ASSAM TIMES POST
পশ্চিম কাৰ্বি আংলংঃ হৰিনামৰ ধ্বনিৰে মুখৰিত পশ্চিম কাৰ্বি আংলং। গুৰুজনাৰ সৃষ্টিৰাজীৰে উখল-মাখল ভক্তপ্ৰাণ ৰাইজ ।
দূৰ্গা পূজা, লক্ষ্মী পূজা আৰু কাতি বিহুৰ পাচত এইবাৰ হৰিনামৰ ধ্বনিৰে মুখৰিত পাৰ্বত্য জিলা পশ্চিম কাৰ্বি আংলং। শিশু, যুৱক তথা আইমাতৃ সকলৰ হৰিনামৰ ধ্বনিৰে পাৰ্বত্য জিলাখনৰ সকলোৰে মনত উপচাই পেলাইছে ভক্তিভাৱ।
অসমৰ ভাষা,ধৰ্ম,সাহিত্য,সংস্কৃতি আৰু অসমীয়া সামাজিক ঐতিহ্যৰ প্ৰান প্ৰতিষ্ঠাপক তথা আধ্যাত্মিক মানৱতাবাদৰ প্ৰৱক্তা,মহাপুৰুষ শ্ৰীমন্ত শঙ্কৰদেৱৰ নীতি আদৰ্শ আৰু চেতনাৰ আধাৰত প্ৰতিষ্ঠিত উত্তৰ-পূৱ ভাৰতৰ সৰ্ববৃহৎ ধৰ্মীয় অনুষ্ঠান শ্ৰীমন্ত শঙ্কৰদেৱ শংঘই গুৰুজনাৰ প্ৰচাৰিত কৃষ্টি, সংস্কৃতি আৰু সাহিত্য ৰাজি প্ৰচাৰ তথা প্ৰসাৰৰ হেতু বিভিন্ন সময়ত বিভিন্ন কাৰ্যসুচী হাতত লৈ আহিছে ।
বিশেষকৈ শিশু আৰু যুৱসমাজৰ মাজত গুৰুজনাৰ এই সৃষ্টিৰাজী প্ৰচাৰ-প্ৰসাৰৰ উদ্দেশ্যে অনুষ্ঠিত কৰি আহিছে শিশু, যুৱ আৰু আইমাতৃ সমাৰোহ। সংঘৰ হামৰেণ জিলা শাখাৰ ২০ সংখ্যক শিশু, যুৱ আৰু আইমাতৃ সমাৰোহ খনি এইবাৰ টুম্প্ৰেঙৰ ওপৰ তৰাডুবিত বৰ্ণাঢ্য দুদিনীয়া কাৰ্য্যসূচীৰে অনুস্থিত কৰা হয় ।
হামৰেণ জিলা শাখাৰ ব্যৱস্থাপনাত ওপৰ তৰাডুবি মণ্ডল সমিতিৰ আতিৰ্থত টুম্প্ৰেঙৰ ওপৰ তৰাডুবিত যোৱা ১৯ অক্টোবৰৰ পুৱা পৰিবেশ নিকাকৰণ তথা প্ৰাতঃ প্ৰসঙ্গৰে শুভাৰম্ভ কৰা সমাৰোহ খনি বৰ্ণাঢ্য কাৰ্য্যসূচীৰে দেওবাৰে সফল সামৰণি পৰে। সমাৰোহৰ লগত সঙ্গতি ৰাখি শিশু, যুৱক আৰু আইমাতৃ সকলৰ মাজত কবিতা আবৃত্তি, কুইজ, চিত্ৰাঙ্কন আদিৰ লগতে গুৰুজনাৰ সৃষ্টি দিহানাম, থিয় নাম, বিয়ানাম আদিৰো প্ৰতিযোগিতা অনুষ্ঠিত কৰা হয়।
দেওবাৰে সামৰণি দিনা পূৱা সহস্ৰাধিক শিশু, যুৱক, বাপ-বান্ধৱ, আইমাতৃ সকলো ভক্তয়ে হৰিনাম গাই গাই এক ভাগৱত ভ্ৰমণ কাৰ্যসুচীও ৰূপায়ণ কৰে। সন্ধ্যা নামাচাৰ্য মাঘেশ্বৰ পাটৰ ও সংগী বৃন্দৰ সন্ধ্যা প্ৰসঙ্গৰে অনুস্থানৰ সফল সামৰণি পৰে।
