গুৱাহাটী, ৬ নৱেম্বৰঃ ভাৰতৰত্ন সন্মানেৰে বিভূষিত সুধাকণ্ঠ ড° ভূপেন হাজৰিকাৰ (Bhupen Hazarika) জন্ম শতবাৰ্ষিকী উদযাপনৰ সামৰণি অনুষ্ঠান অহা ২৯ নৱেম্বৰত নতুন দিল্লীৰ ভাৰত মণ্ডপমত অনুষ্ঠিত হ’ব। এই অনুষ্ঠানত প্ৰধানমন্ত্ৰী নৰেন্দ্ৰ মোদী মুখ্য অতিথি হিচাপে উপস্থিত থকাৰ কথা।
সন্ধিয়া ৬ বজাৰ পৰা নিশা ৮ বজালৈ অনুষ্ঠিত হ’বলগীয়া এই অনুষ্ঠানত দেশৰ বিভিন্ন প্ৰান্তৰ বিশিষ্ট শিল্পীৰ লগতে অসমৰ কেইবাগৰাকীও জনপ্ৰিয় শিল্পীয়ে অংশগ্ৰহণ কৰিব।
অনুষ্ঠানতে প্ৰখ্যাত সংগীতশিল্পী ঊষা মংগেশকাৰক প্ৰথমবাৰৰ বাবে প্ৰৱৰ্তন কৰা ভাৰতৰত্ন ড° ভূপেন হাজৰিকা ৰাষ্ট্ৰীয় বঁটা প্ৰদান কৰা হ’ব। প্ৰধানমন্ত্ৰী নৰেন্দ্ৰ মোদীয়ে এই বঁটা প্ৰদান কৰাৰ কথা।
অনুষ্ঠানত অংশগ্ৰহণৰ বাবে বিশেষ পৰ্টেল মুকলি
সামৰণি অনুষ্ঠানত অংশগ্ৰহণ কৰিব বিচৰা লোকসকলৰ সুবিধাৰ বাবে এটা বিশেষ অনলাইন পৰ্টেল মুকলি কৰা হৈছে। এই পৰ্টেলৰ জৰিয়তে ই-নিমন্ত্ৰণী পত্ৰ লাভ কৰিব পাৰিব আগ্ৰহী লোকসকলে।
অৱশ্যে সাধাৰণ অংশগ্ৰহণকাৰীৰ নতুন দিল্লীলৈ অহা-যোৱাৰ খৰচ অসম চৰকাৰে বহন নকৰে। অংশগ্ৰহণ কৰিব বিচৰা লোকসকলে নিজাববীয়াকৈ যাতায়াতৰ ব্যৱস্থা কৰিব লাগিব।
আনহাতে, অনুষ্ঠানত অংশগ্ৰহণৰ বাবে অসমৰ ১ হাজাৰ কলেজীয়া ছাত্ৰ-ছাত্ৰীক নিয়াৰ ব্যৱস্থা কৰা হৈছে। এই ছাত্ৰ-ছাত্ৰীসকলৰ অহা-যোৱাৰ খৰচ অসম চৰকাৰে বহন কৰিব।
এহেজাৰ শিল্পীৰ সমবেত কণ্ঠত সুধাকণ্ঠৰ অমৰ গীত
জন্ম শতবাৰ্ষিকী উদযাপনৰ প্ৰথম পৰ্যায়ত ড° ভূপেন হাজৰিকাৰ কালজয়ী গীত ‘মানুহে মানুহৰ বাবে’ পৰিৱেশন কৰা এহেজাৰ শিল্পীয়ে সামৰণি অনুষ্ঠানতো সমবেত সংগীত পৰিৱেশন কৰিব।
অনুষ্ঠানত ৰাষ্ট্ৰীয় পৰ্যায়ৰ শিল্পীসকলে সুধাকণ্ঠৰ গীত পৰিৱেশন কৰাৰ লগতে অসমৰ তৰালি শৰ্মা, জুবিন বৰুৱা, নাহিদ আফ্ৰিন, আচুৰ্য বৰপাত্ৰ গোহাঁই আৰু দীক্ষু শৰ্মাকে ধৰি কেইবাগৰাকীও শিল্পীয়ে অংশগ্ৰহণ কৰাৰ কথা জানিব পৰা গৈছে।
অনুষ্ঠানত ড° ভূপেন হাজৰিকাৰ জীৱন আৰু সৃষ্টিৰাজিৰ ওপৰত এখন তথ্যচিত্ৰ প্ৰদৰ্শনৰ ব্যৱস্থা কৰা হৈছে। ইয়াৰ উপৰি পাঁচ মিনিটৰ এটা বিশেষ দৃশ্য-শ্ৰাব্য অনুষ্ঠান থাকিব। এই অনুষ্ঠানৰ চিত্ৰনাট্য প্ৰস্তুতৰ সৈতে অনুৰাগ শইকীয়া জড়িত আছে।
সামৰণি অনুষ্ঠান সুকলমে অনুষ্ঠিত কৰাৰ বাবে অসম চৰকাৰৰ কেবিনেট মন্ত্ৰীৰ তত্ত্বাৱধানত এখন সমিতি গঠন কৰা হৈছে। অনুষ্ঠানলৈ বিভিন্ন দল-সংগঠনকো নিমন্ত্ৰণ জনোৱাৰ ব্যৱস্থা কৰা হৈছে।
ড° ভূপেন হাজৰিকাৰ সংগীত, মানৱতাবাদী চিন্তা আৰু সৃষ্টিৰাজিক ৰাষ্ট্ৰীয় পৰ্যায়ত তুলি ধৰাৰ উদ্দেশ্যে এই বিশেষ সামৰণি অনুষ্ঠানৰ আয়োজন কৰা হৈছে।
