ASSAM TIMES POST
নগাঁওঃ খাদ্য সামগ্ৰী পৰিবহনৰ নামত নগাঁও যোগান বিভাগত ৰাজহ লোকচানৰ এক ঘটনা সংঘটিত হোৱাৰ অভিযোগ উঠিছে ।জানিব পৰা মতে ৰাষ্ট্ৰীয় খাদ্য সুৰক্ষা আইনৰ অধীনত নগাঁও জিলাত সমবায় সমিতি সমূহলৈ সামগ্ৰী পৰিবহন ঠিকাৰ বাবে ২০১৮-১৯ বিত্তীয় বৰ্ষত নিবিদা নং-এন এচ জি এন ২০১৭/৫৫৬৩ অনুসৰি যি কেইটা প্ৰতিষ্ঠানক ঠিকা প্ৰদান কৰা হৈছিল সেই প্ৰতিষ্ঠান কেইটাৰ ঠিকাৰ ম্যাদ চলিতবৰ্ষৰ ৩১ মাৰ্চতে উকলি যায়।তৎসত্বেও আজি পৰ্যন্ত এই প্ৰতিষ্ঠান কেইটাই সামগ্ৰী পৰিবহনৰ কাম কৰি থকাৰ অভিযোগ উঠিছে।
যাৰ ফলত ৰাজ্য চৰকাৰে হেৰুৱাইছে প্ৰতিমাহে প্ৰায় ২০ লক্ষাধিক টকাৰ ৰাজহ।সেই হিচাপে বিগত পাঁচটা মাহত ৰাজ্য চৰকাৰে প্ৰায় এক কোটি টকাৰ ৰাজহ হেৰুৱাইছে।এই ক্ষেত্ৰত বিভাগীয় কৰ্তৃপক্ষই ন্যায়ালয়ৰ ৰায়কো গুৰুত্ব নিদিয়াৰ অভিযোগ উঠিছে।জানিব পৰামতে ২০১৯-২০ বিত্তীয় বৰ্ষৰ বাবে নগাঁও জিলা যোগান বিভাগে নিবিদা জাননী নং এন এচ জি ১/২০১৯/১২-১০ জৰিয়তে নিবিদা আহ্বান কৰিছিল।সেই অনুযায়ী বহু কেইটা ঠিকাদাৰ প্ৰতিষ্ঠানে নিবিদা দিছিল।কিন্তু কম নিৰিখত নিবিদা দি ঠিকা লাভ কৰা প্ৰতিষ্ঠান কেইটাক বঞ্চিত কৰি পূৰ্বৰ বিত্তীয় বৰ্ষত নিবিদা অনুযায়ী ঠিকা লাভ কৰা প্ৰতিষ্ঠান কেইটাকে পৰিবহনৰ ঠিকা প্ৰদান কৰি অহাৰ ফলত ৰাজ্য চৰকাৰে মাহিলি হেৰুৱাইছে প্ৰায় ২০ লাখ টকা ৰাজহ।
উল্লেখ্য,২০১৮-১৯ বৰ্ষৰ নিবিদা মৰ্মে বৰ্তমানলৈকে ঠিকা লাভ কৰি থকা প্ৰতিষ্ঠান সমূহৰ ভিতৰত দুটা উল্লেখযোগ্য প্ৰতিষ্ঠান হৈছে নিশিকা ৰ’ডলাইনচ আৰু উৎসৱ কনষ্ট্ৰাকচন।তাৎপৰ্যপূৰ্ণ যে ২০১৯-২০ বিত্তীয় বৰ্ষৰ পৰিবহন ঠিকাৰ বাবে চলিত বৰ্ষৰ জানুৱাৰী মাহত নিবিদাৰ আহ্বান কৰিছিল।সেই অনুযায়ী বহু কেইটা প্ৰতিষ্ঠানে নিবিদা দিছিল।চলিত বৰ্ষৰ ফেব্ৰুৱাৰী মাহৰ ৮ তাৰিখে সেই নিবিদা খোলাৰ কথা আছিল। কিন্তু দুই ফেব্ৰুৱাৰীৰ দিনা নিশিকা ৰ’ডলাইনচ আৰু উৎসৱ কনষ্ট্ৰাকচনকে ধৰি চাৰিটা প্ৰতিষ্ঠানে বিগত বৰ্ষৰ ঠিকাৰ ম্যাদ বঢ়াবৰ বাবে ন্যায়ালয়ত আবেদন কৰে।
কিন্তু ন্যায়ালয়ে তেওঁলোকৰ সেই আবেদন খাৰিজ কৰে।তৎসত্বেও ইয়াৰ পিছতো যোগান বিভাগে নতুন নিবিদা মুকলি নকৰি পুৰণা নিবিদা অনুযায়ীয়েই ২০১৮-১৯ বিত্তীয় বৰ্ষৰ প্ৰতিষ্ঠানকে ঠিকা দি তাৰিখ পিছুৱাই থাকে।ইয়াৰ পিছতে নিৰ্বাচনী অধিসূচনা জাৰি হোৱাৰ আলম লৈ ২০১৯-২০ বিত্তীয় বৰ্ষৰ নিবিদাৰ ফলাফল ঘোষনা নকৰিলে বিভাগীয় কৰ্তৃপক্ষই।অৱশ্যে চলিত বৰ্ষৰ ১৮ জুনত বিভাগীয় কৰ্তৃপক্ষই তথ্যপাতি চাই ২০১৯-২০ বৰ্ষত নিবিদা দিয়া প্ৰতিষ্ঠান সমূহৰ এখন তালিকা প্ৰকাশ কৰে।কিন্তু ১৫ জুলাইত নিশিকা ৰ’ডলাইনচ নামৰ প্ৰতিষ্ঠানটোৱে গুৱাহাটীৰ উচ্চ ন্যায়ালয়ত এখন লেখ আবেদন দাখিল কৰে।
ন্যায়ালয়ে ২৪ জুলাইত তেওঁলোকৰ সেই আবেদনৰ ৰায় হিচাপে দুটা বিশেষ প্ৰতিষ্ঠানক বাদ দি অন্য প্ৰতিষ্ঠান সমূহৰ নিবিদা প্ৰক্ৰিয়া আগুৱাই নিয়াৰ নিৰ্দেশ দিয়ে।ইয়াৰ মাজতে ৫ আগষ্টত উৎসৱ কনষ্টাকচন নামৰ আন এক প্ৰতিষ্ঠানে গুৱাহাটী উচ্চ ন্যায়ালয়ত আন এক গোচৰ তৰে।ইপিনে ৮ আগষ্টত ২০১৯-২০ বিত্তীয় বৰ্ষৰ নিবিদা অনুযায়ী ঠিকা লাভ কৰা প্ৰতিষ্ঠান সমূহত যোগান বিভাগে কাম কৰাৰ অনুমতি প্ৰদান কৰিছিল।কিন্তু ৫ আগষ্টৰ গোচৰৰ ৰায় মৰ্মে আদালতে বিভাগৰ সেই নিৰ্দেশৰ স্হগিতাদেশ জাৰি কৰে।তাৰ পিচত ২ ছেপ্টেম্বৰত ২০১৯-২০ বিত্তীয় বৰ্ষত নিবিদা অনুযায়ী ঠিকা লাভ কৰা প্ৰতিষ্ঠান সমূহে আদালতত গোচৰ তৰে।সেই গোচৰৰ ৰায় মৰ্মে আদালতে কোনো ধৰণৰ পলম নকৰাকৈ নতুনকৈ নিবিদাৰ জৰিয়তে পৰিবহন ঠিকা লাভ কৰা প্ৰতিষ্ঠান সমূহক ঠিকা প্ৰদান কৰিবলৈ নিৰ্দেশ দিয়ে।
কিন্তু আদালত ৰায়ক গুৰুত্ব নিদি নগাঁও জিলা যোগান বিভাগে আজি পৰ্যন্ত ২০১৯-২০ বিত্তীয় বৰ্ষৰ নিবিদা অনুযায়ী ঠিকা লাভ কৰা প্ৰতিষ্ঠান সমূহক ঠিকা প্ৰদান নকৰি ২০১৮-১৯ বিত্তীয় বৰ্ষৰ নিবিদা অনুযায়ী ঠিকা লাভ কৰা প্ৰতিষ্ঠান সমূহকে কাম কৰি যোৱাৰ সুবিধা প্ৰদান কৰিছে।অভিযোগ মতে ২০১৮-১৯ বিত্তীয় বৰ্ষত প্ৰতিষ্ঠান সমূহে উচ্চ নিৰিখত নিবিদা দিছিল।
২০১৯-২০ বৰ্ষত কম নিৰিখত নিবিদা দিছিল বহু কেইটা প্ৰতিষ্ঠানে। নিবিদাৰ নিৰিখ প্ৰতি কুইন্টল চাউল তথা সামগ্ৰীৰ বিপৰীতে ২৯ ৰ পৰা ১৬ টকা পৰ্যন্ত পাৰ্থক্য আছে।অৰ্থ্যাৎ ২০১৮-১৯ বৰ্ষতকৈ ২০১৯-২০ বৰ্ষত নিবিদাৰ নিৰিখ কম। এনে অৱস্থাত পুৰনা নিবিদা অনুযায়ী পৰিবহনৰ ঠিকাৰ কাম চলি থকাত চৰকাৰে মাহে প্ৰায় ২০ লাখ টকা ৰাজহ হেৰুৱাব লগা হৈছে ।
