ASSAM TIMES POST
শেহতীয়া লোকসভা নিৰ্বাচনৰ পাছতে অসমত চাৰিটাকৈ বিধানসভা সমষ্টিত উপনিৰ্বাচন নিশ্চিত হৈ পৰিছিল৷ এই চাৰিটা সমষ্টিৰ ভিতৰত অন্যতম হ’ল জনীয়া বিধানসভা সমষ্টি৷
উল্লেখযোগ্য যে জনীয়া বিধানসভা সমষ্টিত বিধায়ক আছিল কংগ্ৰেছ নেতা আব্দুল খালেক৷ যোৱা লোকসভা নিৰ্বাচনত বৰপেটা সমষ্টিৰ পৰা সাংসদ হিচাপে জয়ী হৈছিল আব্দুল খালেক৷ ইয়াৰ লগে লগে জনীয়া বিধানসভা সমষ্টিত বিধায়ক পদতো খালি হৈ পৰে৷ জনীয়া বিধানসভা সমষ্টিত বিধায়ক পদ খালি হৈ পৰাৰ পাছতে তৎপৰ হৈ পৰে শাসক আৰু বিৰোধী দল৷ দখলত থকা সমষ্টিটো কংগ্ৰেছে পুনৰ নিজৰ হাতত ৰখাৰ চেষ্টাত যুঁজ আৰু ইয়াৰ বিপৰীতে কংগ্ৰেছৰ হাতৰ পৰা সমষ্টিটো উদ্ধাৰ কৰাৰ যুঁজ৷
সেয়ে জনীয়া বিধানসভা সমষ্টি দখলত মৰণ পন যুঁজ আৰম্ভ হৈছে শাসক আৰু বিৰোধীৰ মাজত৷ উল্লেখযোগ্য যে জনীয়া বিধানসভা সমষ্টিত ৰাজ্যখনৰ আন তিনিটা বিধানসভা সমষ্টিৰ সৈতে উপনিৰ্বাচন অনুষ্ঠিত হ’ব৷ অহা শাৰদীয় দুৰ্গোৎসৱৰ পাছতে এই উপনিৰ্বাচন অনুষ্ঠিত হোৱাৰ সম্ভাৱনা আছে৷ জনীয়া বিধানসভা সমষ্টিৰ উপনিৰ্বাচনৰ দিন স্থিৰ নহ’লেও প্ৰাৰ্থিত্বপ্ৰত্যাশীসকলৰ মাজত কুচকাৱাজ আৰম্ভ হৈছে৷
বিশেষকৈ সমষ্টিটোত শাসকীয় বিজেপি, বিৰোধী দল কংগ্ৰেছ, এআইইউডিএফৰ প্ৰাৰ্থীসকলৰ মাজত টিকেটৰ যুঁজ আৰম্ভ হৈছে৷ জানিব পৰা মতে সমষ্টিটোত কংগ্ৰেছৰ প্ৰাৰ্থিত্বৰ দৌৰত আছে কলগাছিয়া নৱজ্যোতি মহাবিদ্যালয়ৰ অৱসৰপ্ৰাপ্ত অধ্যক্ষ এম মোজাম্মিল হুছেইন, অৱসৰপ্ৰাপ্ত উচ্চ শিক্ষা সঞ্চালক দেলোৱাৰ হুছেইন, প্ৰাক্তন বিধায়ক আব্দুছ ছোবাহান, ড° দেৱান আৰশ্বাদ আহমেদ, বালিকুৰি উচ্চতৰ মাধ্যমিক বিদ্যালয়ৰ অধ্যক্ষ ফজলুৰ ৰহমান, যুৱ নেতা আমিৰুল ইছলাম খান, ৰূপসী ব্লক কংগ্ৰেছৰ সভাপতি আজগৰ আলী আহমেদ, যুৱ কংগ্ৰেছৰ প্ৰাক্তন সভাপতি জাকিৰ হুছেইন, অধিবক্তা হবিবুৰ ৰহমান৷
আনহাতে শাসকীয় দল বিজেপিৰ টিকেটৰ দাবীদাৰসকলৰ ভিতৰত উচ্চাৰণ হৈ থকা নাম কেইটাৰ ভিতৰত আছে বিশিষ্ট সমাজকৰ্মী আব্দুছ ছামাদ, গুৱাহাটী উচ্চ ন্যায়ালয়ৰ অধিবক্তা শ্বাহিদুল ইছলাম, বৰপেটা জিলা পৰিষদৰ প্ৰাক্তন সভাপতি মজিবৰ ৰহমান খান, নুৰুল আমিন৷ ইপিনে এআইইউডিএফৰ পৰা টিকটৰ দাবীদাৰ হ’ল প্ৰাক্তন বিধায়ক ড° হাফিজ ৰফিকুল ইছলাম৷ মন কৰিব লগীয়া যে আসন্ন উপনিৰ্বাচনক কেন্দ্ৰ কৰি ইতিমধ্যে শাসকীয় আৰু বিৰোধী দলবোৰে প্ৰচাৰ অভিযান আৰম্ভ কৰা নাই যদিও ভোটাৰৰ মাজত শক্তি বৃদ্ধিৰ বাবে প্ৰচেষ্টা অব্যাহত ৰাখিছে৷
