সৰ্বভাৰতীয় চিকিৎসা প্ৰৱেশ পৰীক্ষা (NEET-UG) প্ৰশ্নকাকত ফাদিল হোৱাৰ তদন্ত এতিয়াও অব্যাহত আছে। ইফালে উত্তৰ প্ৰদেশ (Uttar Pradesh)ৰ বিশেষ টাস্ক ফ’ৰ্চে (Special Task Force) চৰকাৰী চাকৰিৰ প্ৰাৰ্থীক উত্তীৰ্ণ কৰাৰ নামত এক বৃহৎ জালিয়াতিৰ চক্ৰ উদঘাটন কৰিছে। এছটিএফৰ সূত্ৰ অনুসৰি, কৰ্মচাৰী বাছনি আয়োগৰ পৰীক্ষাত পৰীক্ষাৰ্থীক উত্তীৰ্ণ কৰাৰ নামত এক বৃহৎ জালিয়াতিৰ চক্ৰ (Circle of fraud) চলি আছিল। প্ৰৱঞ্চনা চক্ৰটোৱে পৰীক্ষাৰ্থীক প্ৰতিশ্ৰুতি দিছিল যে ৪ লাখ টকা দিলে পৰীক্ষাত উত্তীৰ্ণ হ’ব।
গোপন সূত্ৰৰ পৰা তথ্য লাভ কৰিছিল এছটিএফে। ইয়াৰ পিছতে ৰাজ্যজুৰি অনুসন্ধান অভিযান আৰম্ভ কৰে। গ্ৰেটাৰ নয়ডাৰ এটা পৰীক্ষা কেন্দ্ৰতো অভিযান চলোৱা হয়। তাত চক্ৰটোৰ ‘মাষ্টাৰমাইণ্ড’কে ধৰি ৭জন লোকক গ্ৰেপ্তাৰ কৰা হয়। গ্ৰেপ্তাৰ কৰা লোকসকলৰ পৰা নগদ ৫০ লাখ টকা, লেপটপ, মোবাইল ফোন আৰু পৰীক্ষা সম্পৰ্কীয় বিভিন্ন নথি-পত্ৰ উদ্ধাৰ কৰা হৈছে বুলি এছটিএফে জানিবলৈ দিয়ে। প্ৰথম অৱস্থাত তদন্তকাৰীয়ে সন্দেহ কৰিছিল যে এই গেঙে ‘ছ’লভাৰ’ হিচাপে কাম কৰি আছে।
তদন্তকাৰীয়ে আৰু জানিব পাৰিছে যে এই চক্ৰটোৱে লাখ লাখ টকাৰ বিনিময়ত অৰ্ধসামৰিক বাহিনী, সচিবালয় নিৰাপত্তা বাহিনী, কনিষ্টবল জি ডি আৰু আছাম ৰাইফলছৰ পৰীক্ষাতো উত্তীৰ্ণ হোৱাৰ কাম কৰি আছিল। ই বিভিন্ন প্ৰযুক্তি ব্যৱহাৰ কৰি অনলাইন চাকৰি পৰীক্ষাত পৰীক্ষাৰ্থীক উত্তৰ প্ৰদান কৰিছিল। শুকুৰবাৰে গ্ৰেটাৰ নয়দাৰ নলেজ পাৰ্ক অঞ্চলত তালাচী চলাই প্ৰদীপ চৌহান, অৰুণ কুমাৰ, সন্দীপ ভাটি, নিশান্ত ৰাঘৱ, অমিত ৰানা, ছাকিৰ মালিক আৰু বিবেক কুমাৰক গ্ৰেপ্তাৰ কৰা হয়।
তদন্তকাৰীয়ে জনোৱা মতে, প্ৰদীপ চৌহানে দীৰ্ঘদিন ধৰি এই গেংটো চলাই আহিছিল। অৰুণ কুমাৰে আগতে প্ৰযুক্তিৰ দিশটো চম্ভালিছিল। গ্ৰেপ্তাৰ বাকীসকলৰ ভূমিকা সম্পৰ্কে তদন্ত অব্যাহত ৰাখিছে এছটিএফে। উল্লেখ্য যে নীট প্ৰশ্ন ফাদিল আৰু পৰৱৰ্তী সময়ত পৰীক্ষা বাতিল হোৱাক লৈ সমগ্ৰ দেশত হুলস্থুলীয়া পৰিস্থিতিৰ সৃষ্টি হোৱাৰ সময়তে উত্তৰ প্ৰদেশত এছ এছ চি পৰীক্ষাৰ নকল চক্ৰ ধৰা পৰাৰ পিছত ৰাজ্য প্ৰশাসনে তৎপৰতাৰে ব্যৱস্থা গ্ৰহণ কৰিছে।
