আৰক্ষীৰ জিম্মাত দুজন অভিযুক্তক প্ৰহাৰ কৰি হত্যা (Sentence to hang) কৰাৰ অপৰাধত মাদুৰাইৰ আদালতে এজন পৰিদৰ্শক পদৰ বিষয়াকে ধৰি ৯ জন আৰক্ষীক মৃত্যুদণ্ডৰ শাস্তি প্ৰদান কৰিছে। ৰায়দানত এই গোচৰটোক অত্যন্ত নিষ্ঠুৰতা আৰু ক্ষমতাৰ অপব্যৱহাৰেৰে চিহ্নিত “অতি বিৰল অপৰাধ” বুলি অভিহিত কৰা হৈছে।
দোষী সাব্যস্ত হোৱাসকলৰ ভিতৰত আছে পৰিদৰ্শক এছ শ্ৰীধৰ, উপ-পৰিদৰ্শক পি ৰঘু গণেশ আৰু কে বালকৃষ্ণন, মুখ্য কনিষ্টবল এছ মুৰুগান আৰু এ সমদুৰাই আৰু কনিষ্টবল এম মুধুৰাজ, এছ চেল্লাদুৰাই, এক্স থমাছ ফ্ৰান্সিছ আৰু এছ ভেইলুমুথু। দশম অভিযুক্ত বিশেষ উপ-পৰিদৰ্শক পালদুৰাইৰ বিচাৰৰ সময়ত কোভিডত আক্ৰান্ত হৈ মৃত্যু হয়।
২০২০ চনৰ জুন মাহত মাদুৰাইৰ সতনকুলামত আৰক্ষীৰ জিম্মাত ব্যৱসায়ী পি জয়ৰাজ (৫৯) আৰু তেওঁৰ পুত্ৰ জে বেনিক্সক (৩১) আৰক্ষীয়ে প্ৰহাৰ কৰি হত্যা কৰিছিল। কোভিড নিয়ম উলংঘা কৰাৰ অভিযোগত অভিযুক্তক গ্ৰেপ্তাৰ কৰা হয়। ছবছৰীয়া শুনানিৰ অন্তত একেলগে ৯ জন আৰক্ষীক মৃত্যুদণ্ডৰ শাস্তি প্ৰদান কৰা হয়, যিটো দেশৰ ইতিহাসত কাৰ্যতঃ বিৰল।
ন্যায়াধীশ জি মুধুকুমাৰনে এই গোচৰত চিবিআইৰ তদন্তকাৰী সংস্থাৰ যুক্তিৰ সৈতে সন্মতি প্ৰকাশ কৰি কয় যে আৰক্ষীৰ জিম্মাত হোৱা নিৰ্যাতন পূৰ্ব পৰিকল্পিত আৰু নিশাৰ ভিতৰতে সম্পন্ন কৰা হৈছিল। ন্যায়াধীশগৰাকীয়ে কয় যে এই গোচৰত অপৰাধীসকলে সৰ্বোচ্চ শাস্তি পোৱাৰ যোগ্য।
উল্লেখ্য যে ইয়াৰ পূৰ্বে ১৯৯৯ চনত তামিলনাডুৰ টুটিকোৰিনৰ থালামুথু নগৰ আৰক্ষী থানাত তিনিজন অভিযুক্তক প্ৰহাৰ কৰি হত্যা কৰাৰ গোচৰত এজন ডি এছ পিকে ধৰি ৯জন তামিলনাডু আৰক্ষী জোৱানক যাৱজ্জীৱন কাৰাদণ্ডৰ শাস্তি প্ৰদান কৰা হৈছিল।
