দীপাৱলীৰ নিশা ফটকা ফুটোৱাৰ বাবে অশান্তি আৰু তাৰ ফলত কাজিয়াৰ সৃষ্টি হয়। অৱশেষত সংঘটিত হয় এক ৰক্তাক্ত ঘটনা (Diwali Accident)। চুবুৰীয়াৰ গুলীত গুৰুতৰভাৱে আহত হয় ৰাষ্ট্ৰপতিৰ দেহৰক্ষী। তেওঁৰ মূৰত গুলী লাগে। ৰাষ্ট্ৰপতি ভৱনৰ নিৰাপত্তাৰ দায়িত্বত থকা সেনা জোৱানসকলৰ ভিতৰত আছিল সৌৰভ টোমাৰ। তেওঁৰ ঘৰ উত্তৰ প্ৰদেশৰ বাঘপাটত। দীপাৱলী বন্ধৰ বাবে তেওঁ ঘৰলৈ গৈছিল। আৰক্ষীৰ সূত্ৰ অনুসৰি, সৌৰভে দীপাৱলীৰ নিশা নিজৰ ঘৰৰ সন্মুখত পৰিয়ালৰ আন সদস্যৰ সৈতে ফটকা ফুটাইছিল।
কিন্তু দুই চুবুৰীয়া ধীৰাজ আৰু মনুৱে তাক লৈ আপত্তি কৰে। তেওঁলোক সম্পৰ্কত দুয়ো ভাই। ইয়াক লৈ ধীৰাজ আৰু সৌৰভৰ ভায়েক বিনীতৰ মাজত বিবাদ আৰম্ভ হয়। এই তৰ্কৰ ফলত কাজিয়াৰ সৃষ্টি হয়। অভিযোগ অনুসৰি, হঠাতে এটা পিষ্টল উলিয়াই ধীৰাজে গুলীচালনা কৰে। গুলীটোৱে প্ৰথমে বেৰত খুন্দা মাৰে। সেই বেৰৰ ওচৰত সৌৰভ থিয় হৈ আছিল। বেৰত খুন্দা মৰাৰ পিছতে সৌৰভৰ মূৰত খুন্দা মাৰে গুলীটোৱে। ঘটনাক লৈ অঞ্চলটোত উত্তেজনা বিয়পি পৰে। অভিযোগ অনুসৰি, ধীৰাজে সৌৰভৰ পৰিয়ালক হত্যাৰ ভাবুকি দিছিল। ইয়াৰ পিছত তেওঁ সেই অঞ্চলৰ পৰা পলায়ন কৰে।
২৬ বছৰীয়া সৌৰভক গুৰুতৰ অৱস্থাত চিকিৎসালয়লৈ লৈ যোৱা হয়। চিকিৎসকে অস্ত্ৰোপচাৰৰ পিছত গুলীটো উলিয়াই দিয়ে। বৰ্তমান তেওঁৰ অৱস্থা সুস্থিৰ। ইতিমধ্যে অভিযুক্তৰ বিৰুদ্ধে থানাত এজাহাৰ দাখিল কৰা হয়। সেই অভিযোগৰ ভিত্তিত আৰক্ষীয়ে অভিযুক্ত দুজনৰ বিৰুদ্ধে হত্যাৰ চেষ্টাৰ গোচৰ ৰুজু কৰে। অৱশ্যে এতিয়াও সন্ধানহীন হৈ আছে দুয়োজন অভিযুক্ত। তদন্তকাৰী আৰক্ষী বিষয়া অংশু জৈনে কয় যে অভিযুক্তৰ সন্ধান অব্যাহত আছে। শীঘ্ৰে গ্ৰেপ্তাৰ কৰা হ’ব তেওঁলোকক। জানিব পৰা মতে, প্ৰায় দুবছৰ পূৰ্বে সৌৰভৰ বিয়া হৈছিল। তেওঁলোকৰ এটা নমহীয়া সন্তান আছে।
