ষ্টাফ ৰিপ’ৰ্টাৰ:
ডিফু : চুবুৰীয়া ৰাজ্য নাগালেণ্ডৰ পৰা অসমলৈ অব্যাহত আছে অবৈধ ড্ৰাগছৰ সৰবৰাহ ৷ অবৈধ ড্ৰাগছ আৰু গাঞ্জা সৰবৰাহকাৰী সকলে নিচাযুক্ত সামগ্ৰী সৰবৰাহৰ বাবে ডিফু ধনশিৰি পথক নিৰাপদ পথ হিছাপে বাছি লৈছে ৷ কিন্তু ডিফু ধনশিৰি পথত সক্ষম হৈ থকা কাৰবি আংলং আৰক্ষীয়ে সৰবৰাহকাৰীৰ প্ৰতিটো প্ৰচেষ্টা সাহসিকতাৰে ব্যৰ্থ কৰি আহিছে ৷
বৃহস্পতিবাৰে পুৱা এক গোপন সূত্ৰৰ ভিত্তিত এখন যাত্ৰীবাহী অট’ৰিক্সাত দুজন বিহাৰী সম্প্ৰদায়ৰ লোক নিচাযুক্ত গাঞ্জা লৈ যোৱাৰ খবৰ লাভ কৰি ধনশিৰি আৰক্ষী চকীৰ ভাৰপ্ৰাপ্ত বিষয়া শ্যামল নেওগে সংগীয় ষ্টাফ সহ উক্ত অট’ৰিক্সাখনক অনুসৰণ কৰিবলৈ ধৰে৷
ইয়াৰ পূৰ্বে ধনশিৰি আৰক্ষীৰ তৰফৰ পৰা এই সন্দৰ্ভত অৱগত কৰি বনবিভাগৰ দলদলী গেটত নাকা বহুৱাবলৈ কোৱা হয় ৷ সেই মতে দলদলী গেটত গৃৃহৰক্ষী বাহিনীৰ জোৱান সকলে উক্ত অট’ৰিক্সা খনক ৰখাই দিয়ে ৷ পিছত পিছে পিছে আহি থকা ধনশিৰি আৰক্ষীয়ে অট’ৰিক্সাখনৰ দুজন বিহাৰী সম্প্ৰদায়ৰ লোকৰ পৰা বুজন পৰিমানৰ গাঞ্জা উদ্ধাৰ কৰিবলৈ সক্ষম হয় ৷
গাঞ্জাখিনিৰ ওজন ১৩’ কেজি ৪৬ গ্ৰাম ৷ গাঞ্জাখিনিৰ সৈতে আৰক্ষীয়ে হোজাই জিলাৰ লংকাৰ পাঞ্জাৱী বস্তিৰ মেনেজাৰ চাহানীৰ পুত্ৰ অশোক চাহানী( ৪২) আৰু একে গাঁৱৰ বিচন সিঙৰ পুত্ৰ মনেশ্বৰ সিঙ (৩৮)ক আটক কৰিবলৈ সক্ষম হয় ৷
আনহাতে গাঞ্জাখিনি উদ্ধাৰ কৰাৰ সময়তে দুপৰীয়াৰ ভাগত ধনশিৰি ৰেলৱে ক্ৰচিঙত নিয়মীয়া তালাচী স্থানত ধনশিৰি থানাৰ কৰ্তব্যৰত কণিষ্টবল বৰচিং বে’ই সন্দেহবশত আন এখন যাত্ৰীবাহী অট’ত তালাচী চলাই এহাল দম্পতিৰ পৰা সন্দেহযুক্ত ব্ৰাউন চুগাৰ জব্দ কৰিবলৈ সক্ষম হয় ৷ আৰক্ষীয়ে দম্পত্তিহালৰ পৰা এটা প্লাষ্টিকৰ মোনাত কঢ়িয়াই অনা ১০ টা চাবোনৰ বাকচত সন্দেহযুক্ত প্ৰায় ১২০ গ্ৰাম সন্দেহযুক্ত ব্ৰাউন চুগাৰ উদ্ধ কৰিবলৈ সক্ষম হয় ৷
ব্ৰাউন চুগাৰখিনিৰ সৈতে আৰক্ষীয়ে নগাওঁ জিলাৰ ধিং থানা এলেকাৰ শালকাঠনি পথাৰৰ আবুল হাছেনৰ পুত্ৰ মোজাম্মিল হুছেইন (২২) আৰু তেওঁৰ পত্নী মুছলিমা খাতুন (২০) ক আটক কৰে ৷ প্ৰাথমিক জেৰাত সৰবৰাহকাৰী কেইটাই গাঞ্জাখিনি ডিমাপুৰৰ পৰা হোজাই জিলাৰ লংকালৈ আৰু ব্ৰাউন চুগাৰখিনি নগাওঁ জিলালৈ সৰবৰাহ কৰাৰ পৰিকল্পনা কৰিছিল বুলি জনায় ৷
এই সন্দৰ্ভত অধিক তথ্যৰ বাবে আৰক্ষীয়ে সৰবৰাহকেইটাক জেৰা অব্যাহত ৰাখিছে বুলি জানিব পৰা গৈছে ৷ ড্ৰাগছ আৰু গাঞ্জাখিনি কাৰবি আংলং জিলা আৰক্ষী উপাধ্যক্ষ(সীমান্ত) জে আৰ মালাকাৰৰ উপস্থিতিত জব্দ কৰা হয়
