সকলো জল্পনা-কল্পনাৰ অন্ত পেলাই শুকুৰবাৰে কেন্দ্ৰীয় গৃহমন্ত্ৰী অমিত শ্বাহে (Home minister Amit Shah) ২০৭ গৰাকী বিজেপি বিজয়ী প্ৰাৰ্থীক সাক্ষাৎ কৰি শুভেন্দু অধিকাৰী (Shubendu Adhikari)ক পশ্চিমবংগ বিধানসভাৰ নেতা হিচাপে নিৰ্বাচিত কৰে। শাসকীয় দলৰ নেতা হিচাপে ৰাজ্যৰ পৰৱৰ্তী মুখ্যমন্ত্ৰী হ’ব শুভেন্দু (Next Chief Minister will be Suvendu)। শনিবাৰে কলকাতাৰ ব্ৰিগেড পেৰেড খেলপথাৰত শপত গ্ৰহণ কৰিব নতুন চৰকাৰে। বিধায়িনী দলৰ বৈঠকৰ অন্তত শ্বাহে কয়, “বিধায়িনী দলৰ নেতা নির্বাচনৰ প্রক্রিয়া সম্পূর্ণ হৈছে৷ আঠটা প্রস্তাৱ আহে৷ আটাইকেইটা প্রস্তাৱতে এটা নাম আছিল৷ দ্বিতীয় নামটোৰ বাবে পৰ্যাপ্ত সময় দিয়া হয়৷ কিন্তু দ্বিতীয় নাম নাহিল৷ সেয়ে শুভেন্দু অধিকাৰীক পশ্চিমবংগৰ মুখ্যমন্ত্রী হিচাপে ঘোষণা কৰিছোঁ৷” যিকোনো ৰাজ্যৰ নিৰ্বাচনৰ পিছত বিজেপিৰ কেন্দ্ৰীয় নেতৃত্বই ৰাজ্যখনলৈ কেন্দ্ৰীয় পৰ্যবেক্ষক পঠিয়াই বিধানসভাৰ বিধায়িনী দলৰ নেতা নিৰ্বাচন কৰে।
এইবাৰ পশ্চিমবংগৰ ক্ষেত্ৰত অমিত শ্বাহক মুখ্য পৰ্যবেক্ষক হিচাপে নিযুক্তি দিয়া হয়। তেওঁৰ লগতে চুবুৰীয়া ৰাজ্য ওড়িশাৰ মুখ্যমন্ত্ৰী মোহন চৰণ মাঝিকো সহকাৰী পৰ্যবেক্ষকৰ দায়িত্ব দিয়া হয়। তেওঁলোকৰ তত্ত্বাৱধানত শুকুৰবাৰে বিয়লি নিউ টাউনৰ বিশ্ব বাংলা কনভেনচন চেণ্টাৰত সম্ভাৱ্য বিধায়কসকলৰ এখন বৈঠক অনুষ্ঠিত হয়। তাতে সৰ্বসন্মতিক্ৰমে শুভেন্দুৰ নাম বিধায়িনী দলৰ নেতা আৰু মুখ্যমন্ত্ৰী হিচাপে সিদ্ধান্ত লোৱা হয়। বৈঠকৰ অন্তত বিজেপি নেতৃত্বই নতুন মুখ্যমন্ত্রীৰ নাম ঘোষণা কৰে৷ এইবাৰ বিধায়কসকলৰ সহযোগত লোকভৱনলৈ গৈ শুভেন্দু ৰাজ্যপাল আৰ এন ৰবিক চৰকাৰ গঠনৰ বাবে অনুৰোধ জনাব। শুভেন্দুৰ নাম ঘোষণা কৰাৰ পিছত অমিত শ্বাহে কয়, “গংগোত্ৰীৰ পৰা গংগাসাগৰলৈকে সকলোতে বিজেপি চৰকাৰ গঠন হৈছে। শ্যামাপ্ৰসাদ মুখাৰ্জীৰ জন্মস্থানত শ্যামাপ্ৰসাদ মুখাৰ্জীৰ আদৰ্শ অনুসৰণ কৰি এখন চৰকাৰ গঠন কৰা হৈছে।”
