ASSAM TIMES POST
নতুন দিল্লীঃ উচ্চতম ন্যায়ালয়ে শীঘ্ৰেই ৰাম জন্মভূমি-বাবৰি মছজিদ সম্পৰ্কীয় গোচৰৰ ৰায় প্ৰদান কৰিব। ইয়াৰ পৰিপ্ৰেক্ষিতত ইতিমধ্যে উত্তৰ প্ৰদেশত পানী নসৰকা নিৰাপত্তা ব্যৱস্থা গঢ়ি তোলা হৈছে। তাৰ মাজতে ৰাজ্যখনৰ মুখ্যমন্ত্ৰী যোগী আদিত্যনাথে তেওঁৰ মন্ত্ৰীসভালৈ নিৰ্দেশনা আগবঢ়াইছে। নিৰ্দেশনাটোত মুখ্যমন্ত্ৰীজনে মন্ত্ৰীসকলক সৰ্বোচ্চ ন্যায়ালয়ৰ ৰায়ৰ পাছতে যাতে তেওঁলোকে অপ্ৰয়োজনীয় বা বিতৰ্কিত মন্তব্য প্ৰদান নকৰে সেই কথা কয়। ইয়াৰ বিপৰীতে তেওঁ মন্ত্ৰীসভাখনক ৰাজ্যখনত শান্তি আৰু ঐক্য স্থাপনত ভূমিকা গ্ৰহণ কৰিবলৈ আহ্বান জনায়। লক্ষ্ণৌস্থিত লোক ভৱনত অনুষ্ঠিত এখন বৈঠকতে মুখ্যমন্ত্ৰীজনে তেওঁৰ মন্ত্ৰী মণ্ডলীক এই কথা কয়। ইয়াৰদ্বাৰা এটা কথাই প্ৰমাণিত হয় যে উচ্চতম ন্যায়ালয়ৰ ৰায়ৰ পাছত মুখ্যমন্ত্ৰীজনে বিতৰ্কিত মন্তব্য প্ৰদান কৰাৰ সম্ভাৱনা নাই।
