পঞ্জাবৰ বিধানসভা নিৰ্বাচনৰ পূৰ্বে আম আদমি পাৰ্টীৰ মুখ্যমন্ত্ৰী ভগৱন্ত সিং মান বিপদত পৰিছে (Punjab CM Mann)। শিখসকলৰ সৰ্বোচ্চ ধৰ্মীয় সংস্থা অকাল তখ্তে তেওঁক ‘গুৰুবিৰোধী’ বুলি ঘোষণা কৰিছে। এই সিদ্ধান্ত মুখ্যমন্ত্ৰী মানৰ আপত্তিজনক মন্তব্য আৰু এটা বিতৰ্কিত ভিডিঅ’ৰ ওপৰত ভিত্তি কৰি লোৱা হৈছে।
সোমবাৰে অকাল তখ্তে কয় যে শিখসকলে ভগৱন্তৰ লগত সম্পৰ্ক ৰাখিব নালাগে। এই সন্দৰ্ভত এতিয়ালৈকে ৰাজ্যখনৰ মুখ্যমন্ত্ৰীৰ কোনো সঁহাৰি পোৱা নাই।
কেইবাদিনো পূৰ্বে ভাইৰেল হোৱা এটা ভিডিঅ’ক লৈ বিতৰ্ক আৰম্ভ হৈছিল । ভিডিঅ’টোত শিখ গুৰুৰ ছবিত সুৰা ঢালি দিয়া দেখা গৈছে। তাত ভগৱন্তো উপস্থিত আছিল বুলি অভিযোগ উঠিছে। বিতৰ্ক তীব্ৰতৰ হোৱাৰ লগে লগে পঞ্জাবৰ মুখ্যমন্ত্ৰীয়ে এই ভিডিঅ’টো ভুৱা বুলি দাবী কৰে।
ই আছিল কৃত্ৰিম বুদ্ধিমত্তাৰে সৃষ্টি কৰা। কিন্তু অকাল তখ্তে কয় যে ফৰেনছিক পৰীক্ষাত দেখা গৈছে যে ভিডিঅ’টো ভুৱা নহয়। ইয়াৰ বাহিৰেও শিখ ভক্তৰ বিষয়ে আপত্তিজনক মন্তব্য কৰাৰ অভিযোগত তখ্তে মানক তলৱ কৰিছিল।
যোৱা ১৫ জানুৱাৰীত আপ নেতাগৰাকী হাজিৰো হৈছিল। তখ্তে তেওঁক প্ৰশ্ন কৰে যে তেওঁৰ দৰে দেখা এজন ব্যক্তিয়ে শিখ গুৰুৰ ছবিত সুৰা ঢালি দিয়া দেখা গৈছে। পঞ্জাবৰ মুখ্যমন্ত্ৰীয়ে এই অভিযোগ সম্পূৰ্ণৰূপে অস্বীকাৰ কৰি কয়, “এয়া এ আইৰে কৰা হৈছে।”
সোমবাৰে জানিব পৰা মতে, ফৰেনছিক পৰীক্ষাত এই ভিডিঅ’টো বাস্তৱ বুলি প্ৰমাণিত হৈছে। কিন্তু আপে কয় যে এই পৰীক্ষাত ব্যক্তিজন প্ৰকৃততে মুখ্যমন্ত্ৰী হয়নে নহয় সেই কথা জানিব পৰা হোৱা নাই। ইফালে তখ্তৰ হৈ জাথেদৰ কুলদীপ সিং গৰ্গাজে তেওঁলোকৰ ৰায় ঘোষণা কৰে।
তেওঁ কয়, “যেতিয়া আমি মুখ্যমন্ত্ৰীক ভিডিঅ’টো সন্দৰ্ভত সোধা-পোছা কৰিছিলোঁ তেতিয়া তেওঁ দাবী কৰিছিল যে এই ভিডিঅ’টো এ আইৰে কৰা হৈছে। আমি তেওঁৰ পৰা ইয়াৰ প্ৰমাণ বিচাৰিছিলোঁ। কিন্তু আমি ছমাহ ধৰি কোনো সঁহাৰি নাপালোঁ। ইয়াৰ পিছত আমি ভাৰত চৰকাৰৰ স্বীকৃতিপ্ৰাপ্ত দুটা লেবৰেটৰীত ভিডিঅ’টো পৰীক্ষা কৰালোঁ। তাত দেখা গ’ল যে ভিডিঅ’টো ভুৱা নহয়, এ আই-সৃষ্টিও নহয়। গতিকে আমি আজি ব্যৱস্থা গ্ৰহণ কৰিলোঁ।”
