অসম ৰাজ্যিক সাংবাদিক সন্থাৰ ( New Committee of Assam State Journalists’ Association) নতুন সমিতিয়ে যোৱা ৭ মে’ত গুৱাহাটীৰ মিডিয়া ট্ৰাষ্টত অনুষ্ঠিত এক অনুষ্ঠানত দায়িত্ব গ্ৰহণ কৰে৷ সন্থাৰ মৰিগাঁও অধিবেশনত আগন্তুক তিনিবছৰীয়া কাৰ্যকালৰ বাবে নিৰ্বাচিত সভাপতি আৰু সাধাৰণ সম্পাদক ক্ৰমে জিতু শৰ্মা ৰাজখোৱা (Jeetu Sharma Rajkhowa) আৰু প্ৰদীপ ডেকা (Pradeep Deka)ৰ নেতৃত্বত নতুন সমিতিক কাৰ্য্যভাৰ অৰ্পন কৰে পুৰণি কাৰ্যনিৰ্বাহকে৷
এই উপলক্ষে বিদায়ী সভাপতি তথা পুনৰ অৰ্থাৎ চতুৰ্থ বাৰৰ বাবে সভাপতি নিৰ্বাচিত হোৱা জিতু শৰ্মা ৰাজখোৱাৰ পৌৰহিত্যত অনুষ্ঠিত সভাত বিদায়ী সাধাৰণ সম্পাদক ৰাতুল বৰাই সংগঠনটোক আজিৰ পৰ্যায়ত গঢ়ি তোলাৰ বাবে কৰা ত্যাগৰ বাবে প্ৰতিগৰাকী বিষয়ববীয়াই আন্তৰিক কৃতজ্ঞতা জ্ঞাপন কৰাৰ লগতে আজীৱন অসম ৰাজ্যিক সাংবাদিক সন্থাৰ এগৰাকী অভিভাৱক হিচাপে দায়িত্ব পালন কৰিবলৈ অনুৰোধ জনায় ৷
বিদায়ী সাধাৰণ সম্পাদক ৰাতুল বৰাই সংগঠনটোক বৰ্তমানৰ পৰ্যায়ত উপনীত কৰাৰ ক্ষেত্ৰত আন বহুকেইজনৰ লগতে কমল নাথ, জিতু কলিতা, জিতু শৰ্মা ৰাজখোৱা, প্ৰদীপ ডেকাৰ অৱদানৰ কথা উল্লেখ কৰে ৷ অসম ৰাজ্যিক সাংবাদিক সন্থাই ইণ্ডিয়ান জাৰ্ণলিষ্ট ইউনিয়নৰ স্বীকৃতি লাভ কৰাটো অতি গুৰুত্বপূৰ্ণ বুলি বৰাই মন্তব্য কৰে ৷ জাগীৰোড উচ্চতৰ মাধ্যমিক বিদ্যালয়ৰ অৱসৰপ্ৰাপ্ত অধ্যক্ষ, সাহিত্যিক ড° হৰমোহন কলিতাই নৱ নিৰ্বাচিত বিষয়ববীয়াসকলক শপতবাক্য পাঠ কৰায় ৷
ইফালে সাধাৰণ সম্পাদকৰ কাৰ্য্যভাৰ গ্ৰহণ কৰি প্ৰদীপ ডেকাই কয় যে আগন্তুক দিনত অসম ৰাজ্যিক সাংবাদিক সন্থাক শক্তিশালী কৰি তোলাৰ বাবে প্ৰতিগৰাকী সাংবাদিকৰ দিহা পৰামৰ্শেৰে পদক্ষেপ গ্ৰহণ কৰা হ’ব আৰু সাংবাদিকৰ লগতে সংবাদক্ষেত্ৰৰ বিকাশৰ বাবে কাম কৰা হ’ব৷ সাধাৰণ সম্পাদক ডেকাই মৰিগাঁও অধিবেশনখন সাফল্যমণ্ডিত কৰাৰ আঁৰত ড° হৰমোহন কলিতাৰ দৰে ব্যক্তিৰ অনন্য অৱদানৰ বাবে তেওঁক কৃতজ্ঞতা জনোৱাৰ লগতে ড° কলিতাক সভাত বিশেষ সম্বৰৰ্ধনা জনায় ৷
গুৱাহাটী মহানগৰ জিলা সাংবাদিক সন্থাৰ আতিথ্যত অনুষ্ঠিত কাৰ্য্যভাৰ গ্ৰহণ অনুষ্ঠানত ইণ্ডিয়ান জাৰ্ণেলিষ্ট ইউনিয়নৰ ৰাষ্ট্ৰীয় পৰিষদৰ সদস্য জিতু কলিতা, নৱ-নিৰ্বাচিত কাৰ্য্যকৰী সভাপতি মনোজ বৰঠাকুৰ, উপ-সভাপতি জ্যোতিৰ্ময় হাজৰিকা, সহকাৰী সম্পাদক অভিজিত দুৱৰা, শিৱসাগৰ জিলা সাংবাদিক সন্থাৰ সাধাৰণ সম্পাদক জয়জ্যোতি গগৈ, পৰাগ শইকীয়া, মৰিগাঁও জিলা সাংবাদিক সন্থাৰ সভাপতি ৰাতুল ডেকা আৰু গুৱাহাটী মহানগৰ সমিতিৰ হিলদুল গগৈয়ে নতুন সমিতিক শুভেচ্ছা আৰু দিহা পৰামৰ্শ আগবঢ়ায়৷
