কংগ্ৰেছৰ এচাম নেতাৰ পাকিস্তানৰ প্ৰতি দৰদ আছেঃ সাংসদ দিলীপ শইকীয়া
ASSAM TIMES POST
নগাঁওঃ ৰাষ্ট্রীয় একতা অভিযানৰ অংশ হিচাপে আজি নগাঁও চহৰৰ ঐতিহ্যমণ্ডিত নেহৰুবালিত বিজেপি দলৰ ১০ নং নগাঁও লোকসভা সমষ্টিৰ এখন জন জাগৰণ সভা অনুষ্ঠিত হয়। “ভাৰতবর্ষৰ সংবিধানৰ অনুচ্ছেদ ৩৭০ বাতিল-ঐতিহাসিক ভুলৰ শুধৰণি” শীর্ষক জনজাগৰণ সভাখনত অংশগ্রহণ কৰি বিজেপি দলৰ অসম ৰাজ্যিক উপ-সভাপতি ড০ প্ৰদীপ ঠাকুৰীয়াই শেহতীয়াকৈ কেন্দ্ৰীয় চৰকাৰে কাশ্মীৰৰ পৰা ভাৰতীয় সংবিধানৰ অনুচ্ছেদ ৩৭০ বাতিলৰ সন্দৰ্ভত জনসংঘৰ দৰে সংগঠনৰ ৭২ বছৰীয়া আন্দোলনৰ ফচল বুলি উল্লেখ কৰে।
উপ- সভাপতি ড০ ঠাকুৰীয়াই কয় যে শ্যামাপ্ৰসাদ মুখাৰ্জীকে ধৰি জনসংঘৰ নেতাসকলে কাশ্মীৰৰ পৰা অনুচ্ছেদ ৩৭০ বাতিলৰ দাবীত অশেষ ত্যাগ স্বীকাৰ কৰিছিল। জনসংঘৰ এই সকল নেতাৰ অৱদানৰ বাবেই আজি জম্মু – কাশ্মীৰৰ জনসাধাৰণে মুক্তি লাভ কৰিবলৈ সক্ষম হৈছে । পূৰ্বতে কাশ্মীৰৰ জনসাধাৰণে পাকিস্তানৰ জয়গান গাবলগা হৈছিল। সেয়ে এই ঐতিহাসিক সিদ্ধান্তক সকলোৱে আদৰি লব লাগে। সভাত মঙলদৈ লোকসভা সমষ্টিৰ সাংসদ দিলীপ শইকীয়াই কাশ্মীৰত সংবিধানৰ অনুচ্ছেদ ৩৭০ বাতিলত সন্তুষ্টি প্ৰকাশ কৰি লগতে কয় যে কাশ্মীৰক লৈ পাকিস্তানে দীৰ্ঘদিন ধৰি চক্ৰান্ত কৰি আহিছিল । ভাৰতবর্ষৰ ভূতপূর্ব প্ৰধান মন্ত্ৰী জৱাহৰলাল নেহৰুৰ বাবেই কাশ্মীৰ ভাৰতবর্ষৰ মূল সূঁতিৰ পৰা আতৰি আছিল । আনকি কাশ্মীৰ ভাৰতবর্ষৰ মূল অংগ বুলি কৈ ফুৰিব লগা হৈছিল।
কিন্তু এতিয়া সেই ধাৰণাৰ পৰিসমাপ্তি ঘটিছে। সাংসদ শইকীয়াই লগতে আৰু কয় যে কাশ্মীৰৰ বিভিন্ন ৰাজনৈতিক দলে অনুচ্ছেদ ৩৭০ ৰ জৰিয়তে মুনাফা লৈ আছিল ।আনহাতে এচাম কংগ্রেছ নেতাৰ পাকিস্তানৰ প্ৰতি দৰদ থকা বুলিও সাংসদ শইকীয়াই অভিযোগ কৰে। প্ৰসংগ ক্ৰমে তেওঁ কোনো সংগঠনৰ নাম উল্লেখ নকৰাকৈ বিজেপি আৰু আৰ এচ এচ থকালৈকে স্বাধীন অসম ,স্বাধীন নগালেণ্ড আদি দাবী কেতিয়াও পুৰণ নহয় বুলি তাৎপর্যপূর্ণ মন্তব্য কৰে ।
জন জাগৰণ সভাত অংশগ্রহণ কৰি প্ৰাক্তন কেন্দ্ৰীয় ৰেলৰাজ্য মন্ত্রী ৰাজেন গোহাঁইয়ে কাশ্মীৰত সংবিধানৰ অনুচ্ছেদ ৩৭০ বাতিলৰ সিদ্ধান্ত প্ৰধান মন্ত্ৰী নৰেন্দ্র মোডী চৰকাৰৰ দিনতহে সম্ভৱ বুলি মন্তব্য কৰি লগতে কয় যে প্ৰধান মন্ত্ৰী নৰেন্দ্র মোডীৰ জনপ্রিয়তা ভাৰতবর্ষতে সীমাৱদ্ধ হৈ থকা নাই ।আমেৰিকাৰ দৰে দেশতো মোডী এগৰাকী অতি জনপ্রিয় নেতা হিচাপে স্বীকৃতি লাভ কৰিছে। সভাত নগাঁও সদৰ সমষ্টিৰ বিধায়ক ৰূপক শৰ্মাই আদৰণি ভাষণ প্ৰদান কৰে ।
নগাঁও জিলা বিজেপিৰ সাধাৰণ সম্পাদক ৰঞ্জিত বৰদলৈয়ে আঁত ধৰা জন জাগৰণ সভাখনত ৰহা সমষ্টিৰ বিধায়ক ডিম্বেশ্বৰ দাস , বটদ্ৰৱা সমষ্টিৰ বিধায়কা আঙুৰলতা ডেকা,অসম চলচ্চিত্ৰ নিগমৰ উপাধ্যক্ষ অভিজিৎ নাথ, নগাঁও জিলা বিজেপিৰ সভাপতি জয়ন্ত নাথ, বিজেপি নেতা মহেন্দ্ৰ কোঁৱৰৰ উপৰি বিজেপিৰ হোজাই, মৰিগাঁও জিলা সমিতিৰ সভাপতি সকল উপস্থিত থাকে । ইপিনে আজি পুৱা প্ৰতিকুল বতৰক নেওচি জন জাগৰণ সভাখনত ১০ নং নগাঁও লোকসভা সমষ্টিৰ বিজেপিৰ কেইবা সহস্রাধিক নেতা,কৰ্মী আৰু সমৰ্থকে যোগদান কৰে ।
