ষ্টাফ ৰিপ’ৰ্টাৰ:
ডিফু:পুণৰ বৰবিহ সদৃস মাৰাত্মক নিষিদ্ধ ড্ৰাগছৰ বিৰুদ্ধে কাৰবি আংলং আৰক্ষীয়ে লাভ কৰিছে এক বৃহৎ সফলতা ৷ প্ৰাপ্ত খবৰ অনুসৰি বুধবাৰে নিশা বোকাজান আৰক্ষীৰ এক বিশেষ নাকা তালাচীত উদ্ধাৰ হয় এই বৃহৎ পৰিমানৰ ড্ৰাগছ খিনি ৷
বোকাজান মহকুমা আৰক্ষী বিষয়া জন দাসৰ নেতৃত্বত বোকাজান অ’চি মনি চমুৱা, খটখটী অ’চি মৌবলিক ব্ৰক্ষ্ম, উপপৰিদৰ্শক মৃদুল ৰুদ্ৰ পাল, সহকাৰী উপপৰিদৰ্শক সুজিব বসুমতাৰী আৰু বোকাজান মাটিপুল গাওঁৰক্ষী বাহিনীৰ সহযোগত বোকাজানত বিশেষ নাকা তালাচী চলায় ৷
উক্ত তালাচী কালতে খটখটী তালাচী পষ্ট পৰিহাৰ কৰি বোকাজান দিশে দুজন যুৱকে চলাই আহি থকা অৱস্থাত মাটিপলত AS09H4234 স্কুটিখনত তালাচী চলাই অভিযানকাৰী ১৫০ টা চাবোনৰ বাকচত ১ কেজি ৭৭৭ গ্ৰাম নিষিদ্ধ হেৰইন উদ্ধাৰ কৰিবলৈ সক্ষম হয় ৷ হেৰইনখিনিৰ আন্তৰাষ্ট্ৰীয় বজাৰ মূল্য প্ৰায় ১২ কোটি টকা হব বুলি জানিব পৰা গৈছে ৷
জানিব পৰা মতে ড্ৰাগছখিনি সৰুপথাৰ নাওঘাটলৈ নিয়াৰ পথতেই দুই ড্ৰাগছ সৰবৰাহকাৰী বিমল তাচ্ছা আৰু ছাদ্দাম হুছেইনক আটক কৰে আৰক্ষীয়ে।ইয়াৰে বিমল তচ্চা বোকাজান ঘৰিয়াঁলডুবি আৰু ছাদ্দাম হুছেইন মৰিগাওঁ জিলাৰ মৈৰাবাৰী থানা অন্তৰ্গত পাতেকীবাৰীৰ বুলি চিনাক্ত কৰা হৈছে ৷
আনহাতে যুৱক দুজনক কৰায়ত্ব কৰাৰ পিছত আৰক্ষীৰ গাড়ীৰ পৰা আৰক্ষীক ঠেলা মাৰি পলাবলৈ লওঁতেই ড্ৰাগছ সৰবৰাহকাৰী ছাদ্দাম হুছেইনলৈ আৰক্ষীৰ গুলিচালনা কৰোতে ছাদ্দাম হুছেইন আঘাত প্ৰাপ্ত হয় বুলি আৰক্ষীৰ সূত্ৰে জানিব পৰা গৈছে৷
