে এই প্ৰতিবাদ স্থলীতে অসমৰ মুখ্যমন্ত্ৰী, প্ৰেছ কাউন্সিল অৱ ইণ্ডিয়াক সমগ্ৰ বিষয় সন্দৰ্ভত স্মাৰকপত্ৰ যোগে অৱগত কৰিছে।অসম ৰাজ্যিক সাংবাদিক সংস্থাৰ সভাপতি জিতু শৰ্মা ৰাজখোৱা, বোকাখাত মহকুমা সাংবাদিক সংস্থাৰ সভাপতি আৰু সম্পাদক বুবুল দত্ত আৰু নীলু আচাৰ্য, বোকাখাত প্ৰেছ ক্লাবৰ সভাপতি, সম্পাদক ক্ৰমে ভৱানন্দ কলিতা আৰু উত্তম শইকীয়া, ইমজা বোকাখাতৰ সভাপতি, সম্পাদক ক্ৰমে প্ৰদীপ কুমাৰ বৰা আৰু দিব্যজ্যোতি হাজৰিকা স্বাক্ষৰিত স্মাৰক পত্ৰখনৰ জৰিয়তে সাংবাদিকৰ প্ৰতি আৰক্ষী প্ৰশাসনৰ এনে অসৌজন্যমূলক আচৰণ আৰু নিৰ্যাতন বন্ধ কৰিবলৈ আৰু সাংবাদিক সকলৰ নিৰাপত্তা নিশ্চিত কৰিবৰ বাবে অসমৰ মুখ্যমন্ত্ৰীলৈ আহ্বান জনায়।
আজি প্ৰতিবাদ থলীতে অসম ৰাজ্যিক সাংবাদিক সংস্থাৰ সভাপতি জিতু শৰ্মা ৰাজখোৱাই সাংবাদিকৰ প্ৰতি আৰক্ষীয়ে কৰা অসৌজন্যমূলক আচৰণৰ প্ৰতিবাদ কৰি সাংবাদিকৰ আগত কয় যে যি সময়ত, বিশেষকৈ অসম চৰকাৰ আৰু আৰক্ষী বিভাগৰ মূৰব্বী বিষয়া সকলে আৰক্ষী আৰু জনসাধাৰণৰ মাজত সুসম্পৰ্কৰ শ্লোগান দি আছে, সেই সময়ত গনতন্ত্ৰৰ চতুৰ্থ স্তম্ভ স্বৰূপ সাংবাদিকৰ প্ৰতি কৰা এনে দুৰ্ব্যৱহাৰ কোনো কাৰণতে গ্ৰহণযোগ্য নহয় আৰু আমি তীব্ৰ প্ৰতিবাদ কৰিছোঁ, আৰু লজ্জিত অনুভৱ কৰিছোঁ।
সাংবাদিকৰ প্ৰতি এনে আচৰণ বন্ধ নহ’লে সমগ্ৰ অসম জুৰি প্ৰতিবাদ কৰা হ’ব বুলি সকিয়াই দিয়ে। ইফালে কৃষক নেতা সোণেশ্বৰ নৰহে আৰক্ষীয়ে সোধ পোছৰ বাবে মাতি নি গণতন্ত্ৰৰ চতুৰ্থ স্তম্ভ স্বৰূপ সাংবাদিকক সাধাৰণ অপৰাধীৰ দৰে ব্যৱহাৰ কৰাৰ কোনো অধিকাৰ নাই বুলি আজি প্ৰতিবাদ থলীত সাংবাদিকৰ আগত মত প্ৰকাশ কৰে।
