প্ৰতি ঘণ্টাত ১৮ টা, প্ৰতিদিনে গড়ে ৪২৬ জন। এক পৰিসংখ্যা মতে, ২০২১ চনত দেশত পথ দুৰ্ঘটনাৰ ফলত হোৱা মৃত্যুৰ হাৰ এতিয়ালৈকে সৰ্বাধিক। এবছৰত ডেৰ লাখতকৈ অধিক লোকৰ মৃত্যু হয়।গৃহ মন্ত্ৰালয়ৰ অধীনস্থ ৰাষ্ট্ৰীয় অপৰাধ ৰেকৰ্ড ব্যুৰোৱে ‘ভাৰতত দুৰ্ঘটনাগ্ৰস্ত মৃত্যু আৰু আত্মহত্যা, ২০২১’ শীৰ্ষক প্ৰতিবেদন প্ৰকাশ কৰিছে।
ইয়াত উল্লেখ কৰা হৈছে যে যোৱা বছৰ সমগ্ৰ দেশতে ৪.০৩ লাখ পথ দুৰ্ঘটনা সংঘটিত হৈছিল। আহত হৈছে ৩.৭১ লাখ লোক। মৃত্যুৰ সংখ্যা ১.৫৫ লাখৰো অধিক। ২০২১ চনত প্ৰতি হাজাৰ বাহনত দুৰ্ঘটনাগ্ৰস্ত মৃত্যুৰ হাৰ আছিল ০.৫৩। যিটো ২০২০ (০.৪৫) আৰু ২০১৯ (০.৫২)তকৈ অধিক। কিন্তু ২০১৮ (০.৫৬) আৰু ২০১৭ (০.৫৯)তকৈ কম।
প্ৰতিবেদন অনুসৰি, “পথ দুৰ্ঘটনাত সাধাৰণতে মৃত্যুতকৈ অধিক আঘাতপ্ৰাপ্ত হয়। কিন্তু মিজোৰাম, পঞ্জাব, ঝাৰখণ্ড আৰু উত্তৰ প্ৰদেশত আঘাতপ্ৰাপ্ত হোৱাতকৈ মৃত্যুৰ সংখ্যা বেছি।” দেখা গৈছে যে পঞ্জাবত ৬০৯৭টা পথ দুৰ্ঘটনাত ৪৫১৬ জন লোকৰ মৃত্যু, আহত হৈছে ৩০৩৪ জন। ঝাৰখণ্ডত ৪৭২৮টা দুৰ্ঘটনাত ৩৫১৩জনৰ মৃত্যু আৰু আহত ৩২২৭জন। উত্তৰ প্ৰদেশত ৩৩,৭১১টা দুৰ্ঘটনাত ২১,৭৯২ জন লোকৰ মৃত্যু হোৱাৰ লগতে আহত হৈছে ১৯,৮১৩ জন লোক।
বিগত বৰ্ষৰ পৰিসংখ্যা অনুসৰি ৫৯.৭ শতাংশ দুৰ্ঘটনা অতিৰিক্ত গতিৰ বাবেই সংঘটিত হৈছে।
তাৰ ফলত মৃত্যু হৈছে ৮৭,০৫০ জনৰ। লগতে আহত হৈছে ২.২৮ লাখ লোক। ২৫.৭ শতাংশ দুৰ্ঘটনা সংঘটিত হৈছিল অসাৱধানতাৰে গাড়ী চলোৱাৰ বাবে। ইয়াত ৪২,৮৫৩ জন লোকৰ মৃত্যু হয়। আহত হৈছে ৯১,৮৯৩ জন লোক। খবৰ পোৱা গৈছিল যে বেয়া বতৰৰ বাবেও মাত্ৰ ২.৮ শতাংশ দুৰ্ঘটনা সংঘটিত হৈছে।
প্ৰতিবেদনত বিশেষভাৱে উল্লেখ কৰা হৈছে যে মটৰবাইকৰ দৰে ব্যক্তিগত পৰিবহণতকৈ বাছৰ দৰে ৰাজহুৱা পৰিবহণ সুৰক্ষিত। দেখা গৈছে যে দুৰ্ঘটনাত মৃত্যু হোৱা মুঠ লোকৰ ভিতৰত ৪৪.৫ শতাংশই দুচকীয়া বাহন চলাইছিল। ইয়াৰ উপৰি ১৫.১ শতাংশ গাড়ী, ৯.৪ শতাংশ ট্ৰাক আৰু ৩ শতাংশ বাছ। লগতে জনা যায় যে মুঠ দুৰ্ঘটনাৰ ৫৯.৭ শতাংশ (২.৪ লাখ ঘটনা) গ্ৰাম্য অঞ্চলত আৰু ৪০.৩ শতাংশ (১.৬২ লাখ ঘটনা) চহৰ অঞ্চলত।