বিত্তীয় গৱেষক সংস্থা হিণ্ডেনবাৰ্গ ৰিচাৰ্চৰ (Hindenburg Research) অভিযোগৰ ভিত্তিত উদ্যোগপতি গৌতম আদানীৰ (Industrialist Gautam Adani) মালিকনাধীন কোম্পানীসমূহৰ বিৰুদ্ধে তদন্ত আৰম্ভ কৰিছে ভাৰতীয় ছিকিউৰিটিজ এণ্ড এক্সচেঞ্জ বোৰ্ডে (Securities and Exchange Board)। ছেবিয়ে কয় যে এই প্ৰতিবেদনৰ পিছতে শ্বেয়াৰ বজাৰৰ কাৰ্যকলাপ পৰীক্ষা কৰি আছে।
বজাৰত হেতালি খেলা আৰু বিত্তীয় জালিয়াতিৰ অভিযোগ উত্থাপন হোৱাৰ পিছতে আদানীৰ ব্যৱসায়িক সাম্ৰাজ্যই শ্বেয়াৰ বজাৰত ১০০ বিলিয়ন ডলাৰতকৈ অধিক লোকচান কৰিছে। অৱশ্যে এই অভিযোগ অস্বীকাৰ কৰি আহিছে আদানী গ্ৰুপে।
সোমবাৰে ভাৰতৰ উচ্চতম ন্যায়ালয়লৈ প্ৰেৰণ কৰা আবেদনত ছেবিয়ে কয় যে তেওঁলোকে হিণ্ডেনবাৰ্গ ৰিচাৰ্চৰ “ৰিপোৰ্ট প্ৰকাশৰ পূৰ্বে আৰু পিছত বজাৰৰ কাৰ্যকলাপ” পৰীক্ষা কৰি আছে আৰু অভিযোগসমূহ বিশ্লেষণ কৰি আছে।
ভাৰতৰ উচ্চতম ন্যায়ালয়ত দিয়া আবেদনত ছেবিয়ে কয়, “চিকিউৰিটিজ বজাৰৰ সুস্থিৰ কাৰ্যকলাপ আৰু উন্নয়নৰ বাবে নিয়ন্ত্ৰণ আন্তঃগাঁথনি স্থাপন কৰিবলৈ ছেবি দৃঢ়প্ৰতিজ্ঞ আৰু পৰ্যাপ্তভাৱে ক্ষমতাপ্ৰাপ্ত।”