প্ৰধানমন্ত্ৰী নৰেন্দ্ৰ মোদীক (Prime Minister Narendra Modi) সমালোচনাৰ পাত্ৰ কৰি প্ৰস্তুত কৰা বিবিচিৰ তথ্যচিত্ৰত(BBC documentary) ইতিমধ্যে নিষেধাজ্ঞা প্ৰদান কৰিছে ভাৰত চৰকাৰে। তথ্য চিত্ৰৰ অংশ শ্বেয়াৰ কৰা টুইটকে আদি কৰি তথ্য চিত্ৰৰ ইউটিউব লিংক বিতৰণ কৰা টুইটবোৰ ব্লক কৰা হৈছে। এই সন্দৰ্ভত জাৰি কৰা দেশৰ তথ্য আৰু সম্প্ৰচাৰ মন্ত্ৰণালয়ৰ নিৰ্দেশনাত সকলোবোৰ ভিডিঅ’ ব্লক কৰাৰ নিৰ্দেশ প্ৰদান কৰা হৈছে।
উল্লেখ্য যে, বিবিচিয়ে প্ৰস্তুত কৰা আৰু ব্ৰিটিছ ব্ৰডকাষ্টিং কৰ্পোৰেচনৰ দ্বাৰা প্ৰযোজিত তথ্যচিত্ৰ “ইণ্ডিয়াঃ দ্য মোদী কোৱেশ্যন” ৰ ভিডিঅ’ লিংক সন্নিৱিষ্ট ৫০ টাতকৈ অধিক টুইট ব্লক কৰাৰ নিৰ্দেশনা দিয়ে। তথ্য আৰু সম্প্ৰচাৰ মন্ত্ৰণালয়ৰ সচিবে তথ্য প্ৰযুক্তি নিয়ম, ২০২১-ৰ অধীনত জৰুৰীকালীন ক্ষমতা ব্যৱহাৰ কৰি এই নিৰ্দেশনা জাৰি কৰাৰ পিছতেই ইউটিউব আৰু টুইটাৰে ইয়াৰ পালন কৰে।
তথ্য আৰু সম্প্ৰচাৰ মন্ত্ৰালয়ে বি বি চিৰ তথ্যচিত্ৰখনৰ সন্দৰ্ভত মন্তব্য কৰি কয় যে, “বিবিচিয়ে তথ্যচিত্ৰখন ভাৰতত মুকলি কৰা নাছিল যদিও একাংশ ইউটিউব চেনেলে এই তথ্য চিত্ৰখন আপলোড কৰিছে। ভাৰত বিৰোধী কাৰ্যসূচীৰ বাবেই এই তথ্যচিত্ৰখন প্ৰচাৰৰ বাবে আপলোড কৰা হৈছে যেন লাগিছে।”
আনহাতে, নিৰ্ভৰযোগ্য সূত্ৰই বৈদেশিক পৰিক্ৰমা মন্ত্ৰালয়কে ধৰি গৃহ আৰু তথ্য সম্প্ৰচাৰ মন্ত্ৰালয়ৰ জ্যেষ্ঠ বিষয়াসকলে তথ্যচিত্ৰখন পৰীক্ষা কৰিছিল আৰু দেখিছিল যে ছবিখনৰ জৰিয়তে প্ৰধানমন্ত্ৰী নৰেন্দ্ৰ মোডীক অপবাদ দিয়াৰ এক প্ৰয়াস কৰিছে বুলি মন্তব্য কৰে। ইয়াৰ সমান্তৰালকৈ, তথ্যচিত্ৰখনে ভাৰতৰ সাৰ্বভৌমত্ব আৰু অখণ্ডতা হ্ৰাস কৰিব আৰু দেশৰ ভিতৰত ৰাজহুৱা শৃংখলাৰ লগতে বিদেশী দেশৰ সৈতে ভাৰতৰ বন্ধুত্বপূৰ্ণ সম্পৰ্কত বিৰূপ প্ৰভাৱ পেলাব বুলিও ধাৰণা কৰা হৈছে।
