অৱশেষত চৰকাৰ গঠনৰ বাবে প্ৰয়োজনীয় মেজিক নম্বৰ বা যাদুকৰী সংখ্যা লাভ কৰিলে ‘থালাপতি’ বিজয়ে (‘Thalapathi’ Vijay)। বিজয়ৰ দল টিভিকেৰ এক সূত্ৰই জনাইছে যে কংগ্ৰেছ, ভিচিকেৰ লগতে দুটা বাওঁপন্থী দল চিপিই(এম) আৰু চিপিআয়ে তেওঁলোকৰ প্ৰতি সমৰ্থন ঘোষণা (Declaration of support) কৰিছে। বিজয়ে এই চাৰিটা দলৰ সমৰ্থন লাভ কৰিলে সহজেই যাদুকৰী নম্বৰত উপনীত হ’ব।
টিভিকেৰ (TVK) সূত্ৰ অনুসৰি, বিজয়ে শুকুৰবাৰে বিয়লি লোকভৱনত তামিলনাডুৰ ৰাজ্যপাল ৰাজেন্দ্ৰ বিশ্বনাথ আৰ্লেকাৰক সাক্ষাৎ কৰিব। তাত তেওঁ চৰকাৰ গঠনৰ দাবী উত্থাপন কৰিব। ৰাজভৱন এৰাৰ পিছত টিভিকে, কংগ্ৰেছ আৰু বাওঁপন্থী দলৰ নেতাসকলে যৌথ সংবাদমেল অনুষ্ঠিত কৰিব পাৰে।
২৩৪ খন আসনৰ তামিলনাডু বিধানসভাত টিভিকেয়ে ১০৭ খন আসন লাভ কৰিছে। চৰকাৰ গঠনৰ বাবে মুঠ ১১৮ জন বিধায়কৰ প্ৰয়োজন। পাঁচজন কংগ্ৰেছ, দুজন ভিচিকে, দুজন চিপিআই(এম) আৰু দুজন চিপিআই বিধায়কে টিভিকেক সমৰ্থন কৰা বুলি জানিব পৰা গৈছে। ইয়াৰ পূৰ্বে বিজয়ে একক বৃহত্তম দল হিচাপে তামিলনাডুৰ ৰাজ্যপালক সাক্ষাৎ কৰি চৰকাৰ গঠনৰ বাবে অনুৰোধ জনাইছিল। কিন্তু ৰাজ্যপালে স্পষ্ট কৰি দিয়ে যে টিভিকেয়ে প্ৰথমে সংখ্যাগৰিষ্ঠতা প্ৰমাণ কৰিব লাগিব।
