এইবাৰ ইৰাণৰ আক্ৰমণৰ প্ৰতিশোধ ল’লে ইজৰাইলে। কেইবাটাও আন্তঃৰাষ্ট্ৰীয় সংবাদ মাধ্যমৰ জৰিয়তে প্ৰকাশ পাইছে যে ইজৰাইলে তেহৰাণত (Israel in Tehran) একাধিক ক্ষেপণাস্ত্ৰ আক্ৰমণ (Missile Attack) চলায়। জানিব পৰা মতে, ইৰাণৰ ৰাজধানীকে ধৰি কেইবাখনো চহৰত তীব্ৰ বিস্ফোৰণৰ শব্দ শুনা যায়। ইজৰাইলৰ দাবী যে তেওঁলোকে ইৰাণৰ সামৰিক ঘাটিত আক্ৰমণ কৰিছিল। এই পৰিস্থিতিয়ে আমেৰিকাত ফুটবল বিশ্বকাপ আৰম্ভ হোৱাৰ ঠিক আগতে মধ্যপ্ৰাচ্যত নতুন উত্তেজনাৰ সৃষ্টি হৈছে। ফলত আমেৰিকা-ইৰাণৰ শান্তি আলোচনা অধিক জটিল হৈ পৰিছে। স্থানীয় সংবাদ মাধ্যমৰ বাতৰি অনুসৰি, সোমবাৰে পুৱাতেই তেহৰাণৰ বিভিন্ন অঞ্চলত আনকি মেহৰাবাদ আন্তঃৰাষ্ট্ৰীয় বিমানবন্দৰৰ ওচৰতো বিস্ফোৰণৰ শব্দ শুনা যায়।
ইছফাহান আৰু তাব্ৰিজতো বিস্ফোৰণৰ খবৰ পোৱা গৈছে। উল্লেখ্য যে ইৰাণে দেওবাৰে নিশা উত্তৰ ইজৰাইলৰ কেইবাখনো চহৰত মুঠ ১০টা বেলিষ্টিক মিছাইল নিক্ষেপ কৰে।
ইয়াৰ বাবেই কেইবাটাও অঞ্চলত চাইৰেন বাজি উঠে। তেহৰাণে দাবী কৰিছে যে শেহতীয়াকৈ বেইৰুটত ইজৰাইলৰ আক্ৰমণৰ প্ৰতি সঁহাৰি জনাই এই ক্ষেপণাস্ত্ৰ আক্ৰমণ সংঘটিত কৰা হৈছে। কিন্তু ইৰাণে বাৰে বাৰে উল্লেখ কৰি আহিছে যে লেবাননত ইজৰাইলৰ সামৰিক অভিযান বন্ধ নহ’লে কোনো বৃহৎ শান্তি চুক্তি সম্ভৱ নহয়।
আনহাতে, ইজৰাইলৰ মতে ইৰাণৰ সৈতে হোৱা শান্তি চুক্তিখন লেবাননত হিজবুল্লাৰ বিৰুদ্ধে চলোৱা অভিযানৰ সৈতে বিভ্ৰান্ত কৰা উচিত নহয়। ইফালে আমেৰিকাৰ ৰাষ্ট্ৰপতি ড’নাল্ড ট্ৰাম্পে দাবী কৰিছে যে তেওঁ ব্যক্তিগতভাৱে ইজৰাইলৰ প্ৰধানমন্ত্ৰী বেঞ্জামিন নেতানিয়াহুক প্ৰতিশোধমূলক আক্ৰমণৰ পৰা বিৰত থাকিবলৈ কৈছিল।
ফাইনেন্সিয়েল টাইমছৰ সৈতে হোৱা এক সাক্ষাৎকাৰত ট্ৰাম্পে কয়, “এই চুক্তিত কোনো প্ৰভাৱ নপৰে। ময়ে সকলো সিদ্ধান্ত লওঁ।” আমেৰিকাৰ কেইবাটাও সংবাদ মাধ্যমে দাবী কৰে যে দেওবাৰে ট্ৰাম্পে নেতানিয়াহুক ইৰাণক আক্ৰমণ নকৰিবলৈ ফোনযোগে পৰামৰ্শ দিছিল। কাৰণ ৱাশ্বিংটন আৰু তেহৰাণৰ মাজত শান্তি চুক্তিৰ আলোচনা বহু আগবাঢ়িছে। অৱশ্যে ট্ৰাম্পৰ অনুৰোধৰ পিছতো ইজৰাইলে বেইৰুটত আক্ৰমণ কৰে। ইয়াৰ কিছু সময়ৰ পাছতে ইৰাণে ক্ষেপণাস্ত্ৰ আক্ৰমণ চলায়। পিছত ইজৰাইলৰ প্ৰতিৰক্ষা বাহিনীয়ে ইৰাণৰ সামৰিক ঘাটিক লক্ষ্য কৰি প্ৰতিশোধ লোৱা বুলি কয়।
