এয়াৰ ইণ্ডিয়াৰ বিমানত (Air India) একেদিনাই একেটা পথতে দুটাকৈ দুৰ্ঘটনা সংঘটিত হয়। দিল্লী-বেংগালুৰু বিমানৰ অৱতৰণৰ সময়ত ৰাণৱেত ঘৰ্ষণ হয়। সন্ধিয়া বেংগালুৰু-দিল্লী বিমানখনৰ ইঞ্জিনত জুইৰ শিখা দেখা যায়।
জৰুৰী অৱস্থাত বিমানখন অৱতৰণ কৰিবলগীয়া হয়। অৱশ্যে দুয়োটা ক্ষেত্ৰতে আটাইকেইজন যাত্ৰী সুৰক্ষিত আছে। কোনো লোক আহত হোৱা নাই। এক বৃহৎ দুৰ্যোগৰ পৰা কথমপি ৰক্ষা পৰে এয়াৰ ইণ্ডিয়া।
এয়াৰ ইণ্ডিয়াৰ বিমান AI2802 বেংগালুৰুৰ পৰা দিল্লী অভিমুখে ৰাওনা হৈছিল।
কৰ্তৃপক্ষই জনোৱা মতে, দিল্লীত অৱতৰণ কৰাৰ ঠিক আগতে ককপিটত থকা ক্ৰুৱে ইঞ্জিনৰ পৰা অগ্নিকাণ্ডৰ সতৰ্কবাণী লাভ কৰে। পৰীক্ষা কৰাৰ লগে লগে দেখা যায় যে সতৰ্কবাণীটো সঁচা। ইয়াৰ পিছত সকলো নীতি-নিয়ম পালন কৰি জৰুৰীকালীন ভিত্তিত বিমানখন অৱতৰণ কৰা হয়। কোনো লোক আহত হোৱা নাই।
বিমান সংস্থাটোৰ এগৰাকী মুখপাত্ৰই কয়, “বেংগালুৰুৰ পৰা দিল্লীলৈ যোৱা পথত সংঘটিত এই ঘটনাৰ বিষয়ে আমি অৱগত। বিমানখন নিৰাপদে অৱতৰণ কৰা হৈছে আৰু সকলো যাত্ৰী আৰু ক্ৰু নিৰাপদে আছে। আমি এই সন্দৰ্ভত অধিক তথ্য সংগ্ৰহ কৰিবলৈ চেষ্টা কৰিছো। সংশ্লিষ্ট কৰ্তৃপক্ষৰ সৈতে আমি যোগাযোগত আছো। অধিক সবিশেষ পোৱাৰ লগে লগে আমি আপোনালোকক অৱগত কৰিম।”
ইয়াৰ পূৰ্বে এয়াৰ ইণ্ডিয়াৰ বিমান AI-2651 দিল্লীৰ পৰা বেংগালুৰুলৈ যোৱাৰ পথত দুৰ্ঘটনাগ্ৰস্ত হয়। বিমানখনত মুঠ ১৭৯ জন যাত্ৰী আছিল। অৱতৰণৰ সময়ত বেংগালুৰু বিমানবন্দৰত বিমানখনৰ পিছফালটোৱে ৰাণৱেত ঘৰ্ষণ কৰে। যাত্ৰীসকলে ভিতৰত প্ৰচণ্ড জোকাৰণি অনুভৱ কৰে। অৱশ্যে সকলোকে নিৰাপদে বিমানৰ পৰা আঁতৰাই নিয়া হয়। কোনো লোক আহত হোৱা নাই। কৰ্তৃপক্ষই দুৰ্ঘটনাৰ কাৰণৰ তদন্ত অব্যাহত ৰাখিছে।
যাত্ৰীসকলৰ ওচৰত ক্ষমা বিচাৰিছে। একেখন বিমানেই দিল্লীলৈ উভতি যোৱাৰ কথা আছিল। কিন্তু পৰিস্থিতিৰ প্ৰতি লক্ষ্য ৰাখি বাতিল কৰা হয়। সংশ্লিষ্ট বিমানখন সম্প্ৰতি সেৱাৰ পৰা আঁতৰাই দিয়া হৈছে বুলি সূত্ৰই প্ৰকাশ কৰিছে। সেইদিনা সন্ধিয়া একেটা পথতে একেখন বিমানতে পুনৰ আতংকৰ পৰিস্থিতিৰ সৃষ্টি হয়।
