প্ৰখৰ ৰʼদত (scorching sun) তিনিটা সন্তানৰ সৈতে ৰাস্তাৰে খোজকাঢ়ি গৈ আছে এগৰাকী মাতৃ। কোলাত আন এগৰাকী কন্যা সন্তান। বয়স আনুমানিক এবছৰ। তেওঁৰ হাতত ধৰি আছে এহাল লʼৰা-ছোৱালীয়ে। তেওঁলোকৰ ভৰি দুখন প্লাষ্টিকেৰে ঢাকি থোৱা (feet covered with plastic) আছে। এই ছবিখন ছচিয়েল মিডিয়াত ভাইৰেল (Viral on social media) হৈ পৰিছে।
প্ৰচণ্ড গৰমত উত্তপ্ত পকী ৰাস্তাৰে খোজকাঢ়ি গৈ আছে তিনিটা সন্তানৰ সৈতে এগৰাকী মাতৃ। এজন সাংবাদিকে উক্ত দৃশ্য কেমেৰাত বন্দী কৰে। জানিব পৰা মতে, মহিলাগৰাকীৰ নাম ৰুক্মিণী। তিনি সন্তানৰ সৈতে মধ্যপ্ৰদেশৰ শিৱপুৰৰ (Shivpur in Madhya Pradesh) ৰাজপথত খোজকাঢ়ি গৈ আছিল তেওঁ। প্ৰচণ্ড গৰমত পকী পথত খালী ভৰিৰে খোজকাঢ়িবলৈ বহুতে সাহস নকৰে। কিন্তু ৰুক্মিণীয়ে সেই সাহস দেখুৱালে। অৱশ্যে এইটো কোৱাটো উচিত হ’ব যে পৰিস্থিতিয়ে তেওঁক এই সাহস দেখুৱাবলৈ বাধ্য কৰাইছিল।
সাংবাদিক ইনছাফ কুৰেশ্বীয়ে তোলা ছবিখন ভাইৰেল হোৱাৰ লগে লগে বহু লোকে ৰুক্মিণীক সহায় কৰিবলৈ আগ্ৰহ প্ৰকাশ কৰে। কিন্তু কুৰেশ্বীয়ে নিজেই ৰুক্মিণী আৰু তেওঁৰ লʼৰা-ছোৱালীৰ বাবে জোতাৰ ব্যৱস্থা কৰিছিল। ৰুক্মিণী চাহাৰা জনগোষ্ঠীৰ অন্তৰ্গত। স্বামী যক্ষ্মা ৰোগত আক্ৰান্ত বুলিও কয়। ফলত পৰিয়ালৰ বোজা তেওঁ কঢ়িয়াবলগা হয়। কাম পালে কৰে। সৰু ল’ৰা-ছোৱালী তিনিটাক চোৱা-চিতা কৰিবলৈ কোনো নাই। গতিকে প্ৰতিদিনে তেওঁৰ লগত লৈ কাম বিচাৰে।
গৰমৰ দিনত ৰাস্তাত প্ৰতিদিনে খালী ভৰিৰে যাত্ৰা কৰিবলগীয়া হয় ৰুক্মিণীয়ে। শিশুসকলে যাতে গৰম সহ্য কৰিব নালাগে, তাৰ বাবে ভৰিত প্লাষ্টিক লগাই দিয়ে। কুৰেশ্বিৰ এই ছবিখন প্ৰশাসনৰো ওচৰ পালেগৈ। ৰাজ্যিক মহিলা আৰু শিশু উন্নয়ন বিভাগেও হাত আগবঢ়ায়। শিৱপুৰৰ জিলা দণ্ডাধীশ শিৱম বাৰ্মাই সংবাদ মাধ্যমৰ আগত কয় যে পৰিয়ালটোৱে যাতে সকলো ধৰণৰ চৰকাৰী সা-সুবিধা পায় তাৰ ব্যৱস্থা কৰা হৈছে।