ASSAM TIMES POST
গুৱাহাটীঃ ৰাজ্যৰ জনসাধাৰণে অটল অমৃত অভিযানৰ অধীনত পূৰ্বে ৬ টা ৰোগৰ ক্ষেত্ৰত সুবিধা লাভ কৰাৰ বিপৰীতে অহা ১ নৱেম্বৰৰপৰা আৰু ৬ টা ৰোগৰ ক্ষেত্ৰত এই আঁচনিৰ অধীনত সুবিধা লাভ কৰিব। বুধবাৰে জনতা ভৱনত অনুষ্ঠিত এক সংবাদমেলত এই কথা সদৰী কৰে ৰাজ্যৰ স্বাস্থ্য মন্ত্ৰী ডঃ হিমন্ত বিশ্ব শৰ্মাই। সেই অনুসৰি আইচিইউত থকা সকলো ৰোগী, সকলো ট্ৰমা জাতীয় ঘটনা, সকলো ক্ৰিটিকেল কেয়াৰ পায়েডিয়েট্ৰিকছ আৰু পায়েডিয়েট্ৰিক চাৰ্জাৰী, জাপানীজ এনকেফেলাইটিজ আৰু একিউট এনকেফেলাইটিজ লক্ষণযুক্ত ৰোগীয়ে এই ব্যৱস্থাৰ অধীনত সুবিধা লাভ কৰিব। সংবাদমেলত তেওঁ জনোৱা অনুসৰি ৰাজ্যত অটল অমৃত অভিযান আৰম্ভ হোৱাৰেপৰা ৬০ হাজাৰ জনসাধাৰণে ১৪০ কোটি টকাৰ নগদবিহীন সুবিধা লাভ কৰিছে। ইয়াৰদ্বাৰা ২৭,৪২৪ গৰাকী কৰ্কট ৰোগত আক্ৰান্ত ব্যক্তি আৰু ২০ হাজাক গৰাকী বৃক্কৰ ৰোগত আক্ৰান্ত লোক উপকৃত হৈছে।
