ষ্টাফ ৰিপ’ৰ্টাৰ:
ডিফু : হাতী- মানুহৰ সংঘাত অব্যাহত আছে পশ্চিম কাৰবি আংলঙ জিলাত ৷ প্ৰাপ্ত খবৰ অনুসৰি পশ্চিম কাৰ্বি আংলং জিলাৰ কলঙা অঞ্চলত এজাক বনৰীয়া হাতীৰ উপদ্ৰৱে অঞ্চলটোত এক প্ৰকাৰ ত্ৰাসৰ সৃষ্টি হৈছে৷
জিলাখনৰ ডংকামোকামস্থিত বন উপ সংমণ্ডলৰ অধীনস্থ ইংলং বিৰিক গাঁওখনত শুক্ৰবাৰে নিশা ভাগত অহা এজাক বনৰীয়া হাতীৰ জাকটোৱে তাণ্ডৱ চলাই ১৫ খনকৈ বাসগৃহ কম-বেছি পৰিমানে ক্ষতি সাধন কৰাৰ লগতে গৃহস্থৰ ভঁৰাল ভাঙি বনৰীয়া হাতীৰ জাকটোৱে ধান খাই ঘৰ-বাৰি বিনষ্ট কৰাৰ লগতে কেইবাটাও ভঁৰাল ভাঙি বহু ক্ষতি সাধন কৰি থৈ যায় ৷
ইপিনে, বনৰীয়া হাতীৰ জাকটোৱে ইংলং বিৰিক গাঁও খনত প্ৰৱেশ কৰি ওৰে নিশাটোত এক প্ৰকাৰে উপদ্ৰৱ চলায় ত্ৰাসৰ সৃষ্টি কৰাৰ লগতে ঘৰ-বাৰি ভাঙি চূৰ্ণ- বিচূৰ্ণ কৰি আজি পুৱতি নিশাই বনৰীয়া হাতীৰ জাকটোৱে গাঁওখনক এৰি কাষতে থকা পাহাৰৰ পিনে প্ৰস্থান কৰে ৷
দৰিদ্ৰ পৰিয়াল সকলে চৰকাৰৰ পৰা যথোচিত সাহায্যৰ বাবে দাবী উত্থাপন কৰে ৷ ইয়াৰোপৰি স্থানীয় ৰাইজে এক স্থায়ী সমাধান কামনা কৰিছে বুলি জানিব পৰা গৈছে ৷
