মনোজ বাজপেয়ী (Manoj Bajpayee)ৰ ‘চিৰ্ফ এক বান্দা কাফি হে’ৰ (Sirf ek bandha kafi hai) ট্ৰেইলাৰে ছবিপ্ৰেমীৰ মাজত ভাল প্ৰভাৱ পেলাইছে।স্বঘোষিত ধৰ্মগুৰুজনৰ বিৰুদ্ধে উচ্চ ন্যায়ালয়ৰ অধিবক্তাৰ যুঁজ চলি আছে। নাবালিকা ধৰ্ষণৰ ন্যায় বিচাৰি আদালতৰ দ্বাৰস্থ হয় তেওঁ। ন্যায় আদায় কৰিবলৈ ধৰ্মগুৰুক জে’ললৈ পঠিয়াব পাৰিবনে? গুঞ্জন গডমেন আশাৰাম বাপুৰ (Asaram Bapu) জীৱনৰ আধাৰত নিৰ্মিত নেকি ছবিখন? ট্ৰেইলাৰ মুক্তি পোৱাৰ পিছত আশাৰামৰ অধিবক্তাই ছবিখনৰ পৰিচালক-প্ৰযোজকলৈ জাননী প্ৰেৰণ কৰে।
তেওঁ দাবী কৰে যে ছবিখন অতি আপত্তিজনক। ইয়াৰ ফলত ধৰ্মগুৰুজনৰ ভাবমূৰ্তি নষ্ট হৈছে। লগতে ছবি মুকলি কৰাত নিষেধাজ্ঞা আৰোপ কৰাৰ বাবেও আবেদন কৰে।এই ছবিখনত মনোজ বাজপেয়ীয়ে উচ্চ ন্যায়ালয়ৰ অধিবক্তা পি চি ছোলংকীৰ চৰিত্ৰত অভিনয় কৰিছে। নাবালিকাৰ যৌন নিৰ্যাতনৰ আঁৰৰ সত্য উদঙাই দিবলৈ তেওঁ দৃঢ়প্ৰতিজ্ঞ।
এজন সাধাৰণ অধিবক্তাৰ অসাধাৰণ সংগ্ৰামৰ কাহিনী হৈছে চিৰ্ফ এক বাণ্ডা কাফি হে। ৰাষ্ট্ৰীয় বঁটা বিজয়ী অভিনেতাগৰাকী এই ছবিখনতো অনবদ্য। ট্ৰেইলাৰত তেওঁৰ অভিনয়ে সমালোচকৰ প্ৰশংসা লাভ কৰে। সুখবৰ যে নিউয়ৰ্ক চলচ্চিত্ৰ মহোৎসৱত মুক্তি পাবলৈ গৈ আছে ছবিখন।
অক্টোবৰ ২০১৩। আশাৰাম বাপুকে ধৰি ৭জন লোকৰ বিৰুদ্ধে ধৰ্ষণৰ গোচৰ ৰুজু কৰিছিল চুৰাটৰ এগৰাকী মহিলাই। লগতে তেওঁক আশ্ৰমত বলপূৰ্বকভাৱে বন্দী কৰি ৰখাৰ অভিযোগ উত্থাপন কৰে। ২০১৪ চনৰ জুলাই মাহত আৰক্ষীয়ে অভিযোগনামা দাখিল কৰিছিল। চলিত বছৰত আশাৰাম বাপুক যাৱজ্জীৱন কাৰাদণ্ডৰ শাস্তি প্ৰদান কৰা হয়। বৰ্তমান ৮১ বছৰীয়া স্বঘোষিত ধৰ্মগুৰুজনৰ অস্থায়ী ঠিকনা যোধপুৰ কাৰাগাৰ।
