নীলমণি সেন ডেকাৰ হেট স্পীচঃ দিশপুৰ থানাত এজাহাৰ বাঙালী নাগৰিক সমাজৰ

ASSAM TIMES POST
গুৱাহাটীঃ কেইদিনমান পূৰ্বে প্ৰাক্তন মন্ত্ৰী তথা কংগ্ৰেছৰ জ্যেষ্ঠ নেতা নীলমণি সেন ডেকাই কৰা মন্তব্যত জাঙুৰ খাই উঠিছে ৰাজ্যৰ বাঙালী সমাজ। ডেকাই কৰা মন্তব্যই অসমীয়া আৰু বাঙালী মানুহৰ মাজত ব্যৱধান সৃষ্টি কৰিব বুলি সম্ভাৱনা ব্যক্ত কৰি বৃহস্পতিবাৰে তেওঁৰ বিৰুদ্ধে গুৱাহাটীৰ দিশপুৰ আৰক্ষী থানাত এখন এজাহাৰ দাখিল কৰে সদৌ অসম বাঙালী নাগৰিক সমাজে। এই সম্পৰ্কত সমাজৰ সভাপতি খগেন বৈশ্য আৰু সম্পাদক নিবাস চন্দ্ৰ দেবে কয় যে অসমত বাঙালী লোকসকলে ভিন্ন জাতি, ধৰ্ম, বৰ্ণ নিৰ্বিশেষে সকলোৰে সৈতে অতি সম্প্ৰীতি আৰু ভাতৃত্ববোধেৰে যুগ যুগ ধৰি বসবাস কৰি আহিছে। ইয়াৰ বিপৰীতে প্ৰাক্তন মন্ত্ৰীজনে ৰাজনৈতিক লাভালাভৰ বাবেই সাম্প্ৰদায়িক মন্তব্য কৰিছে। ইয়াৰ পৰিপ্ৰেক্ষিততে সমাজে দিশপুৰ থানাৰ ভাৰপ্ৰাপ্ত আৰক্ষী বিষয়াক এজাহাৰ দাখিল কৰি ডেকাক ভাৰতীয় দণ্ডবিধি আইনৰ অধীনত শাস্তি প্ৰদানৰ দাবী জনায়।