নিউজ ডেস্কঃ
এপিজে আব্দুল কালামে কৈছিল “Don’t read success stories, you will only get message. Read failure stories, you will get some ideas to get success.”
হয়, আইআৰএছ বিষয়া অবোধ কিশোৰ পাৱাৰৰ কাহিনিয়ে বাৰম্বাৰ ব্যর্থতাৰ পিছতো কেনেদৰে সফল হোৱাৰ অদম্য ইচ্ছা বজায় ৰাখিব পাৰি তাকে ক’ব। লক্ষ্যত উপনীত নোহোৱা পর্যন্ত কেনেদৰে নিৰন্তৰ পৰিশ্রম কৰি যাব লাগে, সেই শিক্ষাও লাভ কৰিব।
জীৱনত ৪০বাৰ চৰকাৰী চাকৰিৰ পৰীক্ষাত ব্যর্থ হৈছে মধ্যপ্রদেশৰ ছিন্দোৱাৰাৰ বাসিন্দা অবোধ কিশোৰ পাৱাৰ। যাৰ ভিতৰত ইউপিএছচি পৰীক্ষাত প্রথম চাৰিবাৰ ব্যর্থ হৈছে। কিন্তু লক্ষ্য পূৰণ কৰিহে এৰিলে এইগৰাকী যুৱকে। আজি তেওঁ ভাৰতীয় ৰাজহ সেৱা (ইণ্ডিয়ান ৰেভিনিউ ছার্ভিচ, IRS) বিষয়া। আয়কৰ বিভাগৰ সহকাৰী আয়ুক্ত হিচাবে ভূপালত কর্মৰত।
হিন্দী মাধ্যমৰ এইগৰাকী নাচোৰবান্দা ছাত্রৰ শিক্ষা-যুদ্ধৰ কাহিনী অনন্য
ইঞ্জিনিয়াৰ অবোধ কিশোৰে কাম কৰিছিল গডৰেজ কোম্পানীত। মোটা বেতনৰ চাকৰি হ’লেও তেওঁ সম্পূৰ্ণ সন্তুষ্ট নাছিল। স্বপ্ন আছিল ইউপিএছচিত উত্তীৰ্ণ হৈ ডাঙৰ বিষয়া হোৱাৰ, দেশৰ সেৱা কৰাৰ।
এদিন তেওঁৰ নাইট ডিউটি আছিল। কামৰ মাজতে ক্ষন্তেক জিৰণি পোৱাত মোবাইল খুচৰি আচিল।
হঠাৎ চকুত পৰে এটি খবৰ। এজন ৰিক্সাচালকৰ পুত্রই কেনেদৰে ইউপিএছচি পৰীক্ষাৰ কঠিন পথ অতিক্ৰম কৰি বিষয়া হৈছে সেই খবৰ। খবৰটোৱে তেওঁক এনেকৈ অনুপ্রেৰণা যোগালে যে ৰাতিৰ ভিতৰতে চাকৰি এৰাৰ সিদ্ধান্ত লয়।
নিজকে প্রশ্ন কৰে, এজন দুখীয়া ৰিক্সাচালকৰ পুত্ৰই যদি সকলো প্রতিকূলতা জয় কৰি ইউপিএছচি উত্তীৰ্ণ হ’ব পাৰে, তেওঁ কিয় নোৱাৰিব?ভবা মতেই কাম। চাকৰি এৰি কিছু জমা টকাক সম্বল কৰি মধ্যপ্রদেশৰ পৰা দিল্লীলৈ ৰাওনা হয় অবোধ কিশোৰ। লক্ষ্য ইউপিএছচিৰ নিৰবিচ্ছিন্ন প্রস্তুতি চলোৱা। কিন্তু কেৱল দুচকুত সপোন থাকিলেই নহ’ব, প্ৰয়োজন তাক পূৰণ কৰাৰ বাবে পৰিশ্রমৰ ক্ষমতা আৰু জেদ।
কিন্তু ইউপিএছচিৰ ইংৰাজী হৰফত ডাঙৰ ডাঙৰ ষ্টাডী মেটেৰিয়েল দেখি প্রথমেই প্ৰচণ্ড আঘাত লাগে হিন্দী মিডিয়ামৰ ছাত্ৰ অবোধ কিশোৰৰ। সকলো এৰি দিল্লীলৈ আহিছে স্বপ্ন পূৰণ কৰিবলৈ। এনেদৰে হাৰ মানিবনে? পলাই যাবনে? নিজকে প্রশ্ন কৰে অবোধ কিশোৰে। তাৰ পিছত নতুন উদ্যমেৰে পঢ়া-শুনা আৰম্ভ কৰে।
ইউপিএছচিৰ উপৰি বেঙ্কিং, পিএছচি আদি বিভিন্ন চৰকাৰী চাকৰিৰ পৰীক্ষা দি থাকে। কিন্তু এটাৰ পিছত আন এটা পৰীক্ষাত ব্যর্থ। প্রতিবাৰে ভাবে, এইবাৰ সফল হ’ম। কিন্তু নাই, এনেদৰে ৪০টা চৰকাৰী পৰীক্ষা দি এটাতো উত্তীৰ্ণ হ’ব নোৱাৰিলে তেওঁ৷ তাৰ মাজত চাৰিবাৰ দিয়ে ইউপিএছচি পৰীক্ষা। অকৃতকাৰ্যতাই তেওঁক দুগুণ আত্মবিশ্বাস বঢ়াই তোলে, জেদ বাঢ়ে তেইবা গুণ।
পুনৰ আৰম্ভ কৰে প্রস্তুতি। অৱশেষত ২০১৫ চনত সাফল্যৰ সোৱাদ লাভ কৰে, তাকো ইউপিএছচিতে। অবোধ কিশোৰ পাৱাৰৰ সর্বভাৰতীয় ৰেঙ্ক আহে ৬৫৭। বাকীখিনি এতিয়া সকলোৰে সন্মুখত৷
