“হাওৰঘাটত আৰু বোকাজানক জিলা ঘোষণা হ’লে ধনশিৰিক মহকুমা হিচাপে ঘোষণা কৰা হ’ব বুলি মুখ্য কাৰ্যবহীগৰাকীয়ে লগতে কয়৷”
কাৰ্বি আংলং স্বায়ত্বশাসিত পৰিসদৰ ধনশিৰি পৰিষদীয় সমষ্টিত আজি একেদিনাই সাতখনকৈ চৰকাৰী আঁচনিৰ শুভ উদ্বোধন কৰে কাৰ্বি আংলং স্বায়ত্বশাসিত পৰিসদৰ মুখ্য কাৰ্যবাহী সদস্য তুলিৰাম ৰংহাঙে ৷
মুখ্য কাৰ্যবহী সদস্যগৰাকীয়ে আজি বিশেষ পেকেজৰ পুঁজিৰে ধনশিৰিত নিৰ্মাণ সম্পূৰ্ণ কৰা মিনি ষ্টেডিয়াম, বন বিভাগৰ পৰিদৰ্শন বাংলো, ধনশিৰি নগৰ সমিতিৰ ভৱন, বালুনাল্লাত মুকলি মঞ্চ, ধনশিৰি হাইস্কুলত অতিৰিক্ত শ্ৰেণীকোঠা আৰু ধনশিৰি বজাৰত জলজীৱন মিশ্যনৰ এখন আঁচনিৰ শুভাৰম্ভ কৰাৰ বিপৰীতে মিছিবাইলামত নিৰ্মাণ হ’বলগীয়া এখন পকী দলঙৰ আধাৰশিলা স্থাপন কৰে ৷
আঁচনিসমূহৰ শুভ উদেদ্বাধন কৰি মুখ্য কাৰ্যবাহীগৰাকীয়ে ধনশিৰিত এখনি ৰাজহুৱা সভাতো অংশগ্ৰহণ কৰে ৷ সভাখনত মুখ্য অতিথি হিচাপে উপস্থিত থাকি প্ৰদান কৰা ভাষণত মুখ্য কাৰ্যবহীগৰাকীয়ে বিজেপি চৰকাৰে ৰূপায়ন কৰা বিভিন্ন উন্নয়নমূলক আঁচনিসমূহ সম্পৰ্কে সবিস্তাৰে ব্যাখ্যা আগবঢ়ায় ৷
আনহাতে, সাংবাদিকৰে হোৱা বাৰ্তালাপত মুখ্য কৰ্যবাহীগৰাকীয়ে এম অ’ এছ চুক্তিত উল্লেখ থকা অনুসৰি কাৰ্বি আংলং স্বায়ত্বশাসিত পৰিষদৰ অধীনত হাওৰাঘাট আৰু বোকাজানক অতি শীঘ্ৰে জিলা হিচাপে ঘোষণা কৰা হ’ব বুলি সদৰি কৰে ৷
