২০২১ ইং বৰ্ষৰ ৪ ছেপ্টেম্বৰত নতুন দিল্লীত কেন্দ্ৰীয় চৰকাৰ, ৰাজ্য চৰকাৰ আৰু কাৰবি আংলং জিলাৰ ছয় সহস্ৰ উগ্ৰপন্থী সংগঠনৰ মাজত স্বাক্ষৰিত হোৱা কাৰবি শান্তি চুক্তিৰ পিছত বিজেপিয়ে পাৰ্বত্য জিলা দুখনত স্থায়ী শান্তি ঘূৰি আহিছে বুলি দাবী কৰিলেও জিলা দুখনৰ দল সংগঠনে স্বাক্ষৰিত হোৱা কাৰবি শান্তি চুক্তিৰ দফা ২, ৩ৰ জৰিয়তে জিলাখনৰ ষষ্ঠ অনুসূচীক উলংঘা কৰিছে বুলি অসন্তুষ্টি প্ৰকাশ কৰি আহিছে। পাৰ্বত্য জিলা দুখনৰ কেইবাটাও সামাজিক সংগঠনৰ উমৈহতীয়া মঞ্চ ‘দ্যা জইণ্ট ক’অৰ্ডিনেছন কমিটি প্ৰটেকশ্যন অফ অট’নমি’ চমুকৈ ‘জেচিচিপি’য়ে এইলৈ আজি ডিফুৰ আইটিআইস্থিত হংফাৰলাত এক সংবাদমেল অনুষ্ঠিত কৰি নিজৰ অসন্তুষ্ঠি ব্যক্ত কৰে।
জেচিচিপিৰ অন্যতম শীৰ্ষ নেতা খৰছিং টেৰণে সাংবাদিকসকলক সম্বোধন কৰি কয় যে, ২০২১ চনৰ ৪ ছেপ্টেম্বৰত স্বাক্ষৰিত হোৱা কাৰবি শান্তি চুক্তিৰ ২, ৩ নং দফা অনুসৰি কাৰবি আংলঙৰ ১০টা আসন সকলোৰে বাবে মুক্ত বুলি ৰখা সুবিধা ষষ্ঠ অনুসূচীৰ অপৰিপন্থী। সেয়ে উক্ত চুক্তিৰ অংশীদাৰ সকলক মাতি পুনৰ উক্ত চুক্তিৰ ২, ৩নং দফাৰ পুনৰবিবেচনা কৰিব লাগে বুলি দাবী উত্থাপন কৰে।
আনহাতে ১৯৫০ চনতে আয়োগ গঠন কৰি কাৰবি আংলঙৰ সীমা নিৰ্ধাৰণ কৰি দিয়া হৈছিল সেই ধৰণে কাৰবি আংলঙৰ সীমা অক্ষুণ্ণ থাকিব লাগে বুলি দাবী কৰে। চলিত বছৰৰ ২৯ মাৰ্চত নতুন দিল্লীত প্ৰথম পৰ্যায়ত ছয় বিবাদমান স্থানকলৈ আলোচনা হোৱাৰ পিছত দ্বিতীয় পৰ্যায়ত অসম-মেঘালয় সীমান্তৰ চাৰিটাকৈ বিবাদমান অঞ্চল ক্ৰমে, ব্লক ১, ব্লক ২, খান্দুলী আৰু পিচিআৰকলৈ মেঘালয় আৰু অসমৰ মুখ্যমন্ত্ৰীৰূপে মাজত আলোচনাত অনুষ্ঠিত হোৱাৰ কথা আছে। এই সন্দৰ্ভত সংবাদমেলত আজি জেচিচিপিৰ নেতা ৰবীন্দ্ৰ ৰংপিৰ, ছয়ছিং ৰংপি আৰু খৰছিং টেৰণে কয় যে, উল্লেখিত চাৰিটা স্থান কাৰবি আংলঙ জিলাৰ ভৌগলিক সীমাৰ ভিতৰত আছে এই চাৰিটা স্থানত মেঘালয়ৰ অধিকাৰ নাই। সেয়ে উক্ত স্থান চাৰিটাক লৈ মেঘালয় চৰকাৰে একো আপত্তি কৰিব নোৱাৰে।
দুয়োখন চৰকাৰৰ ‘দিয়া লোৱা’ নীতিৰ ভিতৰত কাৰবি আংলঙৰ ভূমিখণ্ড পৰিব নালাগে। কাৰবি আংলঙৰ কোনো ভূমি মেঘালয়ক গতাই দিব নালাগে লগতে মেঘালয়ৰ ভূমিও কাৰবি আংলঙৰ নালাগে বুলি কয় নেতা সকলে। এইলৈ জেচিচিপিৰ এক সঁজাতি দলে কাৰবি আংলং স্বায়ত্তশাসিত পৰিষদৰ মুখ্য কাৰ্যবাহী সদস্য ডা: তুলিৰাম ৰংহাঙক এক দাবী সম্বলিত স্মাৰকপত্ৰ অৰ্পণ কৰা বুলিও অৱগত কৰে জেচিচিপিৰ নেতাসকলে। বিষয় দুটা বিবেচনাৰ আওতালৈ আনি শীঘ্ৰে বিষয়দুটাকলৈ সংশ্লিষ্ট অংশীদাৰ সকলক লৈ পুনৰীক্ষণ কৰি চুক্তিৰ দফা ২,৩ৰ পুনৰীক্ষণ কৰা, পৰিষদৰ বিশেষ অধিৱেষণ পাতি সীমা বিবাদ সন্দৰ্ভত সিদ্ধান্ত গ্ৰহণ কৰা, এই সন্দৰ্ভত সৰ্বদলীয় বৈঠক আহ্বান কৰা।
আনহাতে জেচিচিপিৰ এটা সঁজাতি দলে অতি শীঘ্ৰে বিষয় দুটাকলৈ অসমৰ মুখ্যমনেত্ৰীৰো কাষ চাপিব বুলি সংবাদমেলত সদৰি কৰে জেচিচিপয়ে।
