ছাইদুল ইছলাম
ডিফু : দীৰ্ঘদিনীয়া অসম-মেঘালয় সীমা সমস্যাৰ শান্তিপূৰ্ণ সমাধানৰ বাবে অসমৰ মুখ্যমন্ত্ৰী ডাঃ হিমন্ত বিশ্ব শৰ্মা আৰু মেঘালয়ৰ মুখ্যমন্ত্ৰী কমৰাড চাংমাৰ মাজত কালি এক গুৰুত্বপূৰ্ণ আলোচনা অনুষ্ঠিত হোৱাৰ পিছতে বিষয়টো সন্দৰ্ভত নিজ প্ৰতিক্ৰিয়া প্ৰকাশ কৰিছে কাৰবি ছাত্ৰ সন্থা চমুকৈ কেএছএই ৷
আজি বিয়লি কাৰবি ছাত্ৰ সন্থাৰ কাৰ্যালয়ত আয়োজিত এক সংবাদমেলক সম্বোধন কৰি সন্থাটোৰ সভাপতি থানচিং তিমুঙে প্ৰতিক্ৰিয়া প্ৰকাশ কৰি কয় যে, দুয়োখন ৰাজ্যৰ মুখ্যমন্ত্ৰীৰ হোৱা মাজত হোৱা প্ৰথম লানি আলোচনাৰ “দিয়া-লোৱা” ব্যৱস্থাৰ মাজেৰে দুয়োখন ৰাজ্যৰ মাজত সীমা সমস্যা সমাধানৰ পোষকতা কৰা হৈছে ৷ এই সন্দৰ্ভত নিজা স্থিতি স্পষ্ট কৰি ছাত্ৰ নেতাগৰাকীয়ে কয় যে, দুয়োখন ৰাজ্যৰ সীমা সমস্যা সন্দৰ্ভত দীঘলীয়া আৰু গভীৰ ৰাজনৈতিক প্ৰেক্ষাপটৰ প্ৰসংগ জড়িত হৈ আছে ৷ সেয়েহে চৰকাৰে এই সন্দৰ্ভত কোনো সিদ্ধান্ত লোৱাৰ পূৰ্বে সংশ্লিষ্ট সকলো পক্ষৰ সৈতে সঠিক আলোচনাৰ মাজেৰে আগবঢ়াটো নিত্যান্তই প্ৰয়োজন ৷ কোনো অপ্ৰত্যাশিত ঘটনা সংঘটিত নোহোৱাৰ বাবেই এনে আলোচনাৰ প্ৰয়োজন বুলি মন্তব্য কৰে ছাত্ৰ নেতাগৰাকীয়ে ৷
দুয়োখন ৰাজ্যৰ মাজত থকা ১২টাকৈ বিবাদমান এলেকাৰ অধিকাংশ এলেকাই পশ্চিম কাৰবি আংলং জিলাৰ সীমান্তৱৰ্তী ৷ সেয়েহে দুয়োখন ৰাজ্যৰ মাজত শান্তিপূৰ্ণ সমাধানৰ নামত পাহাৰীয়া জিলাৰ ভূমি হেৰুৱাবলগীয়া আশংকাই জিলাখনৰ খিলঞ্জিয়া লোকসকলক সন্ত্ৰস্ত কৰি তোলা বুলি ছাত্ৰ নেতাগৰাকীয়ে উল্লেখ কৰে ৷ অসম আৰু মেঘালয়ৰ মাজত থকা সমস্যা সমাধানৰ নামত পশ্চিম কাৰবি আংলং কোনো কাৰণতে বলি হ’বলগীয়া নহয় তাৰ প্ৰতি গুৰুত্ব প্ৰদান কৰিবলৈ আহ্বান জনায় ৷
উত্তৰ-পূৱৰ সকলো ৰাজ্য একত্ৰিত হৈ থকাৰ নীতিক সমৰ্থন কৰিও ইয়াৰ বাবে যাতে কোনো পক্ষই নিজৰ ভূমি হেৰুৱাবলগীয়া নহয় তাৰ প্ৰতি গুৰুত্ব প্ৰদান কৰিবলৈ সংবাদমেল যোগে আহ্বান জনায় নেতাগৰাকীয়ে ৷ সেয়েহে কাৰো ক্ষতি নোহোৱাকৈ দুয়োপক্ষৰ মাজত শান্তিপূৰ্ণ সমাধান কৰাৰ বাবে আহ্বান জনায় ছাত্ৰ সংগঠনটোৱে ৷
