হিন্দু নোহোৱাৰ বাবেই ভাৰত নাট্যম শিল্পী মনচিয়া ভি পিক নৃত্য পৰিবেশনত বাধা দিয়াৰ অভিযোগ উঠিল কেৰালাৰ ত্রিশূৰৰ এটা মন্দিৰৰ কর্তৃপক্ষৰ বিৰুদ্ধে।
শিল্পীগৰাকীৰ অভিযোগ, অহা ২১ এপ্রিলত তেওঁৰ নৃত্যৰ অনুষ্ঠানৰ আছিল কুড়ালমানিক্যম মন্দিৰত। কিন্তু দেওবাৰে মন্দিৰ কমিটিৰ এজন সদস্যই জনাইছে, তেওঁক নৃত্যৰ অনুমতি দিয়া নহ’ব। কিয়নো তেওঁ হিন্দু নহয়। কেৱল সেয়াই নহয়, সদস্যজনে লগতে জনাইছে যে ধর্মৰ ভিত্তিত মঞ্চ আবণ্টন কৰা হৈছে। কোন ভাল শিল্পী, কোন নহয় সেয়া চোৱা নহ’ব।
এই প্ৰসংগত মনচিয়াই কয়, “যেহেতু মোৰ স্বামী এজন হিন্দু, মোক এইটোও প্রশ্ন কৰা হয়, আমি হিন্দু ধর্ম লৈছোনে নাই? আনকি সদস্যজনে এইটোও কয়, মই যদি হিন্দু ধর্ম লওঁ, তেনেহ’লে নৃত্যৰ বিষয়টো সন্দৰ্ভত বিবেচনা কৰি চোৱা হ’ব।”
লগতে মানচিয়াৰ অভিযোগ, “এমাহমান পূৰ্বে মন্দিৰ কর্তৃপক্ষই মোৰ সৈতে যোগাযোগ কৰে। মোৰ স্বামীক তেওঁলোকে ভালদৰে চিনি পায় বুলিও জনায়। গতিকে মোৰ সম্পর্কেও তেওঁলোকে জানিছিল। অনুষ্ঠানৰ বাবে মন্দিৰ কর্তৃপক্ষই মোৰ নামো ছপা কৰিছিল। কিন্তু এতিয়া তেওঁলোকে উক্ত অনুষ্ঠানত অংশগ্রহণৰ অনুমতি দিবলৈ ৰাজী হোৱা নাই৷”
এই প্রসঙ্গত মন্দিৰৰ দেবস্বম বোর্ডৰ চেয়াৰমেন প্রদীপ মেননৰ দাবী, মন্দিৰৰ ৰীতি-নীতি অনুযায়ী একমাত্র হিন্দুসকলেই মন্দিৰ চৌহদত কোনো অনুষ্ঠানত অংশগ্ৰহণ কৰিব পাৰে। সেই নিয়ম অনুযায়ী অংশগ্রহণৰ আগতে শিল্পীসকলৰ ধর্ম জানিব বিচৰা হয়। মনচিয়া প্রসঙ্গত প্রদীপে জনায়, ভাৰত নাট্যম শিল্পীগৰাকীৰ পৰা তেওঁৰ ধর্ম জানিব বিচৰা হৈছিল। কিন্তু তেওঁ জনাইছে যে তেওঁৰ কোনো ধর্ম নাই। সে কাৰণেই মনচিয়াক অনুষ্ঠানৰ শিল্পী তালিকাৰ পৰা বাদ দিয়া হৈছে। প্রদীপৰ মতে, “আমি মন্দিৰৰ নিয়ম ভাঙিব নোৱাৰো।”
অৱশ্যে এয়াই প্রথম নহয়, ধর্মৰ বাবে বাদ পৰাৰ অভিজ্ঞতা পূৰ্বতেও তেওঁৰ হৈছে বুলি জনাইছে মনচিয়াই। কেইবছৰমান পূৰ্বে গুৰুভায়ুৰ শ্রীকৃষ্ণ মন্দিৰত নৃত্যৰ অনুমতি দিয়া হোৱা নাছিল তেওঁক। ইয়াৰ উপৰি এগৰাকী মুছলিম ধর্মাৱলম্বী হোৱা সত্ত্বেও ধ্রুপদী নৃত্য কিয় কৰিছে বুলিও প্রশ্ন কৰা হৈছে। আনকি ৰোষৰ সন্মুখীন হ’বলগীয়া হোৱা বুলিও দাবী মনচিয়াৰ।
