ASSAM TIMES POST
নগাঁওঃ ৰাজ্যৰ বিভিন্ন স্থানত শুকুৰবাৰে উলহ-মালহেৰে উদযাপন কৰা হয় শ্ৰীশ্ৰী কৃষ্ণৰ জন্মোৎসৱ। নগাঁৱৰ প্ৰতিটো নামঘৰত জন্মাষ্টমী উপলক্ষে নাম-প্ৰসংগ কৰা হয়। বিগত বৰ্ষসমূহৰ দৰে এইবছৰো নগাঁৱৰ কৃষ্ণাশ্ৰম শিৱ মন্দিৰ প্ৰাংগণত বিশ্ব হিন্দু পৰিষদৰ ৫৫ সংখ্যক প্ৰতিষ্ঠা দিৱস উপলক্ষে পৰিষদে উদযাপন কৰে জন্মাষ্টমী।
উল্লেখযোগ্য যে ১৯৬৪ চনৰ ২৯ আগষ্টত মুম্বাইৰ পুনে চহৰৰ সন্দীপনি আশ্ৰমত পৱিত্ৰ অষ্টমী তিথিৰ দিনা বিশ্ব হিন্দু পৰিষদৰ জন্ম হৈছিল আৰু তেতিয়াৰ পৰাই পৰিষদে জন্মাষ্টমী উদযাপন কৰি আহিছে। শুকুৰবাৰে পুৱা ধৰ্মধ্বজা উত্তোলন কৰাৰ পাছতেই শিশু কৃষ্ণৰ ভাও প্ৰতিযোগিতা আৰম্ভ হয়। সমান্তৰালভাৱে নগাঁও চহৰৰ মাজেৰে পাৰ হৈ যায় এক দৃষ্টিনন্দন বাৰেৰহণীয়া সাংস্কৃতিক শোভাযাত্ৰা।
শোভাযাত্ৰাত নাম-কীৰ্তন, খোল-তাল, নাগাৰাৰ ধ্বনিয়ে চৌপাশৰ পৰিবেশ পৱিত্ৰ কৰি তোলে। শ্ৰীশ্ৰী কৃষ্ণৰ জন্মোৎসৱত নগাঁৱৰ বিধায়ক ৰূপক শৰ্মাৰ লগতে বহুসংখ্যক ৰাইজে অংশগ্ৰহণ কৰে। ইপিনে মহাপুৰুষ শ্ৰীমন্ত শংকৰদেৱৰ জন্মস্থান বটদ্ৰৱা থানটো কৃষ্ণৰ জন্মোৎসৱ উপলক্ষে ভালেসংখ্যক ভক্তৰ সমাগম হয়। ৰাইদঙীয়াৰ কৰচুং সত্ৰটো জন্মাষ্টমী উদযাপন কৰা হয়।
