ASSAM TIMES POST
নগাঁওঃ অনুসূচীত জাতি যুৱ ছাত্ৰ পৰিসদে আজি নগাঁও জিলা উপায়ুক্ত কাৰ্যলয়ৰ সন্মুখত তেওঁলোকৰ বিভিন্ন দাবীৰ পৰিপ্ৰেক্ষিতত তিনি ঘন্টীয়া অৱস্থান ধৰ্মঘট কাৰ্যসূচী ৰূপায়ন কৰে। ৰাজ্যৰ অন্যান্য জাতি জনগোষ্ঠী সমূহক প্ৰদান কৰা স্বায়ত্ব ব্যৱস্থাৰ দৰেই অনুসূচীত জাতিকো স্বায়ত্ব শাসন ব্যৱস্থা গ্ৰহণ কৰিব লাগে বুলি সংগঠনটোৱে দাবী উত্থাপন কৰে।
স্বাধীনতাৰ ৭০ বছৰ পাছতো কোনো চৰকাৰে অনুসূচীত জাতিৰ লোকসকলৰ কল্যাণৰ বাবে এতিয়ালৈকে কোনো ধৰণৰ কাৰ্যব্যৱস্থা গ্ৰহণ কৰা নাই বুলিও তেওঁলোকে অভিযোগ কৰে ।আনহাতে বাজেটত অনুসূচীত জাতিৰ নামত আবন্টিত কোটি কোটি টকা একাংশ মন্ত্ৰী, বিধায়ক, আমোলাই আত্মসাৎ কৰা বুলি এক গুৰুত্বপূৰ্ণ অভিযোগ উত্থাপন কৰে।
পৰিষদৰ মূল দাবী সমূহ হৈছে- অন্যান্য জাতিৰ দৰেই অনুসূচীত জাতিৰ ছাত্ৰ ছাত্ৰীয়ে জলপানী লাভ কৰা, স্কুল- কলেজ আদিত সকলো সা সুবিধা প্রদান আদি।উল্লেখযোগ্য যে বিগত বৰ্ষৰ অক্টোবৰ মাহত নতুন দিল্লীৰ সংসদ মাৰ্গত পৰিষদৰ একাংশ কৰ্মীয়ে স্বায়ত্ব শাসনৰ দাবীত এলানি ধৰ্ণা কাৰ্যসূচী ৰূপায়ন কৰাৰ লগতে চলিত বৰ্ষৰ মাৰ্চ মাহত জিলা উপায়ুক্ত কাৰ্যালয়ত ধৰ্ণা কাৰ্যসূচী ৰূপায়ন কৰিছিল ।
এনে আন্দোলনৰ কাৰ্যসূচী গ্ৰহণৰ পাচতো কোনো সুফল নোপোৱাত আজি পুনৰ তিনি ঘন্টীয়া অৱস্থান ধৰ্মঘট কাৰ্যসূচী গ্ৰহণ কৰাৰ লগতে জিলা উপায়ুক্তৰ জৰিয়তে দেশৰ প্ৰধানমন্ত্ৰী আৰু ৰাজ্যৰ মুখ্যমন্ত্ৰীলৈ তেওঁলোকৰ দাবী সম্বলিত স্মাৰক পত্ৰ সংগঠনটোৱে প্ৰেৰণ কৰে।
