গৰমে দহিছে দিল্লী (Delhi heat wave)। ৰাষ্ট্ৰীয় ৰাজধানীত এপ্ৰিল মাহৰ মাজভাগতে তাপমাত্ৰাই ৪৪ ডিগ্ৰী চেলছিয়াছ স্পৰ্শ (Touching 44 degrees Celsius) কৰিছে। আগন্তুক চাৰি-পাঁচ দিনলৈ দেশৰ কেইবাখনো ৰাজ্যত গ্ৰীষ্মপ্ৰবাহৰ পৰিস্থিতি বিৰাজ কৰিব। উত্তৰ-পশ্চিম, মধ্য আৰু পূব ভাৰতৰ কেইবাটাও স্থানত তাপপ্ৰবাহ হ’ব বুলিও বতৰ বিজ্ঞান বিভাগে সকীয়াই দিছে৷ পঞ্জাবৰ চাৰিখন জিলা লুধিয়ানা, ছংগ্ৰুৰ, ফতেহগড় চাহাব আৰু পাটিয়ালাত ২৪ এপ্ৰিললৈকে তাপপ্ৰবাহ আৰু অতিপাত উত্তাপৰ পৰিস্থিতি অব্যাহত থাকিব।
আনহাতে, চণ্ডীগড় আৰু ইয়াৰ কাষৰীয়া অঞ্চলসমূহৰ বাবেও সতৰ্কবাণী জাৰি কৰা হৈছে। উত্তৰ-পশ্চিম ভাৰতৰ সৰ্বোচ্চ উষ্ণতা অহা ২৪ এপ্ৰিলৰ ভিতৰত ৪ ডিগ্ৰী চেলছিয়াছ বৃদ্ধি পাব বুলি বতৰ বিজ্ঞান বিভাগে প্ৰকাশ কৰিছে। দিল্লী, পঞ্জাবৰ পৰা ছত্তীশগড়লৈকে কেইবাখনো ৰাজ্যত গ্ৰীষ্মপ্ৰবাহ থাকিব পাৰে বুলি ভৱিষ্যদ্বাণী কৰা হৈছে। ফলত আগন্তুক চাৰি-পাঁচ দিনলৈ আৰু তাপমাত্ৰা অধিক বৃদ্ধি পাব। পঞ্জাব, ৰাজস্থান, হাৰিয়ানা, চণ্ডীগড়, দিল্লী আৰু ছত্তীশগড়ত অহা চাৰিদিনলৈ তাপপ্ৰবাহ থাকিব পাৰে বুলি বতৰ বিজ্ঞান বিভাগে প্ৰকাশ কৰিছে।
আনহাতে, উত্তৰ প্ৰদেশ, ঝাৰখণ্ড, পশ্চিমবংগ, মধ্যপ্ৰদেশ আৰু ওড়িশাৰ কিছু অংশত আগন্তুক পাঁচ দিনলৈ এই পৰিস্থিতি বিৰাজ কৰিব পাৰে। মঙলবাৰৰ পৰা দিল্লীত গ্ৰীষ্মপ্ৰবাহৰ সতৰ্কবাণী জাৰি কৰা হৈছে। আগন্তুক কেইদিনমান এনচিআৰ অত্যন্ত গৰম হৈ থাকিব। অৱশ্যে ২৫ এপ্ৰিলৰ পৰা তাপমাত্ৰা কিছু হ্ৰাস পাব। কিন্তু এপ্ৰিল মাহৰ শেষৰ ফালে পুনৰ তাপমাত্ৰা বৃদ্ধি হ’বলৈ আৰম্ভ কৰিব। বতৰ বিজ্ঞান বিভাগে মহাৰাষ্ট্ৰ আৰু ছত্তীশগড়ৰ বাবেও তাপপ্ৰবাহৰ সতৰ্কবাণী জাৰি কৰিছে। উক্ত ৰাজ্য দুখনৰ কিছু ঠাইত তাপমাত্ৰা ৪৩ ডিগ্ৰী চেলছিয়াছ স্পৰ্শ কৰিছে। বতৰ বিজ্ঞান বিভাগে জনোৱা মতে, পশ্চিম মধ্যপ্ৰদেশ, মহাৰাষ্ট্ৰৰ বিদৰ্ভ আৰু ছত্তীশগড়ৰ কিছু ঠাইত ২৩ এপ্ৰিললৈকে গৰমৰ পৰিস্থিতি অব্যাহত থাকিব।
