ডিফু, ৯ অক্টোবৰ:– কাৰবি আংলঙৰ মনমোহা আৰু প্ৰাকৃতিক সৌন্দৰ্যৰে ভৰপুৰ পৰ্যটন থলী সমূহৰ গৰিমা বৰ্দ্ধনৰ বাবে অহা ১১ আৰু ১২ অক্টোবৰত দুদিনীয়া কাৰ্যসূচীলৈ কাৰবি আংলং জিলাৰ অন্যতম পৰ্যটন থলী শিলভেটাত চেৰিটি মটৰ চাইকেল ইভেণ্ট অনুষ্ঠিত কৰা হ’ব ৷ এই সন্দৰ্ভত আজি জিলা প্ৰেছ ক্লাবত এক সংবাদ মেলৰ আয়োজন কৰি এই কথা অৱগত কৰে কাৰবি আংলং মটক চাইকেল ক্লাৱৰ প্ৰতিষ্ঠাপক সভাপতি নকচাৰ কাথাৰ আৰু সম্পাদক ইৰাজ ইংতিয়ে ৷ দুয়োগৰাকী বাইকাৰ নেতাই সংবাদ মাধ্যমক জানিবলৈ দিয়া অনুসৰি অহা ১১ আৰু ১২ অক্টোবৰত কাৰবি আংলং মটৰ চাইকেল ক্লাবৰ উদ্যোগত শিলভেটাত অনুষ্ঠিত হবলগীয়া চেৰিটি ইভেণ্টত উত্তৰ- পূৰ্বাঞ্চলৰ লগতে দেশ বিদেশৰ প্ৰায় ১৫০ মটৰ চাইক্লিষ্ট ৰাইডাৰে অংশ গ্ৰহণ কৰিব ৷ ইয়াত থাকিব মিজোৰাম,নাগালেণ্ড, মণিপুৰ, ত্ৰিপুৰা,মেঘালয়, ছিকিম, অসম, অৰুণাচল আৰু বিদেশৰ নেপাল আৰু ভূটানৰ অংশ গ্ৰহণো উল্লেখযোগ্য ৷ উক্ত ইভেণ্টৰ শুভ উদ্ধোধন কৰিব কাৰবি আংলং স্বায়ত্ত শাসিত পৰিষদৰ মুখ্য কাৰ্যবাহী সদস্য তুলিৰাম ৰংহাঙে ৷ ইয়াৰোপৰি সম্মানীয় আৰু বিশিষ্ট অতিথি হিচাপে থাকিব জিলা উপায়ুক্ত মুকুল কুমাৰ শইকীয়া আৰু জিলা পৰ্যটন বিষয়া লগতে গণ্য মান্য ব্যক্তি সকল ৷ উক্ত অনুষ্ঠানৰ ইভেণ্ট সমূহত থাকিব স্ল’ বাইক ৰেচ্, মল্ল যুঁজ, বাইক লিফটিঙ ইত্যদি খেল ৷ উক্ত অনুষ্ঠানৰ মূল উদ্দেশ্য কাৰবি আংলঙৰ পৰ্যটনথলী সমূহক বিশ্ব দৰবাৰত উন্নত ৰূপত দাঙি ধৰা বুলি উদ্যোক্তা সকলে জানিবলৈ দিছে ৷
ছাইদুল ইছলান, ডিফু ৷
