মুখ্যমন্ত্ৰী ড° হিমন্ত বিশ্ব শৰ্মাৰ অধ্যক্ষতাত অনুষ্ঠিত ৰাজ্যিক কেবিনেট বৈঠকত আজি কেইবাটাও গুৰুত্বপূৰ্ণ সিদ্ধান্ত গ্ৰহণ কৰা হয়। বৈঠকত ২০২৫ বৰ্ষৰ অসম বৈভৱ, অসম সৌৰভ আৰু অসম গৌৰৱ বঁটা প্ৰাপকৰ নামত অনুমোদন জনোৱা হয়। বিশেষ বাছনি প্ৰক্ৰিয়াৰ জৰিয়তে এই বঁটাপ্ৰাপকসকলক নিৰ্বাচন কৰা হৈছে বুলি মুখ্যমন্ত্ৰীয়ে জানিবলৈ দিয়ে।
২০২৫ বৰ্ষৰ অসম বৈভৱ বঁটাৰ বাবে ড° হৰ্ষ ভট্টাচাৰ্যক নিৰ্বাচিত কৰা হৈছে।
আনহাতে, অসম সৌৰভ বঁটাৰ বাবে নিৰ্বাচিত হৈছে ড° কুশল কোঁৱৰ শৰ্মা, পদ্মশ্ৰী নুৰুদ্দিন আহমেদ, পুলক বেনাৰ্জী আৰু ড° পূৰ্ণিমা দেৱী বৰ্মন।
অসম গৌৰৱ বঁটাৰ বাবে নিৰ্বাচিত ব্যক্তিসকল হৈছে দেৱী প্ৰসাদ বাগৰদিয়া, হলিচৰণ নাৰ্জাৰী, চিমু দাস, হৰকান্ত বসুমতাৰী, ধনজিৎ তালুকদাৰ, নিবেদিতা ইয়েং, মায়ং চক্ৰৱৰ্তী, জিতেন সাৰেংফাংচা, তনুমায়া সোণাৰ বিশ্বকৰ্মা আৰু দীপাল লাহন।
ইয়াৰ উপৰি কলং-কপিলী নামৰ স্বেচ্ছাসেৱী সংগঠন আৰু গোলাঘাটৰ পদুম পথাৰ এগ্ৰ’ অৰ্গেনিক কোম্পানীকো অসম গৌৰৱ বঁটাৰ বাবে নিৰ্বাচিত কৰা হৈছে।
মুখ্যমন্ত্ৰীয়ে প্ৰকাশ কৰা অনুসৰি, ২০২৫ বৰ্ষৰ এই বঁটাসমূহ অহা ডিচেম্বৰ মাহত প্ৰদান কৰা হ’ব।
ড° ভূপেন হাজৰিকাৰ নামত নতুন ৰাষ্ট্ৰীয় বঁটা
আজিৰ কেবিনেট বৈঠকৰ আন এক গুৰুত্বপূৰ্ণ সিদ্ধান্ত অনুসৰি ভাৰতৰত্ন ড° ভূপেন হাজৰিকাৰ নামত প্ৰতি তিনি বছৰৰ মূৰে মূৰে ৰাষ্ট্ৰীয় বঁটা প্ৰদান কৰা হ’ব। প্ৰথমবাৰৰ বাবে এই বঁটা আগবঢ়োৱা হ’ব বিশিষ্ট কণ্ঠশিল্পী উষা মংগেশকাৰলৈ। বঁটাৰ সৈতে থাকিব নগদ ১০ লাখ টকা।
অহা ২৯ নৱেম্বৰত নতুন দিল্লীৰ ভাৰত মণ্ডপমত অনুষ্ঠিত হ’ব ড° ভূপেন হাজৰিকাৰ জন্মশতবৰ্ষ উদযাপনৰ সামৰণি অনুষ্ঠান। প্ৰধানমন্ত্ৰী নৰেন্দ্ৰ মোদী উপস্থিত থাকিবলগীয়া এই অনুষ্ঠানতে উষা মংগেশকাৰক ৰাষ্ট্ৰীয় বঁটা প্ৰদান কৰা হ’ব।
অনুষ্ঠানত কেন্দ্ৰীয় মন্ত্ৰী, সাংসদ আৰু বিভিন্ন ৰাজ্যৰ মুখ্যমন্ত্ৰীসকলো উপস্থিত থকাৰ কথা।
প্ৰায় দুঘণ্টীয়া এই অনুষ্ঠানৰ ভিতৰত এঘণ্টা পোন্ধৰ মিনিটৰ বিশেষ সংগীতানুষ্ঠান অনুষ্ঠিত হ’ব। শ্ৰেয়া ঘোষালসহ দেশৰ কেইবাগৰাকীও বিশিষ্ট কণ্ঠশিল্পীয়ে অংশগ্ৰহণ কৰিব। অসমৰ পৰাও প্ৰায় এহেজাৰ শিল্পী নতুন দিল্লীলৈ যাব। অনুষ্ঠানত ড° ভূপেন হাজৰিকাৰ কালজয়ী গীত ‘মানুহে মানুহৰ বাবে’ আৰু ‘We Are in the Same Boat, Brother’ পৰিৱেশন কৰা হ’ব।
ইপিনে, শ্ৰীমন্ত শংকৰদেৱ বঁটাৰ নগদ ধনৰ পৰিমাণ বৃদ্ধি কৰি ১৫ লাখ টকা কৰাৰো সিদ্ধান্ত গ্ৰহণ কৰে ৰাজ্যিক কেবিনেটে।
ৰঙিয়াত ৩০০ কোটি টকীয়া উদ্যোগ, ৩০০ লোকৰ সংস্থাপনৰ সম্ভাৱনা
ৰাজ্যৰ ঔদ্যোগিক বিকাশৰ ক্ষেত্ৰতো কেবিনেটে এক গুৰুত্বপূৰ্ণ সিদ্ধান্ত গ্ৰহণ কৰিছে। কামৰূপ জিলাৰ ৰঙিয়াত চিনটেক্সে প্ৰায় ৩০০ কোটি টকা বিনিয়োগেৰে এটা নতুন উদ্যোগ স্থাপন কৰিব। এই উদ্যোগত প্ৰায় ৩০০ লোকৰ সংস্থাপনৰ সম্ভাৱনা আছে বুলি মুখ্যমন্ত্ৰীয়ে জানিবলৈ দিয়ে।
আনহাতে, অসমৰ খনিজ পদাৰ্থ নিয়ন্ত্ৰণ আৰু ডিলাৰ সম্পৰ্কীয় বিধি সংশোধনৰ সিদ্ধান্তও গ্ৰহণ কৰা হৈছে। বিশেষকৈ চূণশিলৰ গুণগত মানৰ ভিত্তিত বিভিন্ন শ্ৰেণী নিৰ্ধাৰণ কৰি সেই অনুসৰি ৰয়েল্টীৰ হাৰ পৃথক কৰাৰ ব্যৱস্থা গ্ৰহণ কৰা হ’ব।
নৱেম্বৰত মিচিং আৰু সোণোৱাল কছাৰী স্বায়ত্তশাসিত পৰিষদৰ নিৰ্বাচন
মিচিং আৰু সোণোৱাল কছাৰী স্বায়ত্তশাসিত পৰিষদৰ নিৰ্বাচন অনুষ্ঠিত কৰাৰ ক্ষেত্ৰতো কেবিনেটে গুৰুত্বপূৰ্ণ সিদ্ধান্ত গ্ৰহণ কৰিছে। দুয়োখন পৰিষদৰ নিৰ্বাচনী বিধি সংশোধনত অনুমোদন জনোৱা হৈছে।
অহা নৱেম্বৰ মাহত দুয়োখন স্বায়ত্তশাসিত পৰিষদৰ নিৰ্বাচন অনুষ্ঠিত কৰাৰ লক্ষ্যৰেই এই পদক্ষেপ গ্ৰহণ কৰা হৈছে বুলি মুখ্যমন্ত্ৰীয়ে প্ৰকাশ কৰে।
এনেদৰে ৰাজ্যৰ সৰ্বোচ্চ অসামৰিক সন্মান, সাংস্কৃতিক ঐতিহ্য সংৰক্ষণ, ঔদ্যোগিক বিনিয়োগ আৰু স্বায়ত্তশাসিত পৰিষদৰ নিৰ্বাচনকে ধৰি কেইবাটাও গুৰুত্বপূৰ্ণ বিষয়ত আজিৰ কেবিনেট বৈঠকে সিদ্ধান্ত গ্ৰহণ কৰে।
