কেৰালাত আতচবাজী কাৰখানা বিস্ফোৰণত (Kerala Blast) ১৩ জন লোকৰ মৃত্যু হয়। মঙলবাৰে বিয়লি থালাপিল্লীৰ মুণ্ডাথিক্কোডুৰ এটা গুদামত সংঘটিত হয় এই বিস্ফোৰণ। বিস্ফোৰণটো দ্ৰুতগতিত বিয়পি পৰে।
জানিব পৰা মতে, গুদামত ত্ৰিশূৰ পূৰাম উৎসৱৰ বাবে আতচবাজী মজুত কৰা আছিল। স্থানীয় সংবাদ মাধ্যমৰ সূত্ৰ অনুসৰি, পূৰাম মহোৎসৱৰ আয়োজনৰ দায়িত্ব দুটা মূল গোটৰ। তাৰে এটা হ’ল তিৰুবাম্বদী দেৱস্বম।
এই গোটটোক মহোৎসৱৰ বাবে আতচবাজী বনোৱাৰ দায়িত্ব দিয়া হৈছিল। জানিব পৰা মতে, মঙলবাৰৰ বিস্ফোৰণত বহু লোক আহত হয়। ইয়াৰে অধিকাংশই তিৰুভাম্বদী দেৱস্বমৰ কৰ্মচাৰী।
খবৰ পোৱাৰ লগে লগে অগ্নিনিৰ্বাপক বাহিনী ঘটনাস্থলীত উপস্থিত হয়। ওচৰৰ চিকিৎসালয়ৰ পৰাও এখন এম্বুলেন্স প্ৰেৰণ কৰা হয়। আহতসকলক উদ্ধাৰ কৰি ত্ৰিশূৰ চিকিৎসা মহাবিদ্যালয়ৰ লগতে অন্যান্য চিকিৎসালয়লৈ প্ৰেৰণ কৰা হয়। ইয়াৰে কিছুমানৰ অৱস্থা সংকটজনক।
অগ্নিনিৰ্বাপক বাহিনীৰ এগৰাকী বিষয়াই কয়, “প্ৰায় ৩.৩০ বজাত আমি বিস্ফোৰণৰ খবৰ পাইছিলোঁ। ফটকা কাৰখানাটো ধাননি পথাৰত আছিল। অৱশ্যে বিস্ফোৰণৰ প্ৰভাৱ যথেষ্ট বৃহৎ আছিল। আমি খৰখেদাকৈ উক্ত অঞ্চলত উপস্থিত হ’বলগীয়া হয়।”
বিস্ফোৰণৰ কাৰণ এতিয়াও স্পষ্ট হোৱা নাই। বিস্ফোৰণৰ বাবে ধাননি পথাৰত শৰীৰৰ বহু অংশ সিঁচৰতি হৈ পৰিছে। মৃত আটাইকেইজনৰ পৰিচয় এতিয়াও হোৱা নাই বুলি আৰক্ষীৰ সূত্ৰই প্ৰকাশ কৰিছে। কেৰালা দুৰ্ঘটনাক লৈ শোক প্ৰকাশ কৰিছে প্ৰধানমন্ত্ৰী নৰেন্দ্ৰ মোদীয়ে।
প্ৰধানমন্ত্ৰীৰ কাৰ্যালয়ে মৃতকৰ পৰিয়াললৈ ২ লাখ টকাকৈ আৰ্থিক সাহায্য প্ৰদানৰ কথা ঘোষণা কৰিছে। আহতসকলৰ আশু আৰোগ্যৰ বাবে তেওঁ প্ৰাৰ্থনা কৰিছে। কিছুদিন পূৰ্বে ছত্তীশগড়ৰ শক্তি জিলাৰ বেদান্ত ইণ্ডাষ্ট্ৰীজ গ্ৰুপৰ তাপ শক্তি কেন্দ্ৰত বয়লাৰ বিস্ফোৰণত ২৩ জন লোকৰ মৃত্যু হৈছিল।
ঘটনা সন্দৰ্ভত বেদান্ত গ্ৰুপৰ অধ্যক্ষ অনিল আগৰৱালা, কোম্পানী মেনেজাৰ দেৱেন্দ্ৰ পেটেলকে ধৰি কেইবাগৰাকীও বিষয়াৰ বিৰুদ্ধে আৰক্ষীয়ে এফআইআৰ ৰুজু কৰি তদন্ত আৰম্ভ কৰিছে। উক্ত ঘটনাৰ পিছত কেৰালাৰ ত্ৰিশূৰত ফটকা কাৰখানাত বিস্ফোৰণ ঘটে।
