ষ্টাফ ৰিপ’ৰ্টাৰ:
ডিফু : কাৰবি আংলং স্বায়ত্তশাসিত পৰিষদৰ অধীনৰ কাৰবি আংলং আৰু পশ্চিম কাৰবি আংলং জিলাৰ প্ৰাথমিক আৰু মাধ্যমিক বিদ্যালয়ৰ প্ৰধান শিক্ষক আৰু বিদ্যালয় পৰিচালনা সমিতিসমূহৰ সৈতে পৰিষদে আজি মত বিনিময় কৰে ৷
এইলৈ মুখ্য কাৰ্যবাহী সদস্য ডাঃ তুলিৰাম ৰমহাঙৰ সভাপতিত্বত এক সমাৰোহৰ আয়োজন কৰা হয় ৷ সমাৰোহত দুয়োখন পাৰ্বত্য জিলাৰ প্ৰায় তিনি সহস্ৰাধিক বিদ্যালয় উন্নয়ন সমিতিৰ বিষয়ববীয়া আৰু প্ৰধান শিক্ষক উপস্থিত থাকি নিজ নিজ বিদ্যালয়ৰ অভাৱ-অভিযোগ আৰু আন্তঃগাঁথনিৰ ওপৰত নিজ নিজ মন্তব্য প্ৰকাশ কৰে ৷
উক্ত সমাৰোহতে অলপতে জিলাখনৰ সীমামূৰীয়া ৰংতাৰা নামৰ এখন বিদ্যালয়ৰ প্ৰধান শিক্ষক খগেন ইংতি বছৰ বছৰ ধৰি বিদ্যালয়ত উপস্থিত নথকাকলৈ শিক্ষকগৰাকীক মঞ্চলৈ মাতি আনি জবাবদিহি কৰে ৷ শিক্ষকগৰাকীয়ে নিজৰ স্পষ্টীকৰণত বিদ্যালয়ত তেওঁৰ নিয়মীয়া থকাৰ লগতে তেওঁৰ বিৰুদ্ধে মনেসজা বাতৰি পৰিৱেশন কৰা হৈছে বুলি ৰাজহুৱাকৈ প্ৰকাশ কৰে ৷ শিক্ষকগৰাকীৰ বিৰুদ্ধে উত্থাপিত অভিযোগৰ এসপ্তাহৰ ভিতৰত তদন্ত কৰি তদন্তৰ প্ৰতিবেদন দাখিল কৰিবলৈ বিভাগীয় কৰ্তৃপক্ষক নিৰ্দেশ প্ৰদান কৰে ৷
সমাৰোহক উদ্দেশ্য কৰি জিলাখনৰ তিনিজন বিধায়ক ক্ৰমে, বিদ্যাছিং ইংলেঙ, দৰচিং ৰংহাঙ আৰু ৰূপছিঙ টেৰণ জিলাখনৰ শিক্ষাৰ আমূল সংস্কাৰৰ বাবে মূল্যৱান বক্তব্য আগবঢ়ায় ৷ পাৰ্বত্য জিলা দুখনৰ বিদ্যালয়সমূহৰ আন্তঃগাঁথনি নিৰ্মাণৰ বাবে কেন্দ্ৰই ৪০ কোটি টকা প্ৰদান কৰা বুলি উল্লেখ কৰি মুখ্য কাৰ্যবাহী সদস্য ডাঃ তুলিৰাম ৰংহাঙে কয় যে, প্ৰতিটো পৰিষদীয় সমষ্টিৰ বিদ্যালয় সমূহৰ সমস্যাসমূহ সমাধান কৰাৰ বাবে পদক্ষেপ লোৱা হৈছে ৷
শিক্ষক নাটনিকলৈ ব্লক পৰ্যায়ত টেট অনুষ্ঠিত কৰি প্ৰশিক্ষণৰ ব্যৱস্থা গ্ৰহণ কৰা বুলি ৰংহাঙে জানিবলৈ দিয়ে ৷ ছাত্ৰ-ছাত্ৰীসকলৰ গুণগত শিক্ষা প্ৰদানৰ দিশত শিক্ষকসকলে মহাদান কৰি শিক্ষা প্ৰদানৰ ক্ষেত্ৰত মনোনিৱেশ কৰিবলৈ আহ্বান জনায় ৷
তুলিৰাম ৰংহাঙৰ পিতৃও এগৰাকী শিক্ষক আছিল বুলি কৈ শিক্ষকসকলৰ সমস্যাৰ সমাধানৰ প্ৰতি তেওঁ দায়বদ্ধ বুলি মন্তব্য কৰে ৷ জিলাখনত শান্তি হলেহে উন্নয়ন সম্ভৱ হ’ব বুলি কয় ৷ জিলাখনত লোক সেৱা আয়োগ আৰু এপিএছচি পৰীক্ষাৰ বাবে ছাত্ৰ-ছাত্ৰীসকলৰ প্ৰশিক্ষণ প্ৰদান কৰা হ’ব বুলিও কয় ৷
এই মত-বিনিময় অনুষ্ঠানৰ জৰিয়তে পাৰ্বত্য জিলাৰ প্ৰাথমিক আৰু মাধ্যমিক বিদ্যালয়ৰ সমস্যাসমূহ গুৰুত্বসহকাৰে সমাধানৰ চেষ্টা কৰা হ’ব বুলি আশ্বাস প্ৰদান কৰে ডাঃ তুলিৰাম ৰংহাঙে ৷
