ভোজৰ আয়োজন চলি আছিল। চৌকাৰ পৰা পায়সেৰে ভৰা পাত্ৰটো নমাই থোৱা হৈছিল মাত্ৰ৷ ৰান্ধনীজনে ঢাকিবলৈও সময় নাপালে। হঠাৎ খেলি খেলি তাত উপস্থিত হয় এটা শিশু। কিবা বুজি পোৱাৰ আগতেই নিয়ন্ত্ৰণ ৰাখিব নোৱাৰি পায়সেৰে ভৰা পাত্ৰটোৰ ভিতৰত পৰি যায় শিশুটি (child falls in the container full of payas)! এই ঘটনা যোৱা শুকুৰবাৰে ওড়িশাৰ নুৱাপাৰাত (Nuapara in Odisha) সংঘটিত হয়।
সোমবাৰে ওড়িশাৰ এখন চিকিৎসালয়ত শিশুটিৰ মৃত্যু (Child dies in hospital) হয়।বিগত তিনিদিন ধৰি শিশুটিক বচাবলৈ চেষ্টা চলায় চিকিৎসকে। কিন্তু শেষ ৰক্ষা নহʼল। গৰম পায়সৰ পাত্ৰত প্ৰায় ডুবি যোৱাৰ ফলত শিশুটিৰ শৰীৰ জ্বলি যোৱা বুলি চিকিৎসকে জানিবলৈ দিয়ে।
আৰক্ষীৰ সূত্ৰ অনুসৰি, শিশুটিৰ বয়স ৪ বছৰ। তেওঁৰ পিতৃ ওড়িশাৰ নুৱাপাৰাৰ ৰানিমুণ্ডা গাঁৱৰ বাসিন্দা। নাম হুতেশ কুমাৰ হৰনা। যোৱা শুকুৰবাৰে হুতেশৰ চুবুৰীত ভোজৰ আয়োজন কৰা হৈছিল। ৰন্ধা-বঢ়া চলি থকা ঠাইৰ ওচৰতে খেলি আছিল শিশুটি। ঘটনাস্থলীত উপস্থিত থকা চুবুৰীয়াই গৰম পায়সৰ পাত্ৰত পৰি যোৱা দেখি লগে লগে উদ্ধাৰ কৰে। ততাতৈয়াকৈ শিশুটিক স্থানীয় চিকিৎসালয়লৈ প্ৰেৰণ কৰা হয়।
পিছত শিশুটিৰ অৱস্থা বেয়া হোৱাত তেওঁক জিলা চিকিৎসালয়ত ভৰ্তি কৰোৱা হয়। কিন্তু তথাপিও শেষ ৰক্ষা কৰিব নোৱাৰিলে।শনিবাৰে ওড়িশাৰ পুৰীত জগন্নাথ মন্দিৰৰ গৰম দাইল পৰি মন্দিৰৰ দুজন সেৱক গুৰুতৰভাৱে আহত হয়। এতিয়াও চিকিৎসালয়ত চিকিৎসাধীন হৈ আছে তেওঁলোক। সোমবাৰেও প্ৰায় অনুৰূপ ঘটনাত এটি ৪ বছৰীয়া শিশুৰ মৃত্যু হয়। তেওঁৰ মৃত্যুত গাঁওখনত শোকৰ ছাঁ পৰে।
