নগাঁও ১৫ ছেপ্টেম্বৰ : অহা ২০ ছেপ্টেম্বৰত ত্ৰিপুৰা বিশ্ববিদ্যালয়ত উজ্জয়িনীৰ মহৰ্ষি সন্দীপনি বেদবিদ্যা সংস্কৃত প্ৰতিষ্ঠান আৰু প্ৰাচ্যবিদ্যা প্ৰতিষ্ঠান,অসমৰ বিশেষ সহযোগত তথা বিশ্ববিদ্যালয়ৰ সংস্কৃত বিভাগৰ আয়োজনত তিনিদিনীয়া ‘ক্ষেত্ৰীয় বৈদিক সন্মিলন’ত নগাঁৱৰ শিল্পী ৰঞ্জন বেজবৰুৱাই এলানি সংস্কৃত গীত-শ্লোক-স্তোত্ৰ পৰিৱেশন কৰিব। ইতিমধ্যে ভিন্নসুৰী সংস্কৃত গীত পৰিৱেশনেৰে দেশে-বিদেশে প্ৰসিদ্ধি লাভ কৰা শিল্পী ৰঞ্জন বেজবৰুৱাৰ সৈতে ত্ৰিপুৰালৈ সাজু হৈছে বাঁহীবাদক প্ৰাঞ্জল বৰাৰ পৰিচালনাত অতুল মহন্ত, অভিষেক ধৰ, শান্তনু বৰা, দ্বীপেন দাসেৰে গঠিত এটি নিৰ্বাচিত বাদ্য-শিল্পী-দল, যি শাস্ত্ৰীয় আৰু লোকসংগীতৰেও ত্ৰিপুৰাবাসী ৰাইজক আনন্দিত কৰিব।
শিল্পী বেজবৰুৱাৰ অনুষ্ঠানত স্থান পাব বৈদিক স্তৱ-স্তোত্ৰ, পুৰণি অসমৰ শ্লোকাদিৰ উপৰি শ্ৰীমন্ত শংকৰদেৱ, কবিগুৰু ৰৱীন্দ্ৰনাথ, মীৰাবাঈ, তুলসীদাস, নৰসিংহ মেহতা পৰা ডঃ ভূপেন হাজৰিকা, হেমন্ত মুখাৰ্জী, এ আৰ ৰহমানলৈ বিশিষ্ট সংগীতকাৰৰ গীতৰ ৰূপান্তৰ আৰু অন্যান্য মৌলিক সংস্কৃত গীতে। দেশৰ ভালেসংখ্যক স্বনামধন্য বেদবিদ পণ্ডিতৰ বৈদিক কৃষ্টিৰ চৰ্চাৰে মুখৰিত হ’ব লগা এই সন্মিলনলৈ সকলোকে আদৰণি জনাইছে ত্ৰিপুৰা বিশ্ববিদ্যালয়ৰ উপাচাৰ্য বিজয় কুমাৰ লক্ষ্মীকান্ত ৰাও ধাৰুৰকৰ, প্ৰাচ্যবিদ্যা সংস্কৃত প্ৰতিষ্ঠানৰ আচাৰ্য্য বিৱেক কুমাৰ মিশ্ৰ প্ৰমুখ্যে ব্যক্তিসকলে।
